ರಾಜಕೀಯ

ದೇವೇಗೌಡರು ಗೆದ್ದರೆ ಇಮ್ರಾನ್ ಭಾರತದ ಪ್ರಧಾನಿಯಾದಂತೆ: ಜೆ ಸಿ ಮಾಧುಸ್ವಾಮಿ

ತುಮಕೂರು: ತುಮಕೂರು ಲೋಕಸಭಾ ಕ್ಷೇತ್ರದಲ್ಲಿ ಬಿಜೆಪಿ ಮಂಗಳವಾರ ರಣಕಹಳೆ ಮೊಳಗಿಸಿದೆ. ” ದೇವೇಗೌಡರು ತುಕಮೂರು ಸಂಸದರಾದರೆ, ಭಾರತ ದೇಶಕ್ಕೆ ಇಮ್ರಾನ್ ಖಾನ್ ಪ್ರಧಾನಿಯಾದಂತೆ”, ಎಂದು ಚಿಕ್ಕನಾಯಕನಹಳ್ಳಿ ಬಿಜೆಪಿ ಶಾಸಕ ಜೆ. ಸಿ ಮಾಧುಸ್ವಾಮಿ ಕಿಡಿಕಾರಿದರು.

ಬಿಜೆಪಿ ಅಭ್ಯರ್ಥಿ ಜಿ.ಎಸ್‌. ಬಸವರಾಜು ಬಿಜೆಪಿ ಅಭ್ಯರ್ಥಿ ಅವರ ನಾಮಪತ್ರ ಸಲ್ಲಿಕೆ ಬಳಿಕ ಜಿಲ್ಲಾಧಿಕಾರಿ ಕಚೇರಿ ಎದುರು ಮಾತನಾಡಿದ ಅವರು, ”ದೇವೇಗೌಡರು ಮುಂಚೂಣಿಗೆ ಬಂದ ಬಳಿಕ ಇಡೀ ದೇಶದ ರಾಜಕಾರಣ ಜಾತಿಮಯವಾಯಿತು. ದೇವೇಗೌಡರು ಗೆದ್ದರೆ ಮುಂದೆ ಅವರ ಮಕ್ಕಳು, ಮೊಮ್ಮಕ್ಕಳು ಜಿಲ್ಲೆಯನ್ನು ಪೂರ್ತಿಯಾಗಿ ಆಕ್ರಮಿಸಿಕೊಳ್ಳುತ್ತಾರೆ”, ಎಂದು ಆರೋಪಿಸಿದರು.

”ಪೌರ ಕಾರ್ಮಿಕರ ಪಾದ ಪೂಜೆ ಮಾಡಿದ್ದೇಕೆ ಎಂದು ನಾನು ಹಾಸನದ ನಮ್ಮ ಅಭ್ಯರ್ಥಿ ಎ. ಮಂಜು ಅವರನ್ನು ಕೇಳಿದೆ. ಅದಕ್ಕವರು ಅಣ್ಣಾ, ಯಾರಾದರೂ ಹರಿಜನರು ದೇವೇಗೌಡ ರೇವಣ್ಣರ ಮನೆ ಮುಂದೆ ಹಾದು ಹೋದರೆ, ಹರಿಜನರ ಮುಖ ನೋಡಿದ ಬಳಿಕ ಮನೆಯೊಳಗೆ ಹೋಗಿ ಸ್ನಾನ ಮಾಡುತ್ತಾರೆ. ಹೀಗಾಗಿ ಪೂಜೆಯ ಅಗತ್ಯವಿತ್ತು” ಎಂದರು. ಇಂತವರು ನಮ್ಮ ಜಿಲ್ಲೆಗೆ ಬೇಕೆ? ಎಂದು ಪ್ರಶ್ನಿಸಿದರು.

ಬಿಜೆಪಿ ಶಕ್ತಿ ಪ್ರದರ್ಶಿಸಿ ನಾಮಪತ್ರ ಸಲ್ಲಿಸಿದ ಬಸವರಾಜು: ನಿನ್ನ ಬಿಜೆಪಿ ಅಭ್ಯರ್ಥಿ ಜಿ.ಎಸ್‌. ಬಸವರಾಜು ಸಾವಿರಾರು ಕಾರ್ಯಕರ್ತರೊಂದಿಗೆ ನಗರದಲ್ಲಿ ಮಂಗಳವಾರ ಬೃಹತ್‌ ರೋಡ್‌ ಶೋ ನಡೆಸಿ ಅಧಿಕೃತವಾಗಿ ತಮ್ಮ ನಾಮಪತ್ರ ಸಲ್ಲಿಸಿದರು. ಬಳಿಕ ಮಾತನಾಡಿದ ಅವರು, ನಮ್ಮ ಗೆಲುವು ಮುಖ್ಯವಲ್ಲ, ರಾಕ್ಷಸರು ಈ ಜಿಲ್ಲೆಗೆ ಬಂದರೆ ಇಲ್ಲಿನವರ ವಂಶವನ್ನು ನಿರ್ವಂಶ ಮಾಡುತ್ತಾರೆ. ರಾಕ್ಷಸ ವಂಶ ಎಂದು ನಾನು ಹೇಳಿಲ್ಲ ಗುಬ್ಬಿಯ ಸಚಿವರೇ ಹೇಳಿದ್ದಾರೆ. ದೇಶದಲ್ಲಿ ನದಿಗಳ ಜೋಡಣೆಯಾಗಬೇರು, ಅದಕ್ಕೆ ಮತ್ತೆ ಮೋದಿ ಮತ್ತೆ ಪ್ರಧಾನಿಯಾಗಬೇಕು, ಎಂದರು.

