ರಾಜ್ಯ ಸುದ್ದಿ

ಅಸತ್ಯ ಹೇಳುವ ಉಗ್ರಪ್ಪ ಅಸತ್ಯ ಶೋಧನಾ ಸಮಿತಿಯಿಂದ ಅಸತ್ಯ ವರದಿ ಕೊಟ್ಟರು: ಜನಾರ್ದನ ರೆಡ್ಡಿ ವಾಗ್ದಾಳಿ

ಬಳ್ಳಾರಿ: ದಿನ ಬೆಳಗಾದರೆ ಅಸತ್ಯವನ್ನು ಹೇಳುವ ಉಗ್ರಪ್ಪ, ಅಸತ್ಯ ಶೋಧನಾ ಸಮಿತಿಯಿಂದ ಅಸತ್ಯ ವರದಿ ಕೊಟ್ರು. ಐದು ವರ್ಷ ಸರಕಾರವಿದ್ದಾಗ ಒಂದೂ ರೂಪಾಯಿ ಕೂಡ ವಸೂಲಿ ಮಾಡಲು ಆಗಲಿಲ್ಲ ಎಂದು ಮಾಜಿ ಸಚಿವ ಜನಾರ್ದನ ರೆಡ್ಡಿ ಅವರು ಕಾಂಗ್ರೆಸ್ ವಾಗ್ದಾಳಿ ನಡೆಸಿದರು. ಚಿತ್ರದುರ್ಗ ಜಿಲ್ಲೆಯ ಹಾನಗಲ್ ಕ್ರಾಸ್ ನಲ್ಲಿರುವ ಹೊಟೇಲ್‌ನಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಕಾಂಗ್ರೆಸ್ ಪಾದಯಾತ್ರೆಯಲ್ಲಿ‌ ಮಾಜಿ ಸಿಎಂ ಸಿದ್ದರಾಮಯ್ಯನವರು ಅಕ್ರಮ ಗಣಿಗಾರಿಕೆಯಿಂದ ರೆಡ್ಡಿ ಸಹೋದರರು ಒಂದು ಲಕ್ಷ ಕೋಟಿ ಹಣ ಲೂಟಿ ಮಾಡಿದ್ದಾರೆ. ನಾವು ಅಧಿಕಾರಕ್ಕೆ ಬಂದರೆ ಆ ಹಣವನ್ನ ವಸೂಲಿ ಮಾಡಿ ರಾಜ್ಯದ ಬಡವರಿಗೆ ಮನೆಗಳ ನಿರ್ಮಾಣ ಹಾಗೂ ಅಭಿವೃದ್ಧಿ ಮಾಡುತ್ತೇವೆ ಎಂದು ಹೇಳಿದ್ದರು. ಐದು ವರ್ಷ ರಾಜ್ಯದ ಮುಖ್ಯಮಂತ್ರಿ ಯಾಗಿದ್ದ  ಸಿದ್ದರಾಮಯ್ಯ ನವರು ನನ್ನಿಂದ ಎಷ್ಟು ಹಣ ವಸೂಲಿ ಮಾಡಿದ್ದಾರೆಂದು ಸಾರ್ವಜನಿಕವಾಗಿ ಬಹಿರಂಗಪಡಿಸಬೇಕು ಎಂದು ಸವಾಲೆಸೆದರು.

