ರಾಷ್ಟ್ರ ಸುದ್ದಿ

ಜೇಬಿನಲ್ಲಿದ್ದ ಮೊಬೈಲ್‌ ಇದ್ದಕ್ಕಿದ್ದಂತೆ ಸ್ಫೋಟ

 ಮುಂಬಯಿ: ಮಹಾನಗರಿಯ ಕಾರ್ಖಾನೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಕಾರ್ಮಿಕನ ಸ್ಮಾರ್ಟ್‌ಫೋನ್‌ ತನ್ನ ಜೇಬಿನಲ್ಲೇ ಸ್ಫೋಟಗೊಂಡಿರುವ ಘಟನೆ ನಡೆದಿದೆ. ಈ ಘಟನೆಯಲ್ಲಿ ವ್ಯಕ್ತಿಯ ಕಾಲಿನಲ್ಲಿ ಸುಟ್ಟ ಗಾಯಗಳಾಗಿವೆ ಎಂದು ವರದಿಯಾಗಿದೆ. ಇನ್ನು, ಮುಂಬಯಿಯಲ್ಲಿ ಸ್ಫೋಟಗೊಂಡಿರುವ ದೃಶ್ಯ ಸಿಸಿ ಕ್ಯಾಮರಾ ದೃಶ್ಯಾವಳಿಯಲ್ಲಿ ಸೆರೆಯಾಗಿದ್ದು, ಇದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ಹಿನ್ನೆಲೆ ಸ್ಮಾರ್ಟ್‌ಫೋನ್‌ಗಳ ಸುರಕ್ಷತೆ ಬಗ್ಗೆ ದೊಡ್ಡ ಪ್ರಶ್ನೆ ಎದ್ದಿದೆ. ಸ್ಯಾಮ್ಸಂಗ್‌ ಗ್ಯಾಲಕ್ಸಿ ನೋಟ್‌ 7 ಸ್ಫೋಟ ಪ್ರಕರಣಗಳು ವರದಿಯಾದ ಬಳಿಕ ಮೊಬೈಲ್ ಸ್ಫೋಟ ಪ್ರಕರಣಗಳು ಹೆಚ್ಚು ಚರ್ಚೆಗೆ ಗ್ರಾಸವಾಗುತ್ತಿದೆ. ಕಾರ್ಖಾನೆಯೊಳಗೆ ಮತ್ತಿಬ್ಬರು ಕಾರ್ಮಿಕರ ಜತೆ ಕೆಲಸ ಮಾಡುತ್ತಿದ್ದ ವ್ಯಕ್ತಿಯ ಪ್ಯಾಂಟ್‌ನಿಂದ ಇದ್ದಕ್ಕಿದ್ದಂತೆ ಹೊಗೆ ಬರಲು ಆರಂಭಿಸುತ್ತದೆ. ತಕ್ಷಣವೇ ವ್ಯಕ್ತಿ ತನ್ನ ಸೀಟಿನಿಂದ ಜಂಪ್ ಮಾಡಿದ್ದು, ತನ್ನ ಫೋನ್‌ ಸ್ಫೋಟಗೊಂಡಿದ್ದನ್ನು ತಿಳಿದು ಅದನ್ನು ಜೇಬಿನಿಂದ ತೆಗೆದು ನೆಲಕ್ಕೆ ಎಸೆಯುತ್ತಾನೆ. ಆದರೆ, ಆ ವೇಳೆಗಾಗಲೇ ಫೋನ್‌ ಸ್ಫೋಟಗೊಂಡಿದ್ದು , ವ್ಯಕ್ತಿಗೆ ಗಾಯಗಳಾಗುತ್ತದೆ. ಅಲ್ಲದೆ, ಕಾರ್ಖಾನೆಯಲ್ಲಿದ್ದ ಮೂವರು ಕಾರ್ಮಿಕರು ಗಾಬರಿಯಾಗಿ ಕಟ್ಟಡದಿಂದ ಹೊರಗೆ ಓಡುವ ದೃಶ್ಯಗಳು ಸಹ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ ಸ್ಯಾಮ್ಸಂಗ್ ಗ್ಯಾಲಕ್ಸಿ ನೋಟ್‌ 7ನ ಹಲವು ಸ್ಫೋಟ ಪ್ರಕರಣಗಳು ವರದಿಯಾದ ಬಳಿಕ ಮೊಬೈಲ್ ಫೋನ್‌ ಬ್ಲಾಸ್ಟ್ ಪ್ರಕರಣಗಳು ಹೆಚ್ಚು ಚರ್ಚೆಯಾಗುತ್ತಿದೆ. ಇದ್ದಕ್ಕಿದ್ದಂತೆ ಸ್ಮಾರ್ಟ್‌ಫೋನ್‌ಗಳು ಸ್ಫೋಟಗೊಂಡಿರುವ ಹಲವು ಪ್ರಕರಣಗಳು ಜಗತ್ತಿನಾದ್ಯಂತ ವರದಿಯಾಗುತ್ತಿರುತ್ತದೆ. ಅಲ್ಲದೆ, ಮೊಬೈಲ್‌ ಫೋನ್‌ ಸ್ಫೋಟದಿಂದ ಸಾವಿಗೀಡಾಗಿರುವ ಪ್ರಕರಣವೂ ನಡೆದಿರುವುದು ಭಯಾನಕ. ರಾಜಸ್ಥಾನದ ಚಿತ್ತೋರ್‌ಗಢದಲ್ಲಿ 60 ವರ್ಷದ ವ್ಯಕ್ತಿಯ ಮೊಬೈಲ್‌ ಫೋನ್‌ ಇದ್ದಕ್ಕಿದ್ದಂತೆ ಸ್ಫೋಟಗೊಳ್ಳುತ್ತದೆ. ಬಳಿಕ, ಆತ ಸ್ಥಳದಲ್ಲೇ ಮೃತಪಟ್ಟ ಘಟನೆ ಜನವರಿ ತಿಂಗಳಲ್ಲಿ ವರದಿಯಾಗಿತ್ತು.

About the author

ಕನ್ನಡ ಟುಡೆ

Leave a Comment