ರಾಜ್ಯ ಸುದ್ದಿ

ಅಂಬರೀಷ್ ಹೆಸರಿನಲ್ಲಿ ಸ್ಮಾರಕ ನಿರ್ಮಾಣ: ಸಿಎಂ

ಬೆಂಗಳೂರು: ನಟ, ರಾಜಕಾರಣಿ ಅಂಬರೀಷ್‌ ನೆನಪಿಗಾಗಿ ಸ್ಮಾರಕ ನಿರ್ಮಿಸಲಾಗುತ್ತದೆ ಎಂದು ಸಿಎಂ ಎಚ್‌ ಡಿ ಕುಮಾರಸ್ವಾಮಿ ತಿಳಿಸಿದ್ದಾರೆ. ಮಂಡ್ಯದ ವಿಶ್ವೇಶ್ವರಯ್ಯ ಕ್ರೀಡಾಂಗಣದಲ್ಲಿ ಮಾತನಾಡಿದ ಅವರು, ಅಂಬರೀಶ್ ಹೆಸರಿನಲ್ಲಿ ರಾಜ್ಯ ಸರಕಾರ ಹಲವು ಕಲ್ಯಾಣ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಿದೆ. ಶೀಘ್ರದಲ್ಲೇ ಅವುಗಳನ್ನು ಘೋಷಿಸಲಾಗುತ್ತದೆ. ಸ್ಮಾರಕ ನಿರ್ಮಾಣಕ್ಕೆ ಅಗತ್ಯ ಕ್ರಮ ಕೈಗೊಳ್ಳುತ್ತೇವೆ ಎಂದು ಹೇಳಿದ್ದಾರೆ.

ರಾಜ್ಯದ ಅಭಿವೃದ್ಧಿ ಮತ್ತು ಯೋಜನೆಗಳ ಕುರಿತು ಅಂಬರೀಶ್ ಸದಾ ಸಲಹೆ ಸೂಚನೆ ನೀಡುತ್ತಿದ್ದರು. ಮಂಡ್ಯದ ಜನತೆ ಅವರನ್ನು ಕೊನೆಯ ಬಾರಿಗೆ ನೋಡಬೇಕೆಂದು ಒತ್ತಾಯಿಸಿದ್ದರಿಂದ, ಅಭಿಮಾನಿಗಳು ಮತ್ತು ಹುಟ್ಟೂರ ಜನತೆಯ ಅಭಿಲಾಷೆಯಂತೆ ಮಂಡ್ಯದಲ್ಲೂ ಅಂಬರೀಶ್ ಪಾರ್ಥೀವ ಶರೀರದ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿತ್ತು. ಮಾಧ್ಯಮ ಹಾಗೂ ಅಂಬರೀಶ್ ಅಭಿಮಾನಿಗಳ ಸಹಕಾರಕ್ಕೆ ಚಿರಋಣಿ, ಎಲ್ಲರ ಸಹಾರಕ್ಕೆ ಸರ್ಕಾರದ ಪರವಾಗಿ ನಾನು ಆಭಾರಿ. ಅಂಬರೀಶ್ ಪಾರ್ಥಿವ ಶರೀರ ಮಂಡ್ಯಕ್ಕೆ ತರೋದು ಸರಕಾರಕ್ಕೂ ಸವಾಲಾಗಿತ್ತು. ಅಂಬಿ ನಡೆ ನುಡಿ ಚಿರಕಾಲ ನಮ್ಮ ಜೊತೆ ಇರುತ್ತದೆ, ಅವರು ನನ್ನ ಅಣ್ಣನ ಸಮಾನರು. ನನ್ನ ಆರೋಗ್ಯದ ಬಗ್ಗೆ ಅಂಬರೀಶ್‌ಗೆ ತುಂಬಾ ಕಾಳಜಿ ಇತ್ತು.

