ರಾಜ್ಯ ಸುದ್ದಿ

ಪುತ್ತೂರು: ಅಡಕೆ ಮಾರುಕಟ್ಟೆಯಲ್ಲಿ ನಿರಂತರ ಸ್ಥಿರತೆ

ಪುತ್ತೂರು: ಋತುಮಾನದ ಅಡಕೆ ಕೊಯಿಲು ಸಂಪೂರ್ಣ ಮುಗಿದು, ಬೆಳೆಗಾರರ ಅಂಗಳದಲ್ಲಿ ಅಡಕೆ ಒಣಗಿಸುವ, ಸುಲಿಯುವ, ಮಾರುವ ವಹಿವಾಟು ಚುರುಕು ಪಡೆದುಕೊಂಡಿದೆ. ಈ ಮಧ್ಯೆ ಮಾರುಕಟ್ಟೆಯಲ್ಲಿ ಅಡಕೆ ಧಾರಣೆ ಕಳೆದೊಂದು ತಿಂಗಳಿನಿಂದಲೂ ಏಕಪ್ರಕಾರ ಸ್ಥಿರತೆ ಕಾಪಾಡಿಕೊಂಡಿದೆ.

ನವೆಂಬರ್‌ ವೇಳೆಗೆ ಆರಂಭಗೊಳ್ಳುವ ಅಡಕೆ ಕೊಯ್ಲು ಫೆಬ್ರವರಿಗೆ ಸಂಪೂರ್ಣ ಮುಗಿಯುತ್ತದೆ. ಈ ಕೊಯ್ಲಿನ ಅಡಕೆ ಪ್ರಸ್ತುತ ಮಾರುಕಟ್ಟೆಯಲ್ಲಿ ಹೊಸ ಅಡಕೆ ಎಂಬ ಹೆಸರಿನಲ್ಲಿ ಖರೀದಿಯಾಗುತ್ತಿದ್ದು, ಕಳೆದೊಂದು ತಿಂಗಳಿನಿಂದಲೂ ಕಿ.ಲೋವೊಂದಕ್ಕೆ 225 ರೂ. ಉಳಿಸಿಕೊಂಡಿದೆ. ಕಳೆದ ಸಾಲಿನ ಅಡಕೆಯನ್ನು ಹಳೆ ಅಡಕೆ ಅಥವಾ ಸಿಂಗಲ್‌ ಚೋಲ್‌ ವರ್ಗೀಕರಣದಲ್ಲಿ ಖರೀದಿಸಲಾಗುತ್ತಿದೆ. ಪ್ರಸ್ತುತ ಇದರ ಧಾರಣೆ 270 ರೂ. ಸ್ಥಿರಗೊಂಡಿದೆ. ಅದಕ್ಕಿಂತಲೂ ಹಿಂದಿನ ವರ್ಷದ ಡಬ್ಬಲ್‌ ಚೋಲ್‌ ಅಡಕೆಗೆ 310 ರೂ. ಧಾರಣೆ ಇದೆ. ಎಪಿಎಂಸಿ ಮತ್ತು ಕ್ಯಾಂಪ್ಕೋಗಳಲ್ಲಿ ಈ ಧಾರಣೆ ಇದ್ದು, ಮುಕ್ತ ಮಾರುಕಟ್ಟೆಯಲ್ಲಿ ಮೂರು ಬಗೆಯ ಅಡಕೆಯೂ ತಲಾ 5 ರೂ. ಹೆಚ್ಚುವರಿಗೆ ಖರೀದಿಯಾಗುತ್ತಿದೆ. ಜನವರಿ ಆರಂಭದಲ್ಲಿ ಹೊಸ ಅಡಕೆಗೆ 230 ರೂ.ಗಳಿದ್ದರೆ, ಜನವರಿ ಅಂತ್ಯದಲ್ಲಿ ಇದು 240ಕ್ಕೆ ಏರುವ ಮೂಲಕ ಬೆಳೆಗಾರರಲ್ಲಿ ಹೊಸ ನಿರೀಕ್ಷೆ ಹುಟ್ಟಿಸಿತ್ತು. ಆದರೆ ಅದೇ ಏರುಗತಿಯಲ್ಲಿ ಸಾಗದ ಧಾರಣೆ, ಕಳೆದೊಂದು ತಿಂಗಳಿನಿಂದ 225 ರೂ.ನಲ್ಲೇ ನೆಲೆಗೊಂಡಿದೆ. ಜನವರಿ ಆರಂಭದಲ್ಲಿ ಹಳೆ ಅಡಕೆಗೆ 270 ರೂ. ಧಾರಣೆ ಇದ್ದರೆ, ಬಳಿಕ 275 ರೂ.ಗೆ ಏರಿ ಈಗ ಮತ್ತೆ 270 ರೂ.ಗೆ ಬಂದು ನಿಂತಿದೆ.

ಹೊಸ ಅಡಕೆಗೆ 250ರ ಆಸುಪಾಸಿನ ಧಾರಣೆ ಇದ್ದಲ್ಲಿ ಸಣ್ಣ ಮತ್ತು ಮಧ್ಯಮ ವರ್ಗದ ಬೆಳೆಗಾರರು ನೆಮ್ಮದಿಯ ನಿಟ್ಟುಸಿರು ಬಿಡುತ್ತಾರೆ. ಸಿಂಗಲ್‌ ಚೋಲ್‌ ಮತ್ತು ಡಬ್ಬಲ್‌ ಚೋಲ್‌ ವಹಿವಾಟು ಸಾಮಾನ್ಯವಾಗಿ ದೊಡ್ಡ ಮತ್ತು ಅತಿದೊಡ್ಡ ಬೆಳೆಗಾರರಲ್ಲಿ ಕಾಣ ಸಿಗುತ್ತದೆ. ಇವರು ಹೊಸ ಅಡಕೆಯ ಧಾರಣೆಗೆ ತಲೆಕೆಡಿಸಿಕೊಳ್ಳುವುದಿಲ್ಲ. ಬದಲಾಗಿ ಉತ್ತಮ ಧಾರಣೆ ನೋಡಿಕೊಂಡು ಡಬ್ಬಲ್‌ ಚೋಲ್‌ ಅಡಕೆಯನ್ನೇ ಮಾರುತ್ತಾರೆ. ಹೊಸ ಅಡಕೆಯನ್ನು ಮುಂದಿನ ವರ್ಷಕ್ಕೆ ದಾಸ್ತಾನು ಇರಿಸುತ್ತಾರೆ. ಆರ್ಥಿಕ ಅನಿವಾರ್ಯತೆಯು ಸಣ್ಣ, ಮಧ್ಯಮ ವರ್ಗದ ಬೆಳೆಗಾರರನ್ನು ಶೇಖರಣೆಯತ್ತ ಗಮನ ಕೊಡದಂತೆ ಮಾಡುತ್ತದೆ ಎಂಬುದು ಮಾರುಕಟ್ಟೆಯಲ್ಲಿ ಕೇಳಿ ಬರುವ ಮಾತು.

About the author

ಕನ್ನಡ ಟುಡೆ

Leave a Comment