ರಾಜಕೀಯ

ಕುಮಾರಸ್ವಾಮಿ ಮತ್ತು ಡಿಕೆಶಿ ಇಬ್ಬರೂ ಕೊಬ್ಬಿದ ಗೂಳಿಗಳು: ಈಶ್ವರಪ್ಪ

ಬಾಗಲಕೋಟ: ‘ಕುಮಾರಸ್ವಾಮಿ ಮತ್ತು ಡಿಕೆ ಶಿವಕುಮಾರ್ ಇಬ್ಬರು ಗೂಳಿಗಳಾಗಿದ್ದಾರೆ, ಈ ಗೂಳಿಗಳು ಏನು ಮಾಡ್ತವೆ ಅಂತ ಗೂಳಿಗಳಿಗೂ ಗೊತ್ತಿರಲ್ಲ. ಎರಡು ಗೂಳಿಗಳೂ ಶಕ್ತಿಶಾಲಿಯಾಗಿರುತ್ತವೆ. ಕೊಬ್ಬಿದ ಗೂಳಿ ಇನ್ನೊಂದು ಗೂಳಿಯನ್ನು ಸಾಯಿಸುತ್ತದೆ’ ಎಂದು ಬಿಜೆಪಿ ಮುಖಂಡ ಕೆ.ಎಸ್. ಈಶ್ವರಪ್ಪ ಲೇವಡಿ ಮಾಡಿದರು.

ನಗರದಲ್ಲಿ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಎರಡು ಗೂಳಿಗಳು ಒಂದಾಗಿದ್ದು ಯಾವಾಗ ಅಂತ ರಾಜ್ಯದ ಜನ ಗಮನಿಸುತ್ತಿದ್ದಾರೆ. ಚುನಾವಣೆ ಮುಗಿಯುತ್ತಲೇ ಮೈತ್ರಿ ಸಕಾ೯ರ ಬೀಳುತ್ತದೆ ಅನ್ನುವ ಭಯದಿಂದ ಗೂಳಿಗಳು ಒಂದಾಗಿವೆ. ಒಂದಾಗದಿದ್ದರೆ ಒಬ್ಬರಿಗೆ ಸಿಎಂ ಸ್ಥಾನ ಮತ್ತೊಬ್ಬರಿಗೆ ಮಂತ್ರಿ ಸ್ಥಾನ ಹೋಗುತ್ತದೆ ಅನ್ನೋ ಭಯವಿದೆ. ಹಾವು ಮುಂಗುಸಿಯಂತಿದ್ದವರು ಇಂದು ಒಂದಾಗಿದ್ದಾರೆ. ಯಾವುದೇ ಕಾರಣಕ್ಕೂ ಚುನಾವಣೆಯಲ್ಲಿ ಕಾಂಗ್ರೆಸ್ ಜೆಡಿಎಸ್ ಪರಸ್ಪರ ಗೆಲುವಿಗೆ ಶ್ರಮಿಸುವುದಿಲ್ಲ ಎಂದು ಈಶ್ವರಪ್ಪ ಭವಿಷ್ಯ ನುಡಿದರು. ಈಗ ಹೇಗೇಗೂ ಚುನಾವಣೆ ಎದುರಿಸುತ್ತಾರೆ. ಬಳಿಕ ಬಹಿರಂಗವಾಗಿಯೇ ಬಡಿದಾಡ್ತಾರೆ. ಚುನಾವಣೆ ಮುಗಿಯುತ್ತಿದ್ದಂತೆ ಸರಕಾರ ಬಿದ್ದು ಹೋಗುತ್ತದೆ ಎಂದು ಟೀಕಿಸಿದರು.

