ರಾಜಕೀಯ

ಡಿಸೆಂಬರ್‌ 5 ಕ್ಕೆ ಸಮನ್ವಯ ಸಮಿತಿ ಸಭೆ ಪಕ್ಕಾ, ಸಂಪುಟ ವಿಸ್ತರಣೆ ಬಗ್ಗೆ ಚರ್ಚೆ ನಿರೀಕ್ಷೆ

ಬೆಂಗಳೂರು: ದೋಸ್ತಿ ಸರಕಾರದ ಸಮನ್ವಯ ಸಮಿತಿ ಸಭೆ  ಸಂಪುಟ ವಿಸ್ತರಣೆ ನಡೆಸಲು ಬುಧವಾರ (ಡಿ.5) ಸಂಜೆ 4 ಗಂಟೆಗೆ ಮುಹೂರ್ತ ನಿಗದಿಯಾಗಿದೆ. ಇದರೊಂದಿಗೆ ಸಚಿವ ಸ್ಥಾನದ ಆಕಾಂಕ್ಷಿಗಳ ನಿರೀಕ್ಷೆಯೂ ಮತ್ತೊಮ್ಮೆ ಗರಿಗೆದರುವಂತಾಗಿದೆ. ಬೆಳಗಾವಿ ಅಧಿವೇಶನಕ್ಕೆ ಮುನ್ನ  ಮಾಡಬೇಕೊ ಬೇಡವೊ ಎಂಬ ಬಗ್ಗೆ ಮಾಜಿ ಸಿಎಂ ಸಿದ್ದರಾಮಯ್ಯ ಅಧ್ಯಕ್ಷತೆಯ ಸಮನ್ವಯ ಸಮಿತಿ ಸಭೆಯಲ್ಲಿ ಸೂಕ್ತ ನಿಲುವು ತಳೆಯುವ ಸಾಧ್ಯತೆಯಿದೆ. ಸಿದ್ದರಾಮಯ್ಯ ಅವರೇ ಸಂಪುಟ ವಿಸ್ತರಣೆಯ ಪರವಾಗಿದ್ದಾರೆ. ಒಂದು ವೇಳೆ ಸಹಮತ ಮೂಡಿದರೆ ಹೈಕಮಾಂಡ್‌ನೊಂದಿಗೆ ಸಮಾಲೋಚಿಸಲು ಕಾಂಗ್ರೆಸ್‌ ನಾಯಕರು ದಿಲ್ಲಿ ಪ್ರವಾಸ ಕೈಗೊಳ್ಳಲಿದ್ದಾರೆ. ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರೂ ಸಮ್ಮತಿಸಿದರೆ ಬಹು ನಿರೀಕ್ಷಿತ ಸಂಪುಟ ವಿಸ್ತರಣೆಗೂ ಮುಹೂರ್ತ ನಿಗದಿಯಾಗಲಿದೆ.

ಸರಕಾರದ ಕಾರ್ಯವೈಖರಿಯ ಪರಾಮರ್ಶೆ, ಜನಪರ ಕಾರ್ಯಕ್ರಮಗಳ ಅನುಷ್ಠಾನ ಹಾಗೂ ಸಾಮಾನ್ಯ ಕನಿಷ್ಠ ಕಾರ್ಯಕ್ರಮ (ಸಿಎಂಪಿ) ಜಾರಿಗೆ ಕೈಗೊಂಡ ಕ್ರಮದ ಬಗ್ಗೆ ಚರ್ಚಿಸುವುದು ಈ ಸಭೆಯ ವಿಷಯಸೂಚಿಯಲ್ಲಿದೆ. ಆದರೆ, ಮಂತ್ರಿಮಂಡಲ ವಿಸ್ತರಣೆ ಸಂಬಂಧ ಖಚಿತ ನಿರ್ಧಾರ ಹೊರಹೊಮ್ಮಲಿ ಎಂದೇ ಕಾಂಗ್ರೆಸ್‌ ಶಾಸಕರು ಅಪೇಕ್ಷಿಸುತ್ತಿದ್ದಾರೆ.