ಬಿ.ಎಚ್‌. ರಸ್ತೆಯ ಸಿದ್ಧಿವಿನಾಯಕ ಗಣಪತಿ ದೇವಾಲಯದಲ್ಲಿ ಪೂಜೆ ಸಲ್ಲಿಸಿ, ಜಿಲ್ಲಾಧಿಕಾರಿ ಕಚೇರಿವರೆಗೆ ತೆರೆದ ವಾಹನದಲ್ಲಿ ಮೆರವಣಿಗೆ ಮೂಲಕ ಹೊರಟ ಬಸವರಾಜುಗೆ ಪಕ್ಷದ ಚುನಾವಣಾ ಉಸ್ತುವಾರಿ ವಿ.ಸೋಮಣ್ಣ, ಮಾಜಿ ಸಚಿವ ಸೊಗಡು ಶಿವಣ್ಣ, ಬಿಜೆಪಿ ಶಾಸಕರಾದ ಜೆ.ಸಿ. ಮಾಧುಸ್ವಾಮಿ, ಮಸಾಲೆ ಜಯರಾಂ, ಬಿ.ಸಿ. ನಾಗೇಶ್‌, ಜಿ.ಬಿ. ಜ್ಯೋತಿಗಣೇಶ್‌, ಮಾಜಿ ಶಾಸಕ ಬಿ.ಸುರೇಶ್‌ ಗೌಡ ಮತ್ತಿತರರು ಸಾಥ್‌ ನೀಡಿದರು.

ನಾಮಪತ್ರ ಸಲ್ಲಿಸಿದ ಬಳಿಕ ಜಿಲ್ಲಾಧಿಕಾರಿ ಕಚೇರಿ ಎದುರು ಸುದ್ದಿಗಾರರೊಂದಿಗೆ ಮಾತನಾಡಿದ ಪಕ್ಷದ ಚುನಾವಣಾ ಉಸ್ತುವಾರಿ ವಿ.ಸೋಮಣ್ಣ, ದೇಶ ಮೊದಲು, ಉಳಿದದ್ದು ನಂತರ ಎನ್ನುವುದಕ್ಕಾಗಿ ನಮ್ಮ ಹೋರಾಟ. ಈ ಚುನಾವಣೆ ದೇಶದ ದೃಷ್ಟಿಯಿಂದ ಬಹಳ ಮಹತ್ವದ್ದು. ಬಿಜೆಪಿ ಅಭ್ಯರ್ಥಿಯನ್ನು ಈ ಬಾರಿ ಸಂಸತ್‌ಗೆ ಕಳಿಸುವುದು ನಿಶ್ಚಿತ. ಸರಕಾರದ ದೊಂಬರಾಟ ತಿರಸ್ಕಾರ ಮಾಡುವ ಕೆಲಸವನ್ನು ಜನ ಮಾಡುತ್ತಾರೆ. ಕರ್ನಾಟಕದಲ್ಲಿರುವ ಅಪವಿತ್ರ ಮೈತ್ರಿಯು ಈ ಚುನಾವಣೆ ಬಳಿಕ ಕೊನೆಯಾಗಲಿದೆ ಎಂದರು.

