ದೇಶ ವಿದೇಶ

ಅಮೆರಿಕದ ಉನ್ನತ ಹುದ್ದೆಗಳಿಗೆ ಮೂವರು ಭಾರತೀಯರು

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ ತಮ್ಮ ಆಡಳಿತದ ಆಯಕಟ್ಟಿನ ಸ್ಥಾನಗಳಿಗೆ ಮೂವರು ಭಾರತೀಯ ಮೂಲದ ತಜ್ಞರನ್ನು ನೇಮಕ ಮಾಡಿದ್ದಾರೆ. ಇಂಧನ (ಪರಮಾಣು ಶಕ್ತಿ) ಇಲಾಖೆಯ ಸಹಾಯಕ ಕಾರ್ಯದರ್ಶಿಯಾಗಿ ರೀಟಾ ಬರನ್‌ವಾಲಾ, ಗೌಪ್ಯತೆ ಮತ್ತು ನಾಗರಿಕ ಸ್ವಾತಂತ್ರ್ಯದ ಮೇಲ್ವಿಚಾರಣೆ ಮಂಡಳಿ ಸದಸ್ಯರಾಗಿ ಆದಿತ್ಯ ಬಾಮ್ಜಾಯ್‌, ಖಜಾನೆ ವಿಭಾಗದ ಸಹಾಯಕ ಕಾರ್ಯದರ್ಶಿಯಾಗಿ ಬಿಮಲ್‌ ಪಟೇಲ್‌ ಅವರನ್ನು ನೇಮಕಗೊಳಿಸಿ ಟ್ರಂಪ್‌ ಗುರುವಾರ ಆದೇಶ ಹೊರಡಿಸಿದ್ದಾರೆ.

ಬರನ್‌ವಾಲಾ, ಬಾಮ್ಜಾಯ್‌, ಪಟೇಲ್‌ ಅವರ ನೇಮಕ ಶಿಫಾರಸನ್ನು ಸೆನೆಟ್‌ಗೆ ಬುಧವಾರ ಕಳುಹಿಸಲಾಗಿತ್ತು. ಇದುವರೆಗೂ ಟ್ರಂಪ್‌ ಅವರು 36ಕ್ಕೂ ಹೆಚ್ಚು ಭಾರತೀಯ ಮೂಲದ ವ್ಯಕ್ತಿಗಳನ್ನು ಪ್ರಮುಖ ಹುದ್ದೆಗಳಿಗೆ ನೇಮಕ ಮಾಡಿದ್ದಾರೆ. ಮೊದಲ ಬಾರಿಗೆ ಭಾರತೀಯ ಮೂಲದ ನಿಕ್ಕಿ ಹ್ಯಾಲೆ, ಕ್ಯಾಬಿನೆಟ್‌ ಶ್ರೇಣಿ ಹುದ್ದೆ ಅಲಂಕರಿಸಿದ್ದರು. ಶ್ವೇತಭವನದ ಮಾಧ್ಯಮ ಉಪ ಕಾರ್ಯದರ್ಶಿಯಾಗಿ ಭಾರತೀಯ ಮೂಲದ ರಾಜ್‌ ಶಾ ನೇಮಕಗೊಂಡಿದ್ದರು. ಆದರೆ ಕಳೆದ ಕೆಲವು ತಿಂಗಳಲ್ಲಿ ಈ ಇಬ್ಬರು ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ.

ಗೇಟ್‌ವೇ ಫಾರ್‌ ಅಕ್ಸಿಲರೇಟೆಡ್‌ ಇನ್ನೋವೇಶನ್‌ ಇನ್‌ ನ್ಯೂಕ್ಲಿಯರ್‌(ಗೇನ್‌)ನ ನಿರ್ದೇಶಕರಾಗಿ ಬರನ್ವಾಲ ಕರ್ತವ್ಯ ನಿರ್ವಹಿಸಲಿದ್ದಾರೆ. ಇದಕ್ಕೂ ಮೊದಲು ಅವರು ವೆಸ್ಟಿಂಗ್‌ಹೌಸ್‌ನಲ್ಲಿರುವ ತಂತ್ರಜ್ಞಾನ ಅಭಿವೃದ್ಧಿ ಮತ್ತು ಅನುಷ್ಠಾನದ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿದ್ದರು. ಯೇಲ್‌ ವಿಶ್ವವಿದ್ಯಾಲಯದಿಂದ ಪದವಿ ಪಡೆದಿರುವ ಆದಿತ್ಯ ಅವರು ಈ ಹಿಂದೆ ಅಮೆರಿಕ ಸುಪ್ರೀಂ ಕೋರ್ಟ್‌ನ ನ್ಯಾಯಮೂರ್ತಿ ಆಂಟೊನಿನ್‌ ಸ್ಕಲಿಯಾ ಮತ್ತು ನ್ಯಾಯಾಧೀಶ ಜೆಫ್ರಿ ಸುಟ್ಟನ್‌ ಅವರಿಗೆ ಲಾ ಕ್ಲರ್ಕ್‌ ಆಗಿ ಕೆಲಸ ಮಾಡಿದ್ದರು. ಪಟೇಲ್‌ ಅವರು ಈ ಮೊದಲು ವಾಷಿಂಗ್ಟನ್‌ ಡಿಸಿಯಲ್ಲಿರುವ ಆರ್ಥಿಕ ಸಲಹಾ ಸಂಸ್ಥೆಯ ಪಾಲುದಾರ ಮತ್ತು ಮುಖ್ಯಸ್ಥರಾಗಿದ್ದರು

About the author

ಕನ್ನಡ ಟುಡೆ

Leave a Comment