ರಾಜಕೀಯ

ಉಪ ಕದನದ ನಂತರ ರಾಜ್ಯ ಸರಕಾರ ಪತನ: ಬಿ.ಎಸ್‌.ಯಡಿಯೂರಪ್ಪ

ಸಂಡೂರು: ಚುನಾವಣೆ ನಂತರ ಸಮ್ಮಿಶ್ರ ಸರಕಾರದ ಪಾಲುದಾರರಾದ ಕಾಂಗ್ರೆಸ್‌ ಮತ್ತು ಜೆಡಿಎಸ್‌ನವರು ಹಾದಿ ಬೀದಿಯಲ್ಲಿ ಕಿತ್ತಾಡಿಕೊಳ್ಳುತ್ತಾರೆ. ಇದರಿಂದ ಸರಕಾರ ಪತನವಾಗುವುದು ಖಚಿತ. ನ.6 ರ ನಂತರದ ರಾಜಕೀಯ ಬೆಳವಣಿಗೆಯನ್ನು ಕಾದು ನೋಡಿ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ ಮಾರ್ಮಿಕವಾಗಿ ಹೇಳಿದ್ದಾರೆ.

ಪಟ್ಟಣದ ತಹಸಿಲ್‌ ಕಚೇರಿ ಮುಂದಿನ ಬಯಲಿನಲ್ಲಿ ಬಿಜೆಪಿ ಆಯೋಜಿಸಿದ್ದ ಬಹಿರಂಗ ಸಭೆಯನ್ನು ಉದ್ಘಾಟಿಸಿ ಶನಿವಾರ ಮಾತನಾಡಿದರು. ಲೋಕಸಭೆ ಮರು ಚುನಾವಣೆಯಲ್ಲಿ ಶಿವಮೊಗ್ಗದಲ್ಲಿ 3.65 ಲಕ್ಷ ಕ್ಕೂ ಅಧಿಕ ಮತ. ಬಳ್ಳಾರಿಯಲ್ಲಿ ಒಂದು ಲಕ್ಷ ಕ್ಕೂ ಅಧಿಕ ಮತದಿಂದ ಬಿಜೆಪಿ ಗೆಲುವು ಸಾಧಿಸಲಿದೆ. ಮಂಡ್ಯದಲ್ಲಿ ಅಚ್ಚರಿಯ ಫಲಿತಾಂಶ ಕಾದಿದೆ. ಮರು ಚುನಾವಣೆಯ ಮೊದಲ ವಿಜಯೋತ್ಸವ ಬಳ್ಳಾರಿಯಲ್ಲಿ ಆಚರಿಸಿ, ನಂತರ ಶಿವಮೊಗ್ಗದಲ್ಲಿ ಆಚರಿಸಲಾಗುವುದು ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಡಿಕೆಶಿ ಹೆಸರು ಬಿಡಿ, ಅವರು ನಮ್ಮವರು: ಜಿಲ್ಲಾ ಮಂತ್ರಿ ಡಿ.ಕೆ.ಶಿವಕುಮಾರ್‌, ನಮ್ಮ ಪರವಾಗಿದ್ದಾರೆ. ಬಿಜೆಪಿಯ ಶಾಂತಾರನ್ನು ಗೆಲ್ಲಿಸುವ ಸಲುವಾಗಿ ಬಳ್ಳಾರಿಗೆ ಬಂದಿದ್ದಾರೆ. ಇಂದಿನಿಂದ ಚುನಾವಣೆ ಭಾಷಣದಲ್ಲಿ ಡಿಕೆಶಿ ಹೆಸರು ಪ್ರಸ್ತಾಪ ಮಾಡುವುದನ್ನು ಬಿಟ್ಟುಬಿಡಿ. ಅವರ ಬಳಿ ಹಣ ಜಾಸ್ತಿಯಿದೆ ಎಂದು ಕಾಂಗ್ರಸಿಗರು ಇಲ್ಲಿಗೆ ಕಳಿಸಿದ್ದಾರಾದರೂ ಡಿಕೆಶಿ ನಮ್ಮವರು ಎಂದ ಬಿಎಸ್‌ವೈ , ಕೆಲ ಕ್ಷಣ ಕಾರ್ಯಕರ್ತರಲ್ಲಿ ಅಚ್ಚರಿ ಮೂಡಿಸಿದರು. ನಾನು ಸಿಎಂ ಇದ್ದಾಗ ವಾರ್ಷಿಕ 3 ಲಕ್ಷ ಹೆಣ್ಣು ಮಕ್ಕಳಿಗೆ ಭಾಗ್ಯಲಕ್ಷ್ಮಿ ಬಾಂಡ್‌ ವಿತರಿಸಿದ್ದೆ, ಸಮ್ಮಿಶ್ರ ಸರಕಾರ ಅಧಿಕಾರಕ್ಕೆ ಬಂದಾಗಿನಿಂದ 100 ಬಾಂಡ್‌ ವಿತರಿಸಲು ಸಾಧ್ಯವಾಗಿಲ್ಲ ಎಂದು ಕಿಡಿಕಾರಿದರು. ಬೆಂಗಳೂರಿನ ಹಜ್‌ ಭವನ ಅಭಿವೃದ್ಧಿಗೆ 40 ಕೋಟಿ ರೂ., ಕನಕ ಪೀಠದ ಅಭಿವೃದ್ಧಿಗೆ 40 ಕೋಟಿ ರೂ. ಅನುದಾನ ನೀಡಿದ್ದೆ. ಕನಕ, ವಾಲ್ಮೀಕಿ ಜಯಂತ್ಯುತ್ಸವವನ್ನು ಘೋಷಣೆ ಮಾಡಿದೆ. ರೈತರ ಪಂಪ್‌ ಸೆಟ್‌ಗೆ ಉಚಿತ ವಿದ್ಯುತ್‌, ಕೃಷಿ ಬಜೆಟ್‌, ಕೃಷಿಕರಿಗೆ ಸಹಾಯಧನ, ಸುವರ್ಣ ಗ್ರಾಮ, ಸುವರ್ಣ ಭೂಮಿ ಕಾರ್ಯಕ್ರಮ ಜಾರಿ ಮಾಡಿದ್ದೆ ಎಂಬುದನ್ನು ರಾಜ್ಯದ ಜನ ಮರೆತಿಲ್ಲ ಎಂದರು.

