ರಾಜ್ಯ ಸುದ್ದಿ

ಉಗ್ರರು ದೇಶದ ಒಳಗೂ ಇದ್ದಾರೆ: ಕೇಂದ್ರ ಸಚಿವೆ ನಿರ್ಮಲಾ ಸೀತಾರಾಮನ್‌

ಮೈಸೂರು: ಪಾಕಿಸ್ತಾನವು ಭಾರತದ ಜನರಲ್ಲಿ ಭಯ ಹುಟ್ಟಿಸುವ ಹಾಗೂ ಸರ್ವನಾಶ ಮಾಡುವ ಧೋರಣೆ ಹೊಂದಿದೆ. ನಮ್ಮೊಂದಿಗೆ ನೇರವಾಗಿ ಯುದ್ಧ ಮಾಡದೆ ದಾಳಿ ಮಾಡುವ ಮನಸ್ಥಿತಿಯನ್ನು ಉಗ್ರರಿಗೆ ತುಂಬಿ ಭಾರತ ದೇಶಕ್ಕೆ ಕಳುಹಿಸುತ್ತಿದೆ ಎಂದು ರಕ್ಷ ಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಆರೋಪಿಸಿದರು.

ಮೈಸೂರಿನಲ್ಲಿ ಮಂಥನ ಸಂಸ್ಥೆಯು ಬುಧವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಕೇಂದ್ರ ಗುಪ್ತಚರ ಇಲಾಖೆಯ ನಿವೃತ್ತ ಅಧಿಕಾರಿ ಆರ್‌.ಎನ್‌.ಕುಲಕರ್ಣಿ ಅವರ ಫ್ಯಾಕ್ಟ್ಸ್ ಆಫ್‌ ಟೆರರಿಸಮ್‌ ಇನ್‌ ಇಂಡಿಯಾ’ ಕೃತಿ ಬಿಡುಗಡೆಗೊಳಿಸಿ ಮಾತನಾಡಿದರು. ಈ ವಿಶೇಷ ಮನಸ್ಥಿತಿಯ ವ್ಯಕ್ತಿಗಳನ್ನು ಮಟ್ಟಹಾಕುವುದು ಸರಳ ಕಾರ್ಯಾಚರಣೆಗಳಿಂದ ಸಾಧ್ಯವಿಲ್ಲ. ಅದಕ್ಕಾಗಿ ಸಾಕಷ್ಟು ಸಿದ್ಧತೆ ಕೈಗೊಂಡು ದಾಳಿ ನಡೆಸಬೇಕಾಗುತ್ತದೆ. ಉಗ್ರರು ಗಡಿಯಾಚೆ ಮಾತ್ರವಲ್ಲದೆ ದೇಶದ ಒಳಭಾಗದಲ್ಲಿಯೂ ಇದ್ದಾರೆ. ಈ ಜಾಲ ಬೆಂಗಳೂರಿನವರೆಗೂ ವ್ಯಾಪಿಸಿದೆ. ಆದರೆ, ಇವರನ್ನು ಎದುರಿಸಲು ನಮ್ಮ ಸೈನಿಕರು ಸಮರ್ಥರಾಗಿದ್ದಾರೆ” ಎಂದರು.

”ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ವಿಶ್ವಾದ್ಯಂತ ಕೈಗೊಂಡ ಪ್ರವಾಸದಿಂದಾಗಿ ಬೇರೆ ದೇಶಗಳೊಂದಿಗೆ ನಮ್ಮ ಸಂಬಂಧ ಉತ್ತಮವಾಗಿದೆ. 2014ರ ಬಳಿಕ ವಿದೇಶಿ ಸಂಬಂಧಗಳು ಬಲಗೊಳ್ಳಲು ಇದೇ ಕಾರಣ. ಪಾಕಿಸ್ತಾನ ನೆಲದ ಮೇಲೆ ಭಾರತ ನಡೆಸಿದ ವೈಮಾನಿಕ ದಾಳಿಯನ್ನು ಎಲ್ಲಾ ರಾಷ್ಟ್ರಗಳು ಬೆಂಬಲಿಸಿವೆ. ಈ ಬೆಳವಣಿಗೆಯು ಭಾರತವು ಇತರ ದೇಶಗೊಂದಿಗೆ ಹೊಂದಿರುವ ಸಂಬಂಧಗಳು ಸುಧಾರಿಸಿದೆ ಎಂಬುದರ ಸೂಚಕ” ಎಂದರು.

”ಸಾಮಾಜಿಕ ಜಾಲತಾಣಗಳು, ಮುಂದುವರಿದ ವಿಜ್ಞಾನ ಮತ್ತು ತಂತ್ರಜ್ಞಾನಗಳು ಭಯೋತ್ಪಾದನೆಯ ವೇಗವನ್ನು ಹೆಚ್ಚಿಸಿವೆ. ಆದರೆ ನಮ್ಮ ದೇಶದ ಯುವಕರು ಈ ಕೂಪಕ್ಕೆ ಒಳಗಾಗುತ್ತಿಲ್ಲ” ಎಂದರು. ವಾಕ್‌ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಮನಬಂದಂತೆ ಬಳಸಿಕೊಳ್ಳಬಾರದು. ಕೆಲ ಮಾಧ್ಯಮಗಳು ಪಾಕಿಸ್ತಾನದ ವಿರುದ್ಧ 300 ಜನರನ್ನು ಕೊಂದಿದ್ದಕ್ಕೆ ಸಾಕ್ಷಿ ಕೇಳುತ್ತಿವೆ. ಇದು ಸಾಕ್ಷಿ ಕೇಳುವ ಸಂದರ್ಭವಲ್ಲ. ವಾಯು ದಾಳಿಯ ಮೂಲಕ ನೀಡಬೇಕಾದ ಸಂದೇಶವನ್ನು ನೀಡಲಾಗಿದೆ” ಎಂದರು. ಡಾ.ಸುಧೀಂದ್ರ ಹನುಮಂತರಾವ್‌, ಕೃತಿಕಾರ ಆರ್‌.ಎನ್‌.ಕುಲಕರ್ಣಿ ಇದ್ದರು.

About the author

ಕನ್ನಡ ಟುಡೆ

Leave a Comment