ಮಾಜಿ ಶಾಸಕ ಬಿ.ಸುರೇಶ್‌ ಗೌಡ ಮಾತನಾಡಿ, ಇದು ಜಿಲ್ಲೆಯ ಸ್ವಾಭಿಮಾನದ ಚುನಾವಣೆ. ಮಾಜಿ ಪ್ರಧಾನಿ ದೇವೇಗೌಡರು ತಮ್ಮ ಕರ್ಮ ಭೂಮಿ ಮತ್ತು ಜನ್ಮ ಭೂಮಿ ಹಾಸನವನ್ನು ಬಿಟ್ಟು ತುಮಕೂರಿಗೆ ಬಂದಿದ್ದೇಕೆ? ಅವರಿಂದಾಗಿ ಜಿಲ್ಲೆಯ ರೈತರು ಕಣ್ಣೀರು ಹಾಕುತ್ತಿದ್ದಾರೆ. ಹೇಮಾವತಿ ನೀರಿಗಾಗಿ ಜನ ನೋವು ಅನುಭವಿಸಿದ್ದಾರೆ. ಅದಕ್ಕೆ ಕಾರಣರಾದವರನ್ನು ಜನ ಕ್ಷ ಮಿಸುವುದಿಲ್ಲ ಎಂದರು. ಈಗಲೂ ಕಾಲ ಮಿಂಚಿಲ್ಲ. ಎಸ್‌.ಪಿ. ಮುದ್ದಹನುಮೇಗೌಡ ಅವರು ನಾಮಪತ್ರ ಸಲ್ಲಿಸಿದ್ದಾರೆ. ಅವರಿಗೆ ಕ್ಷೇತ್ರ ಬಿಟ್ಟುಕೊಟ್ಟು ದೇವೇಗೌಡರು ವಾಪಾಸ್ಸು ತೆರಳಲಿ. ಅವರ ಮೂರು ಕ್ಷೇತ್ರಗಳನ್ನು ಉಳಿಸಿಕೊಳ್ಳಲಾಗುವುದಿಲ್ಲ. ಸರಕಾರ ರಚನೆ ಮಾಡುವುದು ನಂತರದ ಮಾತು. ಕುರುಕ್ಷೇತ್ರ ಮತ್ತೊಮ್ಮೆ ಪುನರಾವರ್ತನೆ ಆಗುತ್ತದೆ ಎಂದು ಹರಿಹಾಯ್ದರು.

ತುರುವೇಕೆರೆ ಬಿಜೆಪಿ ಶಾಸಕ ಮಸಾಲೆ ಜಯರಾಂ ಮಾತನಾಡಿ, ಜಿಲ್ಲೆಯ ಒಬ್ಬೊಬ್ಬರೇ ಒಕ್ಕಲಿಗ ನಾಯಕರನ್ನು ರಾಜಕೀಯವಾಗಿ ಮುಗಿಸುತ್ತಿರುವ ಎಚ್‌.ಡಿ ದೇವೇಗೌಡರಿಗೆ ಒಕ್ಕಲಿಗರು ಮತ ಹಾಕಬಾರದು. ಒಕ್ಕಲಿಗ ನಾಯಕರನ್ನು ಒಬ್ಬೊಬ್ಬರನ್ನೇ ಮುಗಿಸುತ್ತಿದ್ದೀರಿ. ವೈ.ಕೆ ರಾಮಯ್ಯರಿಗೂ ಹೀಗೆ ಆಯಿತು. ವಿಧಾನಸಭೆ ಅಧಿವೇಶನದಲ್ಲಿ ನಾನು ರೇವಣ್ಣರಿಗೆ ಕೈ ಮುಗಿದು ತುಮಕೂರು ಜಿಲ್ಲೆಗೆ ನೀರು ಬಿಡುವಂತೆ ಕೇಳಿಕೊಂಡಿದ್ದೆ. ಆಗ ರೇವಣ್ಣ, ‘ಏಯ್‌ ಹೋಗ್ರಯ್ಯ… ನೀವೇನು ನಮಗೆ ವೋಟು ಹಾಕಬೇಡಿ’ ಎಂದಿದ್ದರು. ಇಂತಹವರಿಗೆ ನಾವು ವೋಟ್‌ ಹಾಕಬೇಕೇ? ದೇವೇಗೌಡರಿಗೆ ಒಕ್ಕಲಿಗರಾರ‍ಯರು ಕೂಡ ವೋಟ್‌ ಹಾಕಬೇಡಿ ಎಂದು ಆವೇಷದಿಂದ ಮನವಿ ಮಾಡಿದರು.