ಇತರ ಪ್ರಮುಖ ಅಜೆಂಡಾಗಳ ಹೊರತಾಗಿಯೂ ಶಾಸಕರಿಂದ ತೀವ್ರ ಒತ್ತಡವಿರುವುದರಿಂದ ಸಂಪುಟ ವಿಸ್ತರಣೆ ಬಗ್ಗೆ ಸಮನ್ವಯ ಸಮಿತಿ ಸಭೆಯಲ್ಲಿ ಚರ್ಚೆಯಾಗುವುದು ನಿಶ್ಚಿತ. ಮಂತ್ರಿ ಸ್ಥಾನ ನೀಡದಿದ್ದರೆ ಬೆಳಗಾವಿ ಅಧಿವೇಶ ನದಿಂದ ದೂರವುಳಿದು ಮೈತ್ರಿ ಸರಕಾರಕ್ಕೆ ಸಂಕಷ್ಟ ತರುವ ಸುಳಿವನ್ನೂ ಕಾಂಗ್ರೆಸ್‌ನ ಕೆಲ ಶಾಸಕರು ನೀಡಿದ್ದಾರೆ. ಹಾಗಾಗಿ ಈ ಸಭೆ ‘ಹೈವೋಲ್ಟೇಜ್‌’ ಎನ್ನಿಸಿಕೊಳ್ಳುವ ಎಲ್ಲ ಸಾಧ್ಯತೆಯಿದೆ. ಸಮನ್ವಯ ಸಮಿತಿಯಲ್ಲಿ ನಿರ್ಣಯ ತೆಗೆದುಕೊಂಡರೂ ಹೈಕಮಾಂಡ್‌ ಇದಕ್ಕೆ ಸೊಪ್ಪು ಹಾಕುತ್ತದೆ ಎನ್ನಲಾಗದು. ಅಧಿಕಾರ ಬೇಕಿದ್ದರೆ ಪಕ್ಷದ ಸಂಘಟನೆ ಕೆಲಸ ಮಾಡಿದ್ದಕ್ಕೆ ದಾಖಲೆ ತರುವಂತೆ ರಾಹುಲ್‌ ಸೂಚಿಸಿದ್ದಾರೆ. ಇದನ್ನೇ ಮಾನದಂಡವಾಗಿ ಸ್ವೀಕರಿಸಿದರೆ ಮಂತ್ರಿಗಳಾಗಲು ಸಾಲುಗಟ್ಟಿ ನಿಂತಿರುವ ಶಾಸಕರುಗಳ ಲೆಕ್ಕಾಚಾರವೇ ತಲೆಕೆಳಗಾಗಲಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ.

ತಾರತಮ್ಯದ ಆರೋಪ : ಅನುದಾನ ಹಂಚಿಕೆಯಲ್ಲಿ ತಾರತಮ್ಯ ಎಸಗಲಾಗುತ್ತಿದೆ. ಕೆಲವು ಜಿಲ್ಲೆಗಳಿಗೆ ಸೀಮಿತವಾಗಿ ಯೋಜನೆ ಅನುಷ್ಠಾನಗೊಳಿಸಲಾಗುತ್ತಿದೆ. ಕಾಂಗ್ರೆಸ್‌ ಶಾಸಕರ ಕೆಲಸ ಮಾಡಿಸಿ ಕೊಡುತ್ತಿಲ್ಲ. ನೌಕರರ ವರ್ಗಾವಣೆಯನ್ನೂ ತಮಗೆ ಬೇಕಾದಂತೆ ಮಾಡಿಕೊಳ್ಳಲಾಗಿದೆ. ಜೆಡಿಎಸ್‌ ಪ್ರಬಲವಾಗಿರುವ ಜಿಲ್ಲೆಗಳಲ್ಲಿ ಕಾಂಗ್ರೆಸ್‌ ಅಸ್ತಿತ್ವವೇ ಅಲುಗಾಡುವಂತಾಗಿದೆ ಎಂಬ ಆರೋಪ ಕೇಳಿಬಂದಿದೆ. ಈ ವಿಚಾರದಲ್ಲಿ ಸಿದ್ದರಾಮಯ್ಯ ಸೇರಿದಂತೆ ರಾಜ್ಯ ಕಾಂಗ್ರೆಸ್‌ ಉಸ್ತುವಾರಿ ಕೆ.ಸಿ.ವೇಣುಗೋಪಾಲ್‌ ಹಾಗೂ ಕೆಪಿಸಿಸಿ ಅಧ್ಯಕ್ಷ ದಿನೇಶ್‌ ಗುಂಡೂರಾವ್‌ ಅವರಿಗೆ ಕಾಂಗ್ರೆಸ್‌ ಶಾಸಕರು ದೂರು ನೀಡಿದ್ದಾರೆ. ಈ ವಿಚಾರಗಳೂ ಸಭೆಯಲ್ಲಿ ಪ್ರಸ್ತಾಪವಾಗುವ ಸಾಧ್ಯತೆಯಿದೆಯೆಂದು ಹೇಳಲಾಗುತ್ತಿದೆ. ಸಭೆಯಲ್ಲಿ ಭಾಗಿಯಾಗುವ ಉದ್ದೇಶದಿಂದ ಕೆ.ಸಿ.ವೇಣುಗೋಪಾಲ್‌ ಮಂಗಳವಾರ ಸಂಜೆ ಬೆಂಗಳೂರಿಗೆ ಆಗಮಿಸಲಿದ್ದಾರೆ.

