ರಾಷ್ಟ್ರ ಸುದ್ದಿ

ಕಮಲ ತೊರೆದು, ಪ್ರಿಯಾಂಕಾ ಗಾಂಧಿ ಕೈ ಹಿಡಿಯುತ್ತಾರಾ ವರುಣ್ ಗಾಂಧಿ

ಹೊಸದಿಲ್ಲಿ: ಪ್ರಿಯಾಂಕಾ ಗಾಂಧಿ ವಾದ್ರಾ ಸಕ್ರಿಯ ರಾಜಕಾರಣಕ್ಕಿಳಿಯುತ್ತಿದ್ದಂತೆ ಅವರ ಚಿಕ್ಕಪ್ಪ ಸಂಜಯ್ ಗಾಂಧಿ ಮಗ, ವರುಣ್ ಗಾಂಧಿ ಕಾಂಗ್ರೆಸ್ ಸೇರುತ್ತಾರೆಂಬ ವದಂತಿಗೆ ರೆಕ್ಕೆ ಪುಕ್ಕ ಮೂಡಿವೆ.  ಬಿಜೆಪಿ ಸಂಸದ, ನೆಹರು- ಗಾಂಧಿ ಕುಟುಂಬದ ಕುಡಿ ವರುಣ್ ಗಾಂಧಿ ಸದ್ಯ ತಮ್ಮ ರಾಜಕೀಯ ಜೀವನದ ಕಷ್ಟಕರ ದಿನಗಳಲ್ಲಿದ್ದಾರೆ. ಬಿಜೆಪಿಯಲ್ಲಿ ವಿಶೇಷ ಮಹತ್ವ ಸಿಗದ ಹಿನ್ನೆಲೆಯಲ್ಲಿ ವರುಣ್ ಕಾಂಗ್ರೆಸ್ ಸೇರುತ್ತಾರೆ ಎಂಬ ಸುದ್ದಿ ಕೂಡ ಇತ್ತೀಚಿಗೆ ಹರಿದಾಡುತ್ತಲೇ ಇದ್ದವು. ಇಂತಹ ವದಂತಿಯನ್ನು ತಳ್ಳಿ ಹಾಕಿದ್ದ ವರುಣ್ ತನಗೂ ಮತ್ತು ತಾಯಿ ಮೇನಕಾಗೂ ಬಿಜೆಪಿಯಲ್ಲಿ ಸಾಕಷ್ಟು ಗೌರವ, ಬೆಲೆ ಸಿಗುತ್ತದೆ ಎಂದು ಹೇಳಿದ್ದರು.

ಆದರು ಕೂಡ ವರುಣ್ ಕೈ ಹಿಡಿಯುತ್ತಾರೆ ಎಂಬ ಸುದ್ದಿ ಆಗಾಗ ಹರಿದಾಡುತ್ತಲೇ ಇರುತ್ತದೆ. ರಾಹುಲ್ ಕಾಂಗ್ರೆಸ್ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದ್ದಾಗ ಸಹ ವರುಣ್ ಕಾಂಗ್ರೆಸ್ ಸೇರುತ್ತಾರೆ ಎಂಬ ಸುದ್ದಿ ಹರಿದಾಡಿತ್ತು. ಆದರೆ ಅದು ಸತ್ಯವಾಗಲಿಲ್ಲ. ಆದರೆ ಈ ಸುದ್ದಿಗೀಗ ಹೆಚ್ಚು ಒತ್ತು ಸಿಗುತ್ತಿದೆ. ಅದಕ್ಕೆ ಕಾರಣ ಅವರ ಜತೆ ಉತ್ತಮ ನಂಟು ಹೊಂದಿರುವ ಅಕ್ಕ ಪ್ರಿಯಾಂಕಾ ರಾಜಕೀಯಕ್ಕಿಳಿದುರುವುದು ಮತ್ತು ಬಿಜೆಪಿಯಲ್ಲಿ ವರುಣ್ ಮೂಲೆಗುಂಪಂತಾಗಿರುವುದು.