ಸರಕಾರ ದಿವಾಳಿ: ರಾಜ್ಯದ 2.25 ಲಕ್ಷ ಕೋಟಿ ರೂ.ಬಜೆಟ್‌ನಲ್ಲಿ ಕಳೆದ 5 ತಿಂಗಳಿಂದ ಯಾವ ಜಿಲ್ಲೆಗೂ ನಯಾ ಪೈಸೆ ನೀಡಿಲ್ಲ. ಪಿಡಬ್ಲ್ಯುಡಿ, ನೀರಾವರಿ ಇಲಾಖೆಯ 10 ಸಾವಿರ ಕೋಟಿ ರೂ.ಬಿಲ್‌ ಬಾಕಿಯಿದ್ದು, ಸರಕಾರ ದಿವಾಳಿ ಎದ್ದಿದೆ ಎಂದು ಟೀಕಿಸಿದರು. ಇತ್ತೀಚೆಗೆ ನಡೆದ ವಿಧಾನ ಸಭೆ ಚುನಾವಣೆಯಲ್ಲಿ ಚಾಮುಂಡಿ ಕ್ಷೇತ್ರದಲ್ಲಿ ಶನಿ, ರಾಹು, ಕೇತು ತಮ್ಮನ್ನು ಸೋಲಿಸಿದವು ಎಂದು (ದೇವೇಗೌಡ, ಕುಮಾರಸ್ವಾಮಿ, ರೇವಣ್ಣ ) ತೆಗಳಿದ್ದ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಇದೀಗ ಅಂಥವರ ಹೆಗಲ ಮೇಲೆ ಕೈಹಾಕಿಕೊಂಡು ಓಡಾಡುತ್ತಿದ್ದಾರೆ. ಉಗ್ರಪ್ಪ ಎಂತಹವರಿಂದ ಗೊತ್ತಿದ್ದರಿಂದ ಬಳ್ಳಾರಿಯಲ್ಲಿ ಪ್ರಚಾರಕ್ಕೆ ದೇವೇಗೌಡ, ಕುಮಾರಸ್ವಾಮಿ ಆಗಮಿಸಿಲ್ಲ ಎಂದರು. ವಾಲ್ಮೀಕಿ ಜನಾಂಗದ ಮುಖಂಡ ಶ್ರೀರಾಮುಲುರನ್ನು 420 ಎಂದು ನಿಂದಿಸಿದ ಕಾಂಗ್ರೆಸ್‌ ಮುಖಂಡರಿಗೆ ಬುದ್ಧಿ ಕಲಿಸುವ ಸಲುವಾಗಿ ವಾಲ್ಮೀಕಿ ಜನಾಂಗದ ಪ್ರತಿ ಮತವೂ ಶಾಂತಾರಿಗೆ ಬೀಳಬೇಕು ಎಂದು ಮನವಿ ಮಾಡಿದರು.