ಭಾನುವಾರ ಸಂಜೆಯಿಂದ ಸೋಮವಾರ ಬೆಳಗ್ಗಿನವರೆಗೆ ಸುಮಾರು 2.5 ಲಕ್ಷಕ್ಕೂ ಅಧಿಕ ಮಂದಿ ಅಂಬರೀಶ್ ಅವರ ಅಂತಿಮ ದರ್ಶನ ಮಾಡಿದ್ದಾರೆ. ಎಲ್ಲಿಯೂ ತೊಂದರೆಯಾಗದಂತೆ ಜನರು ವರ್ತಿಸಿದ್ದಾರೆ. ಅಂಬರೀಶ್ ಅವರ ಮೇಲಿನ ಅಭಿಮಾನವನ್ನು ವ್ಯಕ್ತಪಡಿಸಿದ್ದಾರೆ. ಅದಕ್ಕಾಗಿ ಸಿಎಂ ಮಂಡ್ಯದ ಜನತೆಗೆ ಧನ್ಯವಾದ ಅರ್ಪಿಸಿದ್ದಾರೆ.

ಕಲಾವಿದನಿಗೆ ಗೌರವ ಕೊಡೋಣ : ಅಂಬರೀಶ್ ಅವರ ಅಂತ್ಯಸಂಸ್ಕಾರವನ್ನು ಕಂಠೀರವ ಸ್ಟುಡಿಯೋದಲ್ಲಿ ಮಾಡಲು ಸರಕಾರ ನಿರ್ಧರಿಸಿದ್ದು, ಅದಕ್ಕೆ ವಕೀಲರೊಬ್ಬರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಸರಕಾರಿ ಜಾಗದ ಬಳಕೆಗೆ ಆಕ್ಷೇಪ ವ್ಯಕ್ತಪಡಿಸಿದ ವಕೀಲರ ಕ್ರಮಕ್ಕೆ ಸಿಎಂ, ಓರ್ವ ಕಲಾವಿದನಿಗೆ ಕೊಡಬೇಕಾದ ಗೌರವವನ್ನು ಸರಕಾರ ಕೊಡುತ್ತಿದೆ, ಅದರ ಹೊರತಾಗಿ ಬೇರಾವುದೇ ಉದ್ದೇಶವಿಲ್ಲ. ಅದಕ್ಕೆ ಸರಕಾರಿ ಜಾಗ ದುರ್ಬಳಕ್ಕೆ ಎಂದೆಲ್ಲ ಆಕ್ಷೇಪಿಸಿ, ಅಡ್ಡಿಪಡಿಸುವುದು ಸರಿಯಲ್ಲ. ಕಲಾವಿದನನ್ನು ಕಲಾವಿದನಾಗಿಯೇ ನೋಡೋಣ, ನಾಡಿಗೆ ಅವರ ಕೊಡುಗೆಯನ್ನು ಗೌರವಿಸೋಣ ಎಂದು ಹೇಳಿದ್ದಾರೆ. ಸರಕಾರದ ಆಸ್ತಿ ರಕ್ಷಿಸುವ ವಕೀಲರ ಕಾಳಜಿ ಮೆಚ್ಚಬೇಕು, ಆದ್ರೆ ಹೃದಯ ವೈಶಾಲ್ಯತೆ ಮುಖ್ಯ. ಅಂಬರೀಶ್ ಸ್ವಚ್ಚ ಮನಸ್ಸು ಎಲ್ಲರಿಗೂ ಮಾದರಿ. ಎಳನೀರು ಮಾರುವ ವ್ಯಕ್ತಿ ರೈಲಿಗೆ ತಲೆಕೊಟ್ಟು ಆತ್ಮಹತ್ಯೆ ಬಿಟ್ಟು ಉಳಿದೆಲ್ಲೂ ಅಹಿತಕರ ಘಟನೆಗಳು ನಡೆದಿಲ್ಲ, ನೋವಿನ ನವಂಬರ್ ಮತ್ತೆ ಬರದಿರಲಿ ಎಂದು ಮಂಡ್ಯದಲ್ಲಿ ಸಿಎಂ ಕುಮಾರಸ್ವಾಮಿ ಹೇಳಿದ್ದಾರೆ.

About the author

ಕನ್ನಡ ಟುಡೆ

Leave a Comment