ವರುಣ್ ಬಗ್ಗೆ ಇದೆ ಅಸಮಾಧಾನ
 : ಪಕ್ಷದ ಇತಿಹಾಸದಲ್ಲಿ ಮೊದಲ ಬಾರಿಗೆ ಅತಿ ಚಿಕ್ಕ ವಯಸ್ಸಿನ ಪ್ರಧಾನ ಕಾರ್ಯದರ್ಶಿಯಾಗಿದ್ದರು ವರುಣ್ (2013). 29ನೇ ವರ್ಷಕ್ಕೆ ಪಕ್ಷದ ಕಾರ್ಯದರ್ಶಿಯಾದರು. 31ಕ್ಕೆ ಪ್ರಧಾನ ಕಾರ್ಯದರ್ಶಿ ಪದವಿಗೆ ಏರಿದರು. ಪಶ್ಚಿಮ ಬಂಗಾಳ ಹಾಗೂ ಅಸ್ಸಾಂಗಳಲ್ಲಿ ಚುನಾವಣಾ ಉಸ್ತುವಾರಿ ಜವಾಬ್ದಾರಿಯನ್ನು ಸಹ ಅವರು ಹೊತ್ತಿದ್ದರು. ಆದರೆ 2014ರ ಲೋಕ ಸಭಾ ಚುನಾವಣೆ ಬಳಿಕ ಅವರಿಂದ ಒಂದೊಂದಾಗಿ ಜವಾಬ್ದಾರಿಯನ್ನು ಹಿಂಪಡೆಯಲಾಯಿತು. ರೋಹಿಂಗ್ಯಾ ಮುಸ್ಲಿಮರ ಪರ ಮಾತನಾಡಿದ್ದಕ್ಕೆ ಮತ್ತು ಸಂಸದರ ವೇತನ ಏರಿಕೆ ಪ್ರಸ್ತಾವ ವಿರೋಧಿಸಿದಾಗ, ಪ್ರಧಾನಿ ಕಚೇರಿಯಿಂದ ಅವರಿಗೆ , ನಮ್ಮ ತೊಂದರೆಗಳನ್ನು ಮತ್ತಷ್ಟು ಏಕೆ ಹೆಚ್ಚಿಸುತ್ತೀರಿ ಎಂದು ಪ್ರಶ್ನಿಸಲಾಗಿತ್ತು.

ಸೋನಿಯಾ, ರಾಹುಲ್ ಮತ್ತು ಅಕ್ಕ ಪ್ರಿಯಾಂಕಾ ವಿರುದ್ಧ ಒಂದೇ ಒಂದು ಮಾತನಾಡುವುದಿಲ್ಲ ಎಂಬ ನಿಲುವಿಗೆ ವರುಣ್ ಬದ್ಧರಾಗಿದ್ದು , ಗಾಂಧಿ – ನೆಹರು ಪರಿವಾರದ ವಿರುದ್ಧ ಮಾತನಾಡದಿದ್ದರೆ ಅವರಿಂದ ಬಿಜೆಪಿಗೆ ಯಾವ ಉಪಯೋಗವಿಲ್ಲ ಎನ್ನಲಾಗುತ್ತದೆ.

ಪ್ರಿಯಾಂಕಾ ಜತೆ ಉತ್ತಮ ಬಾಂಧವ್ಯ
 : ಪ್ರಿಯಾಂಕಾ- ವರುಣ್ ಬಾಂಧವ್ಯ ತುಂಬ ಚೆನ್ನಾಗಿರುವುದು ಎಲ್ಲರಿಗೂ ಗೊತ್ತಿರುವ ಸತ್ಯ. ಹೀಗಾಗಿ ಪ್ರಿಯಾಂಕಾ ಸಕ್ರಿಯ ರಾಜಕಾರಣಕ್ಕೆ ಪ್ರವೇಶಿಸುತ್ತಿದ್ದಂತೆ ಅವರು ಕಾಂಗ್ರೆಸ್ ಸೇರುತ್ತಾರೆ ಎಂಬ ಗಾಳಿ ಸುದ್ದಿಗೆ ಪುಷ್ಟಿ ದೊರೆತಿದೆ. ಅವರು ಕೈ ಹಿಡಿಯುತ್ತಾರೋ, ಕಮಲದಲ್ಲೇ ಇದ್ದು ಅರಳುತ್ತಾರೋ ಎಂಬುವುದು ಏನೇ ಇರಲಿ . ಆದರೆ ಬಂದ ಪುಟ್ಟ, ಹೋದ ಪುಟ್ಟ, ಪುಟ್ಟನ ಹೆಜ್ಜೆ ಕಾಣಲಿಲ್ಲ ಎಂಬ ಸ್ಥಿತಿಯಲ್ಲಿರಲು ವರುಣ್ ಬಯಸಲಾರರು ಎಂಬುದಂತೂ ಸತ್ಯ .ತಾಯಿಯಿಂದ ತಡೆ : ಆದರೆ, ರಾಜಕೀಯ ವಿಶ್ಲೇಷಕರ ಪ್ರಕಾರ ಒಂದು ವೇಳೆ ರಾಹುಲ್, ಪ್ರಿಯಾಂಕಾ ಹಾಗೂ ವರುಣ್ ಒಂದಾದರೂ ಸೋನಿಯಾ ಹಾಗೂ ಮನೇಕಾ ಗಾಂಧಿ ನಡುವಿನ ಮುಸುಕಿನ ಗುದ್ದಾಟ ಮುಂದುವರೆಯಲಿದೆ. ಮನೇಕಾ ಎಂದಿಗೂ ಮಗನ ಈ ನಡೆಗೆ ಸಮ್ಮತಿ ಸೂಚಿಸುವುದಿಲ್ಲ.

About the author

ಕನ್ನಡ ಟುಡೆ

Leave a Comment