ರಾಜ್ಯ ಸುದ್ದಿ

ಆಸ್ತಿಗಳ ನೋಂದಣಿ ಶುಲ್ಕ 5 ರಿಂದ 20 ರಷ್ಟು ಏರಿಕೆ: ಡಿ.10ರಿಂದ ಹೊಸ ದರ ಜಾರಿ

ಬೆಂಗಳೂರು: ಸ್ಥಿರಾಸ್ತಿಗಳ ಮಾರ್ಗಸೂಚಿ ದರ ಪರಿಷ್ಕರಿಸಲಾಗಿದ್ದು, ಡಿ.10ರಿಂದ ರಾಜ್ಯಾದ್ಯಂತ ಜಾರಿಗೆ ಬರಲಿದೆ. ಮಾರ್ಗಸೂಚಿ ದರ ಶೇ 5 ರಿಂದ 20ರಷ್ಟು ಹೆಚ್ಚಳವಾಗುವುದರಿಂದ ಜಮೀನು, ಮನೆ, ಸೈಟ್‌, ಫ್ಲ್ಯಾಟ್‌ ನೋಂದಣಿ ವೆಚ್ಚ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಲಿದೆ.

ಪರಿಷ್ಕೃತ ಮಾರ್ಗಸೂಚಿ ದರ ಜಾರಿಗೆ ನೋಂದಣಿ ಮತ್ತು ಮುದ್ರಾಂಕ ಇಲಾಖೆ ತಯಾರಿ ನಡೆಸಿದ್ದು, ನೋಂದಣಿ ಮಹಾಪರಿವೀಕ್ಷಕರು ಮತ್ತು ಮುದ್ರಾಂಕಗಳ ಆಯುಕ್ತರು ಡಿ.5 ರಂದು ಆದೇಶ ಹೊರಡಿಸಿದ್ದಾರೆ. ಅದರಂತೆ ಎಲ್ಲ ಜಿಲ್ಲೆಗಳ ಉಪ ನೋಂದಣಾಧಿಕಾರಿಗಳು (ಬಾಗಲಕೋಟ ಜಿಲ್ಲೆಯ ಬೀಳಗಿ ತಾಲೂಕು ಮತ್ತು ವಿಜಯಪುರ ಜಿಲ್ಲೆಯ ವಿಜಯಪುರ ಹೊರತುಪಡಿಸಿ) ಸ್ಥಿರಾಸ್ತಿಗಳ ಮಾರ್ಗಸೂಚಿ ದರವನ್ನು ಡಿ.10ರಿಂದ ಜಾರಿಗೆ ಬರುವಂತೆ ಪರಿಷ್ಕರಿಸಬೇಕು ಎಂದು ನೋಂದಣಿ ಮತ್ತು ಮುದ್ರಾಂಕ ಇಲಾಖೆ ಆಯುಕ್ತ ಕೆ.ವಿ.ತ್ರಿಲೋಕಚಂದ್ರ ತಮ್ಮ ಆದೇಶದಲ್ಲಿ ಸೂಚನೆ ನೀಡಿದ್ದಾರೆ.

ಸರಕಾರ ಕಳೆದ ಅಕ್ಟೋಬರ್‌ 1ರಿಂದ ಮಾರ್ಗಸೂಚಿ ದರ ಪರಿಷ್ಕರಿಸಲು ಉದ್ದೇಶಿಸಿತ್ತು. ಇದಕ್ಕೆ ಕೇಂದ್ರ ಮೌಲ್ಯಮಾಪನ ಸಮಿತಿ ಸೆ.24 ಹಾಗೂ 29ರಂದೇ ಅನುಮೋದನೆ ನೀಡಿತ್ತು. ಆದರೆ ಉಪ ಚುನಾವಣೆ ಸೇರಿದಂತೆ ನಾನಾ ಕಾರಣಗಳಿಂದಾಗಿ ಅದು ಮುಂದೂಡಲ್ಪಟ್ಟಿತ್ತು. ಸಾಮಾನ್ಯವಾಗಿ ಮಾರ್ಗಸೂಚಿ ದರವನ್ನು ಪ್ರತಿವರ್ಷ ಏರಿಕೆ ಮಾಡಲಾಗುವುದು. ಆದರೆ ವಿಧಾನಸಭಾ ಚುನಾವಣೆ ಮತ್ತಿತರ ಕಾರಣಗಳಿಂದ 2016ರಿಂದ ದರ ಏರಿಕೆ ಮಾಡಿರಲಿಲ್ಲ. ಇದೀಗ ಎರಡು ವರ್ಷಗಳ ನಂತರ ರಾಜ್ಯಾದ್ಯಂತ ಮಾರ್ಗಸೂಚಿ ದರ ಪರಿಷ್ಕರಣೆಯಾಗುತ್ತಿದೆ.