‘ಇವರಿಗೆ ನಾಚಿಕೆ ಇದೆಯಾ? ಪಾದಯಾತ್ರೆಯಲ್ಲಿ‌ ಒಂದು‌ ಲಕ್ಷ ಕೋಟಿ ಅಂತಾರೆ. ಇನ್ನೊಂದೆಡೆ ಸಿದ್ದರಾಮಯ್ಯನವರು 25,000 ಕೋಟಿಯಷ್ಟು ಲೂಟಿಯೆಂದು, ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿಯವರು 35,000 ಕೋಟಿಯಷ್ಟು ಲೂಟಿ ಮಾಡಿದ್ದಾರೆಂದು ಫೇಸ್ ಬುಕ್‌, ಟ್ವೀಟರ್ ನಲ್ಲಿ ಬರೆದು ಕೊಳ್ಳುತ್ತಾರೆ. ಇವೆಲ್ಲ ದಾಖಲೆ ಸಮೇತ ಇವೆ. ಮಾನನಷ್ಟ ಮೊಕದ್ದಮೆ ಹಾಕುವುದಕ್ಕೆ ನಾನು ಸಿದ್ಧನಿದ್ದೇನೆ. ಮಾನ, ಮರ್ಯಾದೆನೇ ಇಲ್ಲದವರ ಮೇಲೆ ನಾನ್ಯಾಕ ಮಾನನಷ್ಟ ಮೊಕದ್ದಮೆ ಹೂಡಬೇಕಂತಾ ನನ್ನಷ್ಟಕ್ಕೇ ಅಂದುಕೊಂಡೆ’ ಎಂದು‌ ತಿಳಿಸಿದರು. ನನ್ನ ಮನೆ ಹಾಗೂ ಸಹಚರರ ಮನೆಗಳ ಮೇಲೆ ಸಿಬಿಐ ಅಧಿಕಾರಿಗಳನ್ನು ಬಿಟ್ಟು ಕಾರ್ಯಾಚರಣೆ ನಡೆಸಿದ್ದರೂ ಕೂಡ ಒಂದು ನಯಾಪೈಸೆ ಸಿಗಲಿಲ್ಲ. ಆದರೆ, ಸಚಿವ ಡಿಕೆಶಿಯವರ ದೆಹಲಿಯ ಮನೆಯಲ್ಲಿ ದುಡ್ಡಿನ‌ ಕಂತೆಗಳೇ ಸಿಕ್ಕಿವೆ. ಈ ವಿಚಾರವಾಗಿ ಕಾಂಗ್ರೆಸ್ ತಲೆತಗ್ಗಿಸಿಕೊಳ್ಳಬೇಕು ಎಂದು ಕಿಡಿಕಾರಿದರು.

ಡಿಕೆಶಿಗೆ ಸವಾಲು : ಸಚಿವ ಡಿಕೆಶಿಯವರು ಕೇವಲ ರಾಜಕೀಯ ತಂತ್ರಗಾರನಲ್ಲ. ಕುತಂತ್ರಗಾರ, ಮಂತ್ರಗಾರ, ಈ ವಿಷಯದಲ್ಲಿ ಪಿಎಚ್ ಡಿ ಮಾಡಿದ್ದಾರೆ. ಅದಕ್ಕೋಸ್ಕರ ಡಾ.ಡಿ.ಕೆ.ಶಿವಕುಮಾರರೆಂದು ಕರಿಬೇಕು. ಇವರಿಗೆ ಆತ್ಮಸಾಕ್ಷಿ ಇದ್ದರೆ ಧರ್ಮ ಒಡೆಯೋ ವಿಚಾರ ಸಂಬಂಧ ಸಚಿವ ಸಂಪುಟದಲ್ಲಿ ಚರ್ಚಿಸುವಾಗ ಮೇಲೆದ್ದು ವಿರೋಧಿಸಬೇಕಿತ್ತು. ಸಚಿವ ಸ್ಥಾನಕ್ಕೂ ರಾಜೀನಾಮೆ ಕೊಡಬೇಕಿತ್ತು. ಅದಕ್ಕೆ ನಾನು ಮೆಚ್ಚಿಕೊಳ್ಳುತ್ತಿದ್ದೆ ಎಂದರು.

ಐದು ವರ್ಷದ ಅವಧಿಯಲ್ಲಿ, ಸಮ್ಮಿಶ್ರ ಸರಕಾರದ ಮತ್ತು ಐದು ತಿಂಗಳಲ್ಲಿ ಜಿಲ್ಲೆಯ ಅಭಿವೃದ್ಧಿಗೆ ಎಷ್ಟು ಹಣ ನೀಡಿದ್ದಾರೆ. ಎಷ್ಟು ಅಭಿವೃದ್ದಿ ಮಾಡಿದ್ದಾರೆ. ನಮ್ಮ ಸರಕಾರದ ಅವಧಿಯಲ್ಲಿ ಎಷ್ಟು ಅನುದಾನ ತಂದು ಅಭಿವೃದ್ಧಿಪಡಿಸಿರುವ ಬಗ್ಗೆ ನಾನು ಬಹಿರಂಗ ಚರ್ಚೆಗೆ ಸಿದ್ಧನಿದ್ದೇನೆ ಎಂದು ಸವಾಲೆಸೆದು,‌ ಇನ್ನೂ ನಾಲ್ಕೈದು ದಿನಗಳ ಕಾಲ ಇಲ್ಲೇ ಇರುವೆ. ಯಾವಾಗ ಬೇಕಾದ್ರೂ ಸಚಿವರು ಬಹಿರಂಗ ಚರ್ಚೆಗೆ ಬರಬಹುದು ಎಂದು ಸವಾಲು ಹಾಕಿದರು.

