ರಾಷ್ಟ್ರ ಸುದ್ದಿ

ಕೇರಳ ಲವ್ ಜಿಹಾದ್: ಬಿಜೆಪಿ ಸೇರಿದ ಹಾದಿಯಾಳ ತಂದೆ

ತಿರುವನಂತಪುರ: ಲವ್ ಜಿಹಾದ್  ಪ್ರಕರಣದ ಮೂಲಕ ರಾಷ್ಟ್ರಾದ್ಯಂತ ಸುದ್ದಿಯಾಗಿದ್ದ ವೈದ್ಯಕೀಯ ವಿದ್ಯಾರ್ಥಿನಿ ಹಾದಿಯಾ ತಂದೆ ಅಶೋಕನ್ ಅಧಿಕೃತವಾಗಿ ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ.

ಬಿಜೆಪಿ ಸೇರಿದ ಬಳಿಕ ಮಾಧ್ಯಮಗಳೊಂದಿಗೆ ಮಾತನ್ನಾಡುತ್ತಿದ್ದ ಅಶೋಕನ್, ಹಿಂದೂಗಳ ನಂಬಿಕೆಯನ್ನು ರಕ್ಷಿಸಿದ ಏಕೈಕ ಪಕ್ಷವೆಂದರೆ ಅದು ಬಿಜೆಪಿ. ಶಬರಿಮಲೆ ವಿವಾದಕ್ಕೆ ಸಂಬಂಧಿಸಿದಂತೆ ವಿರೋಧ ವ್ಯಕ್ತಪಡಿಸಿ ಪಕ್ಷ ನಡೆಸುತ್ತಿರುವ ಹೋರಾಟಕ್ಕೆ ತಮ್ಮ ಬೆಂಬಲವಿರುವುದಾಗಿ ಹೇಳಿದ್ದಾರೆ. ಇದಕ್ಕೂ ಮೊದಲು ನಾನು ಕಮ್ಯುನಿಸ್ಟ್ ಆಗಿದ್ದೆ. ಆದರೆ ಆ ಪಕ್ಷದ ಕೊಳಕು ಮತ ಬ್ಯಾಂಕ್ ರಾಜಕಾರಣದಿಂದ ಬೇಸತ್ತು ಹೊರಬಂದೆ. ನಾನು ಕಳೆದ 3 ವರ್ಷಗಳ ಹಿಂದೆಯೇ ಬಿಜೆಪಿ ಸೇರಿದ್ದೆ. ಆದರೆ ಅಧಿಕೃತವಾಗಿ ಸದಸ್ಯತ್ವ ಪಡೆದುಕೊಂಡಿದ್ದು ಭಾನುವಾರ ಎಂದಿದ್ದಾರೆ ಅಶೋಕನ್.

ಅಶೋಕನ್ ಪುತ್ರಿ ಅಖಿಲಾ ಅಶೋಕನ್ ಶಫೀನ್ ಜಹಾನ್ ಎಂಬ ಮುಸ್ಲಿಂ ವ್ಯಕ್ತಿಯನ್ನು ಪ್ರೀತಿಸಿ ಮುಸ್ಲಿಂ ಧರ್ಮಕ್ಕೆ ಮತಾಂತರವಾಗಿ ಆತನನ್ನು ಮದುವೆಯಾಗಿದ್ದರು. ವಿವಾಹದ ಬಳಿಕ ಆಕೆ ಹಾದಿಯಾ ಎಂದು ಹೆಸರು ಬದಲಿಸಿಕೊಂಡಿದ್ದಳು. ಈ ಮತಾಂತರ ಮತ್ತು ವಿವಾಹವನ್ನು ವಿರೋಧಿಸಿದ್ದ ಅಶೋಕನ್, ಇದೊಂದು ಲವ್ ಜಿಹಾದ್ ಪ್ರಕರಣ. ಉಗ್ರ ಸಂಘಟನೆ ಜತೆ ಸಂಪರ್ಕ ಹೊಂದಿರುವ ಕೆಲ ಗುಂಪುಗಳು ಆಕೆಯನ್ನು ಬಲವಂತವಾಗಿ ಮುಸ್ಲಿಂ ಧರ್ಮಕ್ಕೆ ಮತಾಂತರ ಮಾಡಿವೆ. ನನ್ನ ಪುತ್ರಿಯ ವಿವಾಹವನ್ನು ರದ್ದು ಮಾಡಿ ಎಂದು ಕೋರ್ಟ್ ಮೆಟ್ಟಿಲೇರಿದ್ದರು. ಕೇರಳ ಹೈಕೋರ್ಟ್ ಹಾದಿಯಾಳ ಮದುವೆಯನ್ನು ಅಸಿಂಧುಗೊಳಿಸಿತ್ತು. ಇದನ್ನು ಪ್ರಶ್ನಿಸಿ ಹಾದಿಯಾ ಪತಿ ಸುಪ್ರೀಂ ಕೋರ್ಟ್ ಮೊರೆ ಹೋಗಿದ್ದರು. ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್ ಹಾದಿಯಾ ಮದುವೆಯನ್ನು ಸಿಂಧುಗೊಳಿಸಿ ಆಕೆಗೆ ಪತಿಯ ಜತೆ ಬದುಕಲು ಸ್ವಾತಂತ್ರವಿದೆ ಎಂದು ಹೇಳಿತ್ತು.

About the author

ಕನ್ನಡ ಟುಡೆ

Leave a Comment