ಅ೦ತರಾಷ್ಟ್ರೀಯ

ಅಮೆರಿಕದ 30 ವರ್ಷದ ಚರ್ಚ್‌ ಹಿಂದೂ ದೇವಸ್ಥಾನವಾಗುತ್ತಿದೆ

ವಾಷಿಂಗ್ಟನ್‌: ವರ್ಜಿನಿಯಾದ ಪೊರ್ಟ್ಸ್‌ಮೌತ್‌ನಲ್ಲಿರುವ 30 ವರ್ಷದ ಚರ್ಚ್‌ ಹಿಂದೂ ದೇವಸ್ಥಾನವಾಗಿ ಮಾರ್ಪಡುತ್ತಿದೆ. ಸುಮಾರು 1.1 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಂಡಿದ್ದ ಚರ್ಚ್‌ ಇದೀಗ ಹಿಂದೂ ದೇವಸ್ಥಾನವಾಗಿ ಬದಲಾಗುತ್ತಿದೆ.

ಚರ್ಚ್‌ ನೂತನ ದೇವಾಲಯವಾಗಿ ಬದಲಾದ ನಂತರ ಸ್ವಾಮಿ ನಾರಾಯಣ ಗಾದಿ ಸಂಸ್ಥಾನವು ಎಲ್ಲ ಮೂರ್ತಿಗಳಿಗೆ ಪ್ರಾಣ ಪ್ರತಿಷ್ಠೆ ಮಾಡುತ್ತದೆ ಎಂದು ಟೈಮ್ಸ್‌ ಆಫ್‌ ಇಂಡಿಯಾ ವರದಿ ಮಾಡಿದೆ. ಸಂಸ್ಥಾನವು ಅಮೆರಿಕ, ಯೂರೋಪ್‌ ರಾಷ್ಟ್ರಗಳಲ್ಲಿ ಹಿಂದೂ ದೇವಸ್ಥಾನಗಳನ್ನು ನಿರ್ಮಿಸುತ್ತಿದೆ. ಕೆಂಟುಕಿ, ಕ್ಯಾಲಿಫೋರ್ನಿಯಾ, ಚಿಕಾಗೊ, ನ್ಯೂ ಜರ್ಸಿ ಮತ್ತಿತರ ಪ್ರದೇಶಗಳಲ್ಲು ಸಂಸ್ಥಾನ ದೇವಸ್ಥಾನಗಳನ್ನು ನಿರ್ಮಿಸಿದೆ.

5 ಎಕರೆ ಜಾಗದಲ್ಲಿ ಚರ್ಚ್‌ ಇದೆ. ನಾಲ್ಕು ಚಕ್ರದ 150 ಗಾಡಿಗಳಿಗೆ ಪಾರ್ಕಿಂಗ್‌ ಮಾಡುವಷ್ಟು ಜಾಗವಿದೆ. ವರದಿ ಪ್ರಕಾರ ಚರ್ಚ್‌ ಹಿಂದೂ ದೇವಸ್ಥಾನವಾಗಿ ಬದಲಾಗುತ್ತಿರುವುದು ಇದೇ ಮೊದಲಲ್ಲ. ಪೆನ್ಸಿಲವೆನಿಯಾ, ಲಾಸ್‌ ಏಂಜಲೀಸ್‌ ಮತ್ತು ಒಹಿಯೋಗಳಲ್ಲು ಚರ್ಚ್‌ಗಳನ್ನು ದೇವಸ್ಥಾವಾಗಿ ಬದಲಿಸಲಾಗಿದೆ. ಅಮೆರಿಕದಲ್ಲಿ ಹಿಂದೂ ದೇವಸ್ಥಾನವಾಗಿ ಬದಲಾಗುತ್ತಿರುವ 6ನೇ ಚರ್ಚ್‌ ಇದು ಎನ್ನಲಾಗಿದೆ. ಟೊರೆಂಟೊದಲ್ಲೂ ಹಿಂದೂ ದೇವಸ್ಥಾನವಿದ್ದು, ಕೆನಡಾದ ಅತ್ಯಂತ ದೊಡ್ಡ ಹಿಂದೂ ಧಾರ್ಮಿಕ ಸ್ಥಳವಾಗಿದೆ. ಬ್ರಿಟನ್‌ನಲ್ಲೂ ಎರಡು ಚರ್ಚ್‌ಗಳನ್ನು ದೇವಸ್ಥಾನವನ್ನಾಗಿ ಬದಲಾಯಿಸಲಾಗಿದೆ. ಲಂಡನ್‌ ಮತ್ತು ಬೊಲ್ಟನ್‌ ನಗರಗಳ ಎರಡು ಚರ್ಚ್‌ಗಳನ್ನು ಮಂದಿರವನ್ನಾಗಿ ಪರಿವರ್ತಿಸಲಾಗಿದೆ.

ಆಚಾರ್ಯ ಸ್ವಾಮಿಶ್ರೀ ಪುರುಷೋತ್ತಮ ಪ್ರಿಯದಾಸ್‌ಜಿ ಮಹಾರಾಜ್‌ ಸಂಸ್ಥಾನದ ಪ್ರಧಾನ ಧಾರ್ಮಿಕ ಮುಖಂಡರು. ಸಂಸ್ಥಾನದ ಮೂಲ ಅಹಮದಾಬಾದ್‌ನ ಮನಿನಗರ. ಅಮೆರಿಕದ ವರ್ಜಿನಿಯಾದಲ್ಲಿ ಅಂದಾಜು 10,000 ಗುಜರಾತಿಗಳು ನೆಲೆಸಿದ್ದು, ನೂತನ ದೇವಸ್ಥಾನವು ಹರಿಭಕ್ತರಿಗೆ ಮೊದಲ ಧಾರ್ಮಿಕ ಕ್ಷೇತ್ರವಾಗಲಿದೆ.

About the author

ಕನ್ನಡ ಟುಡೆ

Leave a Comment