ಹಿಂದಿನ ಸಭೆಯಲ್ಲೂ ತೀರ್ಮಾನವಾಗಿತ್ತು! : ಆಗಸ್ಟ್‌ ಅಂತ್ಯದಲ್ಲಿ ನಡೆದ ಸಮನ್ವಯ ಸಮಿತಿ ಸಭೆಯಲ್ಲಿ ಸಂಪುಟದಲ್ಲಿ ಖಾಲಿಯಿರುವ ಸ್ಥಾನಗಳನ್ನು ಸೆಪ್ಟೆಂಬರ್‌ 3ನೇ ವಾರ ಭರ್ತಿ ಮಾಡಲಾಗುವುದು. ಇದರೊಟ್ಟಿಗೆ ನಿಗಮ ಮಂಡಳಿ ನೇಮಕ ಪ್ರಕ್ರಿಯೆಯೂ ನಡೆಯಲಿದೆ. ಸಂಪುಟಕ್ಕೆ ಸೇರ್ಪಡೆಯಾಗದ ಶಾಸಕರಿಗೆ ನಿಗಮ ಮಂಡಳಿ ಅಧ್ಯಕ್ಷ ಸ್ಥಾನ ನೀಡಲಾಗುವುದು ಎಂದು ಪ್ರಕಟಿಸಲಾಗಿತ್ತು. ಆದರೆ, ನಾನಾ ಕಾರಣಗಳಿಂದ ಸಂಪುಟ ವಿಸ್ತರಣೆ ಮುಂದೂಡಿಕೆಯಾಗುತ್ತಲೇ ಇದೆ. ಈಗಲೂ ಆಗದಿದ್ದರೆ, ಸದ್ಯಕ್ಕಂತೂ ಮಂತ್ರಿಗಳಾಗುವ ಕನಸು ಈಡೇರುವುದಿಲ್ಲವೆಂದು ಶಾಸಕರ ವಲಯದಲ್ಲೇ ಚರ್ಚೆಯಾಗುತ್ತಿದೆ.

ಏಳೆಂಟು ‘ಕೈ’ ಶಾಸಕರು ಬಿಜೆಪಿ ಸೇರಬಹುದು

ಬೆಳಗಾವಿ: ಆರು ತಿಂಗಳಿನಿಂದಲೂ ಬಿಜೆಪಿಯ ಆಪರೇಷನ್‌ ಕಮಲ ನಡೆಯುತ್ತಲಿದ್ದು, ಕಾಂಗ್ರೆಸ್‌ನ ಏಳೆಂಟು ಶಾಸಕರು ಪಕ್ಷ ತೊರೆಯಲೂಬಹುದು ಎಂದು ಶಾಸಕ ಸತೀಶ್‌ ಜಾರಕಿಹೊಳಿ ಹೇಳಿದ್ದಾರೆ. ಶ್ರೀರಾಮುಲು ಆಪ್ತ ಹಾಗೂ ದುಬೈ ಉದ್ಯಮಿ ನಡುವೆ ನಡೆದ ಸಂಭಾಷಣೆಯ ಆಡಿಯೊ ಕ್ಲಿಪ್‌ ಬಹಿರಂಗಗೊಂಡ ವಿಷಯವಾಗಿ ಸುದ್ದಿಗಾರರ ಪ್ರಶ್ನೆಗೆ ಸೋಮವಾರ ಪ್ರತಿಕ್ರಿಯಿಸಿದ ಅವರು, ”ಬಿಡುಗಡೆಯಾಗಿರುವ ಆಡಿಯೊ ಕ್ಲಿಪ್‌ ಹೊಸದೇನೂ ಅಲ್ಲ. ಬಿಜೆಪಿ ಅಂದುಕೊಂಡಷ್ಟು ಸಂಖ್ಯೆಯಲ್ಲಿ ಕಾಂಗ್ರೆಸ್‌ ಶಾಸಕರು ಪಕ್ಷ ತೊರೆಯುವುದು ಸುಳ್ಳು. ಏಳೆಂಟು ಶಾಸಕರಲ್ಲಿ ಅಸಮಾಧಾನ ಇರುವುದು ನಿಜ. ಅವರು ಬಿಜೆಪಿಗೆ ಹೋಗಬಹುದು. ಅತೃಪ್ತ ಶಾಸಕರ ಸಮಸ್ಯೆಗೆ ಪಕ್ಷ ಸ್ಪಂದಿಸಿದರೆ ಅವರು ಇಲ್ಲಿಯೇ ಉಳಿಯುತ್ತಾರೆ. ಏನೇ ಬೆಳವಣಿಗೆ ನಡೆದರೂ ನಾನು ಮಾತ್ರ ಕಾಂಗ್ರೆಸ್‌ನಲ್ಲೇ ಇರುತ್ತೇನೆ,” ಎಂದರು.

ಅಧಿವೇಶನದೊಳಗಾಗಿ ಸಚಿವ ಸಂಪುಟ ವಿಸ್ತರಣೆಯಾದರೆ ಒಳ್ಳೆಯದು. ಇಲ್ಲದಿದ್ದರೆ ಅಧಿವೇಶನ ಮುಗಿಯುತ್ತಿದ್ದಂತೆ ವಿಸ್ತರಣೆಗೊಳ್ಳಲಿ. 
– ಸತೀಶ್‌ ಜಾರಕಿಹೊಳಿ, ಶಾಸಕ

About the author

ಕನ್ನಡ ಟುಡೆ

Leave a Comment