ಕಳೆದ ಸೆಪ್ಟಂಬರ್‌ ತಿಂಗಳಲ್ಲಿಯೇ ನೋಂದಣಿ ಮತ್ತು ಮುದ್ರಾಂಕ ಇಲಾಖೆಯು ಮಾರ್ಗಸೂಚಿ ದರ ಪರಿಷ್ಕರಿಸಿ ಕರಡು ಅಧಿಸೂಚನೆ ಪ್ರಕಟಿಸಿತ್ತು. ಆಕ್ಷೇಪಣೆ ಸಲ್ಲಿಸಲು ಸೆ.15ರವರೆಗೆ ಕಾಲಾವಕಾಶ ನೀಡಲಾಗಿತ್ತು. ನಂತರ ಆಕ್ಷೇಪಣೆಗಳನ್ನು ಪರಿಗಣಿಸಿ ಇಲಾಖೆ ಸ್ಥಿರಾಸ್ತಿಗಳ ಅಂದಾಜು ಮಾರುಕಟ್ಟೆ ಮೌಲ್ಯಕ್ಕೆ ಅನುಗುಣವಾಗಿ ಮಾರ್ಗಸೂಚಿ ದರ ಅಂತಿಮಗೊಳಿಸಿತ್ತು.

ಬೆಂಗಳೂರಿನಲ್ಲಿ ಭಾರೀ ಹೆಚ್ಚಳ: 

”ರಾಜ್ಯದ ಎಲ್ಲೆಡೆಗಿಂತ ಬೆಂಗಳೂರು ಮಹಾನಗರದಲ್ಲಿ ಮಾರ್ಗಸೂಚಿ ದರ ಶೇ.20ವರೆಗೆ ಹೆಚ್ಚಾಗಲಿದೆ. ಬಹುತೇಕ ಪ್ರದೇಶಗಳಲ್ಲಿ ಮಾರುಕಟ್ಟೆ ಮೌಲ್ಯ ಅತ್ಯಧಿಕ ಇರುವ ಹಿನ್ನೆಲೆಯಲ್ಲಿ ಸಹಜವಾಗಿಯೇ ಮಾರ್ಗಸೂಚಿ ದರದಲ್ಲೂ ಭಾರೀ ಏರಿಕೆಯಾಗಲಿದೆ,” ಎಂದು ಉಪನೋಂದಣಾಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಬೆಂಗಳೂರಿನ ಎಂ.ಜಿ.ರಸ್ತೆ, ಜಯನಗರ, ಬಸವನಗುಡಿ ಸುತ್ತಮುತ್ತಲ ಪ್ರದೇಶಗಳಲ್ಲಿ ಮಾರ್ಗಸೂಚಿ ದರ ಶೇ.20ರಷ್ಟು ಹೆಚ್ಚಳವಾಗಲಿದೆ. ಅದೇ ರೀತಿ ಜಯನಗರದಲ್ಲಿ ಮಾರುಕಟ್ಟೆ ಮೌಲ್ಯ ಅಧಿಕ ಇರುವುದರಿಂದ ಅಲ್ಲಿ ಒಂದು ಚದರ ಅಡಿಗೆ 15 ಸಾವಿರ ರೂ. ದರ ಏರಿಕೆಯಾಗಲಿದೆ. ಅದೇ ರೀತಿ ಆಲಿ ಆಸ್ಗರ್‌ ರಸ್ತೆ, ರಾಜಭವನ ರಸ್ತೆ, ಬ್ರಿಗೇಡ್‌ ರಸ್ತೆ, ಚರ್ಚ್‌ ಸ್ಟ್ರೀಟ್‌, ಕನ್ನಿಂಗ್‌ ಹ್ಯಾಂ ರಸ್ತೆ, ರೇಸ್‌ಕೋರ್ಸ್‌ ರಸ್ತೆ, ಕನಕಪುರ ರಸ್ತೆ, ಕೆ.ಎಚ್‌.ರಸ್ತೆ, ದೊಮ್ಮಲೂರು ರಸ್ತೆ, ಮಾನ್ಯತಾ ಟೆಕ್‌ ಪಾರ್ಕ್‌, ಮಹದೇವಪುರ, ಕೆ.ಆರ್‌.ಪುರಂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಗೈಡೆನ್ಸ್‌ ಮೌಲ್ಯ ಹೆಚ್ಚಾಗಲಿದೆ.

ಜನಸಂಖ್ಯೆ ಅಧಿಕ ಒತ್ತಡವಿರುವ ಕೇಂದ್ರ ಬೆಂಗಳೂರಿನ ಅಕ್ಕಿಪೇಟೆ ಮತ್ತು ಚಿಕ್ಕಪೇಟೆಯ ಹಲವು ಪ್ರದೇಶಗಳಲ್ಲಿ ಮಾರ್ಗಸೂಚಿ ದರದಲ್ಲಿ ಅಂತಹ ಬದಲಾವಣೆ ಏನೂ ಆಗಿಲ್ಲ. ಆಯಾ ಉಪನೋಂದಣಾಧಿಕಾರಿಗಳ ಕಚೇರಿಗಳಲ್ಲಿ ಪರಿಷ್ಕೃತ ಮಾರ್ಗಸೂಚಿ ದರದ ವಿವರಗಳು ಲಭ್ಯವಾಗಲಿವೆ. ಜೊತೆಗೆ ಕಾವೇರಿ ತಂತ್ರಾಂಶದಲ್ಲೂ ದರಗಳ ದತ್ತಾಂಶಗಳನ್ನು ಅಳವಡಿಸಲಾಗುವುದು ಎಂದು ಇಲಾಖೆ ಮೂಲಗಳು ತಿಳಿಸಿವೆ.

About the author

ಕನ್ನಡ ಟುಡೆ

Leave a Comment