ಬಳ್ಳಾರಿ ಮಗಳು: ಬಿಜೆಪಿ ಅಭ್ಯರ್ಥಿ ಜೆ.ಶಾಂತಾ ಮಾತನಾಡಿ, ನಾನು ಇಟಲಿಯಿಂದ ಬಂದಿಲ್ಲ, ಬಣ್ಣದ ಮಾತು ನಮಗೆ ಗೊತ್ತಿಲ್ಲ, ಬಳ್ಳಾರಿಯ ಮನೆ ಮಗಳು ಎಂದು ಜನಕ್ಕೆ ಗೊತ್ತಿದೆ ಎಂದರು. ಶಾಸಕ ವಿ.ಸೋಮಣ್ಣ ಮಾತನಾಡಿ, ನ.15 ರಿಂದ 20 ರೊಳಗೆ ಯಡಿಯೂರಪ್ಪ ಸಿಎಂ ಆಗುತ್ತಾರೆ ಎಂದರು. ಕೇಂದ್ರ ಸಚಿವ ರಮೇಶ ಜಿಗಜಿಣಗಿ ಮಾತನಾಡಿ, ಬಿಜೆಪಿ ಪ್ರ.ಕಾರ್ಯದರ್ಶಿ ಸಿ.ಟಿ.ರವಿ, ಬಿಜೆಪಿ ರಾಜ್ಯ ಪ್ರ.ಕಾರ್ಯದರ್ಶಿ ರವಿಕುಮಾರ್‌, ಎಂಎಲ್‌ಸಿ ತೇಜಶ್ವಿನಿ ರಮೇಶ, ಸಂಸದ ಸಂಗಣ್ಣ ಕರಡಿ ಮಾತನಾಡಿದರು. ಶಾಸಕ ಚಂದ್ರಪ್ಪ, ವೆಂಕಟರೆಡ್ಡಿ ಮುದ್ನಾಳ, ಅರವಿಂದ ಬೆಲ್ಲದ, ಶಿವರಾಜ್‌ ಪಾಟೀಲ್‌, ಮಾಜಿ ಎಂಎಲ್‌ಸಿ ಮೃತ್ಯಂಜಯ ಜಿನಗಾ, ಜಿ.ಪಂ.ಅಧ್ಯಕ್ಷೆ ಭಾರತಿ ತಿಮ್ಮನಗೌಡ, ಮುಖಂಡರಾದ ಮಾಲೀಕಯ್ಯ ಗುತ್ತೇದಾರ್‌, ದೊಡ್ಡನಗೌಡ ಪಾಟೀಲ್‌, ಬಿಜೆಪಿ ಜಿಲ್ಲಾ ಅಧ್ಯಕ್ಷ ಪಿ.ಚನ್ನಬಸವನಗೌಡ, ಚಿತ್ರನಟ ಬಂಗಾರು ಹನುಮಂತು, ಬುಲೆಟ್‌ ಪ್ರಕಾಶ ಇತರರಿದ್ದರು. ಬಿಜೆಪಿ ತಾಲೂಕು ಅಧ್ಯಕ್ಷ ಜಿ.ಟಿ.ಪಂಪಾಪತಿ, ಪುರಸಭೆ ಸದಸ್ಯ ನರೇಂದ್ರ ಪಾಟೀಲ್‌, ಮುಖಂಡ ಡಿ.ರಾಘವೇಂದ್ರ ನಿರ್ವಹಿಸಿದರು.

ಸಂವಿಧಾನ ಗೊತ್ತು, ಸೆಕ್ಷನ್‌ ಗೊತ್ತಿಲ್ಲ: ಬಿ.ಶ್ರೀರಾಮುಲು 
ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಶ್ರೀರಾಮುಲು ಮಾತನಾಡಿ, ವಾಲ್ಮೀಕಿ ಜನಾಂಗದವನಾದ ನನಗೆ 420 ಎನ್ನುವ ಅಸಂಸದೀಯ ಪದ ಬಳಸಿದ್ದಾರೆ. ಹೌದು. ನಮಗೆ ಅಂಬೇಡ್ಕರ್‌ ಬರೆದ ಸಂವಿಧಾನ ಗೊತ್ತೇ ಹೊರತು, ಸೆಕ್ಷ ನ್‌ಗಳು ಗೊತ್ತಿಲ್ಲ ಎಂದು ಮತ್ತೆ ಸಿದ್ದರಾಮಯ್ಯ ವಿರುದ್ಧ ಹರಿಹಾಯ್ದರು. ಸಮೀಕ್ಷೆಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ಸೋಲುತ್ತಾರೆಂದು ಗೊತ್ತಾದ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ನ 78 ಶಾಸಕರಲ್ಲಿ 60 ಶಾಸಕರು ಬಳ್ಳಾರಿಗೆ ಬಂದಿದ್ದಾರೆ. ಡಿಕೆಶಿ ಹಣ ನೋಟಿನ ಕಟ್ಟು ಎಸೆಯುತ್ತಿದ್ದಾರೆ. ನಾವೇನು ಹಣ ನೋಡಿಲ್ಲವೇ? ಬಳ್ಳಾರಿಯ ಮಣ್ಣಿನ ಚಿನ್ನವಿದೆ. ಡಿಕೆಶಿಯಂತ ನೂರು ಮಂದಿಯನ್ನು ನೋಡಿದ್ದೇವೆ ಎಂದು ರಾಮುಲು ಕಿಡಿಕಾರಿದರು.

About the author

ಕನ್ನಡ ಟುಡೆ

Leave a Comment