ಕುರುಬ (ಹಾಲುಮತ), ವಾಲ್ಮೀಕಿ ಸಮುದಾಯದವರು ಜಿಲ್ಲೆಯಲ್ಲಿ ಅಣ್ಣ, ತಮ್ಮಂದಿರಂತೆ ಇದ್ದೇವೆ. ಸಿದ್ದರಾಮಯ್ಯನವರು ರಾಜಕೀಯಗೋಸ್ಕರ ಕುರುಬ, ವಾಲ್ಮೀಕಿ ಸಮುದಾಯದ ಮಧ್ಯೆ ವಿಷಬೀಜ ಬಿತ್ತುತ್ತಿದ್ದಾರೆ. ವೀರಶೈವರ ಬಗ್ಗೆ ಇಷ್ಟೊಂದು ಪ್ರೀತಿ ತೋರುವ ಸಚಿವ ಡಿಕೆಶಿಯವರು, ಬಿಎಸ್ ವೈ ಮುಖ್ಯಮಂತ್ರಿ ಆಗಬಾರದೆಂದು ಕಾಂಗ್ರೆಸ್ ಮತ್ತು ಜೆಡಿಎಸ್ ಸೇರಿಕೊಂಡು ಸಮ್ಮಿಶ್ರ ಸರಕಾರದ ರಚನೆಗೆ ಮುಂದಾದರು.

ಕಾಂಗ್ರೆಸ್ ವಲಸಿಗರ ಪಕ್ಷವಾಗಿದೆ. ಕಾಂಗ್ರೆಸ್ಸಿಗಾಗಿ ಜೀವನವನ್ನೇ‌ ಮುಡಿಪಾಗಿಟ್ಟ ದಲಿತ ಮುಖಂಡ ಮಲ್ಲಿಕಾರ್ಜುನ ಖರ್ಗೆಯವರನ್ನು‌ ಸಿಎಂ ಮಾಡಲಿಕ್ಕೆ ಆಗಲಿಲ್ಲ. ದಲಿತರಾದ ಎಲ್.ಜಿ.ಹಾವನೂರನ್ನ, ಸಂವಿಧಾನ ಶಿಲ್ಪಿ ಅಂಬೇಡ್ಕರ್ ಅವರನ್ನ ಸೋಲಿಸಿದ ಪಕ್ಷ ಕಾಂಗ್ರೆಸ್. ಇಂಥವರು ಹಣಚೀಲ ಹಿಡಿದುಕೊಂಡು ಬಂದು‌ ಬಳ್ಳಾರಿ ಚುನಾಚಣೆ ಗೆಲ್ಲೋದಕ್ಕೆ ಬಂದಿದ್ದಾರೆ ಎಂದರು. ಹಿಂದಿನ ಕಾಂಗ್ರೆಸ್ ಸರಕಾರ ಈಗಿನ ಮೈತ್ರಿಕೂಟ ಸರಕಾರದಲ್ಲಿ ನನಗೆ ಭದ್ರತೆ ಒದಗಿಸಬೇಕೆಂದು ಕೋರಿ ಬೆಂಗಳೂರು ಡಿಜಿಯವರಿಗೆ ಎರಡೂ ಬಾರಿ ಮನವಿ ಮಾಡಿದರೂ ಪ್ರತಿಕ್ರಿಯಿಸಿಲ್ಲ. ಬೆಂಗಳೂರಿನಲ್ಲಿರುವ ನನ್ನ ಮನೆ ಸುತ್ತಲೂ ಭಯಾನಕ ವಾತಾವರಣ ಸೃಷ್ಠಿಯಾಗಿದೆ‌. ಇದರಿಂದ ಮನಸಿಗೆ ಘಾಸಿಯಾಗಿ, ಉತ್ತರ ಕರ್ನಾಟಕದ ಯಾವುದಾದರೊಂದು ಗ್ರಾಮದಲ್ಲಿ ಖಾರದ ಪುಡಿ ಚಟ್ನಿ, ರೊಟ್ಟಿ ಹಾಗೂ ಮಜ್ಜಿಗೆ ಕುಡಿದು ಬದುಕೋದು ವಾಸಿ. ಮರು ಚುನಾವಣೆ ಮುಗಿದ ನಂತರ ರಾಜ್ಯವ್ಯಾಪಿ ಪ್ರವಾಸ ಕೈಗೊಂಡು ನಾನು ಏನೆಂದು ತಿಳಿಸುವೆ ಎಂದು ಮಾಜಿ ಸಚಿವ ಜನಾರ್ದನ ರೆಡ್ಡಿ ತಿಳಿಸಿದರು.

About the author

ಕನ್ನಡ ಟುಡೆ

Leave a Comment