ಇಬ್ಬರೂ ಧೃತರಾಷ್ಟ್ರರು: ದೇವೇಗೌಡ ಮತ್ತು ಸಿದ್ದರಾಮಯ್ಯ ಇಬ್ಬರೂ ಧೃತರಾಷ್ಟ್ರರು; ಮೇಲ್ನೋಟಕ್ಕೆ ಸ್ನೇಹ ತೋರಿಸುತ್ತಿದ್ದಾರೆ. ಇಬ್ಬರೂ ಧೃತರಾಷ್ಟ್ರರು ಆಲಿಂಗನ ಮಾಡಿಕೊಳ್ತಾರೆ. ಹೀಗಾಗಿ ಎರಡು ಪಕ್ಷಗಳು ನಿರ್ನಾಮ ಆಗುತ್ತವೆ ಎಂದು ಮಾಜಿ ಡಿಸಿಎಂ ಈಶ್ವರಪ್ಪ ಹೇಳಿದರು. ಮಂಡ್ಯಲೋಕಸಭೆ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿ ಸುಮಲತಾ ಅಂಬರೀಷ್ ಗೆದ್ದೇ ಗೆಲ್ಲುತ್ತಾರೆ; ಇದು ಸಿಎಂ ಕುಮಾರಸ್ವಾಮಿಗೂ ಗೊತ್ತಾಗಿದೆ. ಹಾಗಾಗಿ ಆಡಳಿಯವನ್ನು ಸಂಪೂರ್ಣ ದುರುಪಯೋಗ ಮಾಡಿಕೊಳ್ಳುತ್ತಿದ್ದಾರೆ. ತಮ್ಮ ಫೋನ್ ಕದ್ದಾಲಿಕೆ ಮಾಡುತ್ತಿದ್ದಾರೆ ಎಂಬ ಸುಮಲತಾ ಆರೋಪದಲ್ಲಿ ಸತ್ಯಾಂಶವಿದೆ ಎಂದು ಈಶ್ವರಪ್ಪ ನುಡಿದರು.

ಪ್ರಜಾಪ್ರಭುತ್ವದಲ್ಲಿ ಎಲ್ಲರಿಗೂ ಪೂರ್ಣ ಸ್ವಾತಂತ್ರ್ಯವಿದೆ. ಯಾರ ಪರವಾಗಿ ಯಾರಬೇಕಾದರೂ ವೋಟ್ ಕೇಳಬಹುದು. ಸುಮಲತಾ, ದರ್ಶನ,ಯಶ್ ಸೇರಿ ಸುಮಲತಾ ಪರ ಪ್ರಚಾರಕ್ಕೆ ಹೋಗುವವರಿಗೆ ಕೂಡಲೇ ಪೊಲೀಸ್ ರಕ್ಷಣೆ ಒದಗಿಸಬೇಕು ಎಂದು ಈಶ್ವರಪ್ಪ ಆಗ್ರಹಿಸಿದರು. ಸುಮಲತಾ ಅಂಬರೀಷ್ ಗೆಲ್ಲುತ್ತಾರೆ ಎಂಬ ಭೀತಿಯಿಂದಲೇ ಮತಗಳ ವಿಭಜನೆ ಮಾಡಲು 3 ಜನ ಸುಮಲತಾರನ್ನು ಸ್ಫರ್ಧೆಗೆ ಇಳಿಸುವ ಕುತಂತ್ರವನ್ನು ಜೆಡಿಎಸ್ ಅನುಸರಿಸಿದೆ. ಸುಮಲತಾ ಹೆಸರಿನ ಇನ್ನೂ ಎಷ್ಟು ಮಂದಿ ಇದ್ದಾರೆ ಹುಡುಕಲಿ. ಮಂಡ್ಯದಲ್ಲಿ ಸಿಗದಿದ್ದರೆ ಬೇರೆ ಜಿಲ್ಲೆಗಳಿಂದ ನೂರು ಜನ ಸುಮಲತಾರನ್ನು ಕರೆ ತರಲಿ. ಎಷ್ಟೇ ಜನರನ್ನು ನಿಲ್ಲಿಸಿದರೂ ಮಂಡ್ಯದ ಜನ ಜೆಡಿಎಸ್ ಸೋಲಿಸಲು ತೀರ್ಮಾನಿಸಿದ್ದಾರೆ ಎಂದು ಈಶ್ವರಪ್ಪ ನುಡಿದರು.

 

About the author

ಕನ್ನಡ ಟುಡೆ

Leave a Comment