ಶಾಸಕ ಬಿ.ಸಿ ನಾಗೇಶ್‌ ಮಾತನಾಡಿ, ಈ ಚುನಾವಣೆ ಪಾಕಿಸ್ತಾನ ಮತ್ತು ಭಾರತದ ನಡುವಿನ ಚುನಾವಣೆ. ಯಾರು ಗೆಲ್ಲಬೇಕು ಎಂದು ನೀವೇ ತೀರ್ಮಾನ ಮಾಡಿ. ಮೋದಿ ಗೆಲ್ಲಬೇಕೆಂದರೆ ಬಿಜೆಪಿ ಅಭ್ಯರ್ಥಿ ಜಿ.ಎಸ್‌. ಬಸವರಾಜು ಅವರನ್ನು ಗೆಲ್ಲಿಸಬೇಕು ಎಂದು ಮನವಿ ಮಾಡಿದರು.  ಪರಮೇಶ್ವರ್‌ ನಾಯಕತ್ವದಿಂದಲೇ ಜಿಲ್ಲೆಗೆ ಹಿನ್ನಡೆ: ಡಾ.ಜಿ ಪರಮೇಶ್ವರ್‌ರಂತವರ ನಾಯಕತ್ವದಿಂದಲೇ ಜಿಲ್ಲೆಗೆ ನೀರಿನ ವಿಚಾರದಲ್ಲಿ ಹಿನ್ನಡೆಯಾಗಿದೆ ಎಂದು ಬಿಜೆಪಿ ಶಾಸಕ ಜೆ.ಸಿ. ಮಾಧುಸ್ವಾಮಿ ಆರೋಪಿಸಿದರು. ಜಿ.ಎಸ್‌. ಬಸವರಾಜು ಅವರ ನಾಮಪತ್ರ ಸಲ್ಲಿಕೆ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಮಾಧುಸ್ವಾಮಿ, ಹೇಮಾವತಿ ನೀರು ಹಂಚಿಕೆ ಕುರಿತು ಮೂರು ಬಾರಿ ನಡೆದ ಸಭೆಯಲ್ಲಿ ಪರಮೇಶ್ವರ್‌ ಸರಿಯಾಗಿ ಮಾತನಾಡಿಲ್ಲ. ಅವರಿಗೆ ಅಧಿಕಾರ ಮುಖ್ಯವಾಗಿದೆ. ಪರಮೇಶ್ವರ್‌ ಅವರೇ ಸಭೆಗಳಲ್ಲಿ ‘ತುಮಕೂರಿಗೆ ನೀರಿನ ವಿಚಾರದಲ್ಲಿ ಅನ್ಯಾಯವಾಗಿದೆ. ಆದರೆ ಅದನ್ನೀಗ ಸರಿಪಡಿಸಲಾಗುವುದಿಲ್ಲ’ ಎಂದಿದ್ದಾರೆ. ಹೀಗಿರುವಾಗ ಜಿಲ್ಲೆಯ ಹಿತಾಸಕ್ತಿಗೆ ವಿರುದ್ಧ ಮತ್ತು ಮಾರಕವಾಗಿದ್ದವರನ್ನೇ ತಂದು ಅಭ್ಯರ್ಥಿಯನ್ನಾಗಿಸಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಸಾಥ್‌ ನೀಡಿದ ಚೌಕಿದಾರರು: ನಾಮಪತ್ರ ಸಲ್ಲಿಕೆಗೆ ರೋಡ್‌ ಶೋನಲ್ಲಿ ಹೊರಟ ಬಸವರಾಜು ಅವರಿಗೆ ಚೌಕಿದಾರರು ಸಾಥ್‌ ನೀಡಿದರು. ದೇಶ ರಕ್ಷ ಣೆಗಾಗಿ ಚೌಕಿದಾರ (ಕಾವಲುಗಾರ)ನಂತೆ ಕೆಲಸ ಮಾಡುವುದಾಗಿ ಪ್ರಧಾನಿ ನರೇಂದ್ರ ಮೋದಿ ನೀಡಿರುವ ಹೇಳಿಕೆಗೆ ಚೌಕಿದಾರರು ಈ ರೀತಿಯಾಗಿ ಸ್ಪಂದಿಸಿದರು. ಬಿಜೆಪಿ ಅಭ್ಯರ್ಥಿ ಪರ ರೋಡ್‌ ಶೋನಲ್ಲಿ ಪಾಲ್ಗೊಂಡು ಮೋದಿಗೆ ಜೈಕಾರ ಕೂಗಿದರು. ಈ ಚೌಕಿದಾರರು ಪ್ರಧಾನಿ ಮೋದಿ ಅವರ ಭಾವಚಿತ್ರವಿರುವ ಮತ್ತು ‘ದೇಶದ ಕಾವಲುಗಾರ ಮೋದಿಯವರಿಗೆ ನನ್ನ ಬೆಂಬಲ, ನಾನೂ ಚೌಕಿದಾರ. ನನ್ನ ಭಾರತ, ಸುಭದ್ರ ಭಾರತ’ ಎಂಬ ಬರಹವುಳ್ಳ ಬಿತ್ರಿಪತ್ರಗಳನ್ನು ಹಿಡಿದುಕೊಂಡು ಮೆರವಣಿಗೆಯಲ್ಲಿ ಹೆಜ್ಜೆ ಹಾಕಿದರು.

About the author

ಕನ್ನಡ ಟುಡೆ

Leave a Comment