ರಾಜ್ಯ ಸುದ್ದಿ

ಇಂದು ಉತ್ತರ ಕರ್ನಾಟಕ ಪ್ರತ್ಯೇಕ ರಾಜ್ಯ ಧ್ವಜಾರೋಹಣ

ಬಾಗಲಕೋಟ: ಉತ್ತರ ಕರ್ನಾಟಕ ಹೋರಾಟ ಸಮಿತಿ ಈಗಾಗಲೇ ಘೋಷಿಸಿದಂತೆ ಜ.1 ರಂದು ಪ್ರತ್ಯೇಕ ರಾಜ್ಯದ ಧ್ವಜಾರೋಹಣ ನಡೆಸಿ ರಾಜ್ಯೋತ್ಸವ ಆಚರಿಸಲಿದೆಯೇ ಎಂಬ ಪ್ರಶ್ನೆ ಈಗ ಮೂಡಿದೆ. ಬಾಗಲಕೋಟದಲ್ಲಿ ಸೆ.23ರಂದು ಸಭೆ ನಡೆಸಿದ್ದ ಸಮಿತಿ ಐದು ನಿರ್ಣಯ ಕೈಗೊಂಡು ಜ.1ರಂದು ಉತ್ತರ ಕರ್ನಾಟಕ ರಾಜ್ಯದ ರಾಜ್ಯೋತ್ಸವ, ಧ್ವಜಾರೋಹಣ ನಡೆಸುವುದಾಗಿ ಘೋಷಿಸಿತ್ತು. ಜ.1ರಂದು ಹೊಸ ರಾಜ್ಯದ ರಾಜ್ಯೋತ್ಸವ ಆಚರಿಸಬೇಕಿದ್ದು, ಈ ಬಗ್ಗೆ ಸಮಿತಿ ಸ್ಪಷ್ಟ ನಿರ್ಧಾರ ತಳೆದಿಲ್ಲ.

ಈ ಮಧ್ಯೆ ಧ್ವಜಾರೋಹಣದ ವಿಷಯವನ್ನು ಗೌಪ್ಯವಾಗಿಟ್ಟು ಒಮ್ಮೆಲೇ ಧ್ವಜಾರೋಹಣ ನಡೆಸುವ ಸಾಧ್ಯತೆ ಅಲ್ಲಗಳೆಯುವಂತಿಲ್ಲ. ಇತ್ತೀಚೆಗೆ ಬೆಳಗಾವಿ ಅಧಿವೇಶನದಲ್ಲೂ ಪ್ರತ್ಯೇಕ ರಾಜ್ಯದ ಮಾನ್ಯತೆಗಾಗಿ ಸಮಿತಿ ಸದಸ್ಯರು ಹೋರಾಟ ನಡೆಸಿದ್ದರು. ಅಧಿವೇಶನದ ಸಂದರ್ಭದಲ್ಲಿ ಪ್ರತ್ಯೇಕ ರಾಜ್ಯದ ಧ್ವಜ ಪ್ರದರ್ಶಿಸಲಾಗಿತ್ತು. ಬಾಗಲಕೋಟಕ್ಕೆ ಆಗಮಿಸಿದ್ದ ಸಿಎಂ ಕುಮಾರಸ್ವಾಮಿಯವರಿಗೆ ಸದಸ್ಯರು ಮನವಿ ಸಲ್ಲಿಸಿ ಪ್ರತ್ಯೇಕ ರಾಜ್ಯಕ್ಕಾಗಿ ಕೇಂದ್ರ ಸರಕಾರಕ್ಕೆ ಶಿಫಾರಸ್ಸು ಮಾಡುವಂತೆ ಒತ್ತಾಯಿಸಿದ್ದರು. ಇದೀಗ ಹೊಸ ವರ್ಷದ ಮೊದಲ ದಿನ ಪ್ರತ್ಯೇಕ ರಾಜ್ಯದ ಧ್ವಜಾರೋಹಣ ನಡೆಯಲಿದೆಯೇ ಎಂಬ ಕುತೂಹಲ ಮೂಡಿದೆ. ಈ ಬಗ್ಗೆ ಸಮಿತಿ ಸದಸ್ಯರು ಯಾವುದೇ ನಿರ್ಧಾರವನ್ನು ಸ್ಪಷ್ಟಪಡಿಸಿಲ್ಲ.

13 ಜಿಲ್ಲೆಗಳ ರಾಜ್ಯ 

ಉತ್ತರ ಕರ್ನಾಟಕ ಪ್ರತ್ಯೇಕ ರಾಜ್ಯವಾಗಬೇಕು ಎಂಬ ಹೋರಾಟ ತೀವ್ರಗೊಂಡು ಸೆ.23, 2018 ರಂದು ಬಾಗಲಕೋಟದಲ್ಲಿ ಸಭೆ ನಡೆಸಲಾಗಿತ್ತು. ಈ ಸಭೆಯಲ್ಲಿ 13 ಜಿಲ್ಲೆಗಳನ್ನೊಳಗೊಂಡ ಉತ್ತರ ಕರ್ನಾಟಕ ರಾಜ್ಯದ ಸ್ಥಾಪನೆಗೆ ಸರ್ವಾನುಮತ ನಿರ್ಣಯ ಕೈಗೊಳ್ಳಲಾಗಿತ್ತು. ಮೂರು ವಿನ್ಯಾಸಗಳ ಪೈಕಿ ಪ್ರತ್ಯೇಕ ರಾಜ್ಯದ ಧ್ವಜದ ವಿನ್ಯಾಸವೊಂದಕ್ಕೆ ಅಂಗೀಕಾರ ನೀಡಲಾಯಿತು. ಸಭೆಯಲ್ಲಿ ಭಾಗವಹಿಸಿದವರಿಂದ ಅಭಿಪ್ರಾಯ ಸಂಗ್ರಹಿಸಿ ಉತ್ತರ ಕರ್ನಾಟಕಕ್ಕೆ ಬಾಗಲಕೋಟ ರಾಜಧಾನಿಯಾಗಬೇಕು, ಹೊಸ ರಾಜ್ಯದ ಹೆಸರು ಉತ್ತರ ಕರ್ನಾಟಕ ಎಂದಿರಬೇಕು ಎಂಬ ಅಭಿಪ್ರಾಯ ಮೂಡಿಬಂದಿತು.

ಪ್ರತ್ಯೇಕ ನಿರ್ಣಯ 

* ಜ.1ರಂದು ರಾಜ್ಯೋತ್ಸವ

* ಕೆಂಪು, ಹಳದಿ ಹಾಗೂ ನೀಲಿ ಬಣ್ಣದ ಧ್ವಜಗಳ ಮಧ್ಯೆ ಉಕ ನಕ್ಷೆಯಿರುವ ಪ್ರತ್ಯೇಕ ಧ್ವಜ

* ಉತ್ತರ ಕರ್ನಾಟಕ ಹೊಸ ರಾಜ್ಯದ ಹೆಸರು

* ಬೀದರ್‌, ಕಲಬುರಗಿ, ಯಾದಗಿರಿ, ರಾಯಚೂರು, ಕೊಪ್ಪಳ, ಬಳ್ಳಾರಿ, ವಿಜಯಪುರ, ಬಾಗಲಕೋಟ, ಬೆಳಗಾವಿ, ಗದಗ, ಧಾರವಾಡ, ಉತ್ತರ ಕನ್ನಡ, ಹಾವೇರಿ ನೂತನ ರಾಜ್ಯದ ಜಿಲ್ಲೆಗಳು

About the author

ಕನ್ನಡ ಟುಡೆ

Leave a Comment