ರಾಜಕೀಯ

ದೋಸ್ತಿ ಪಕ್ಷ ಜೆಡಿಎಸ್‌ಗೆ ಬಿಟ್ಟು: ಕ್ಷೇತ್ರ ಹಂಚಿಕೆ ಬೆನ್ನಿಗೇ ಕಾಂಗ್ರೆಸ್‌ನಲ್ಲಿ ಭುಗಿಲೆದ್ದ ಅಸಮಾಧಾನ

ಬೆಂಗಳೂರು: ಕಾಂಗ್ರೆಸ್‌ ಪ್ರಾಬಲ್ಯದ ಕ್ಷೇತ್ರಗಳನ್ನು ದೋಸ್ತಿ ಪಕ್ಷ ಜೆಡಿಎಸ್‌ಗೆ ಬಿಟ್ಟು ಕೊಟ್ಟಿದ್ದರಿಂದ ಕಾಂಗ್ರೆಸ್‌ನಲ್ಲಿ ಅಸಮಾಧಾನ ಭುಗಿಲೆದ್ದಿದೆ. ಜೆಡಿಎಸ್‌ಗೆ ನೆಲೆಯೇ ಇಲ್ಲದ ಕ್ಷೇತ್ರಗಳನ್ನೂ ನೀಡುವ ನಿರ್ಧಾರದ ಬಗ್ಗೆ ಮರು ಪರಿಶೀಲನೆ ನಡೆಸಿ ಎಂದು ಕಾಂಗ್ರೆಸ್‌ನ ಸ್ಥಳೀಯ ಮುಖಂಡರು ಹಾಗೂ ತಳಮಟ್ಟದ ಕಾರ್ಯಕರ್ತರು ಒತ್ತಡ ತರುತ್ತಿದ್ದಾರೆ.

ಮೈತ್ರಿ ಸೂತ್ರಕ್ಕೆ ಕಟ್ಟುಬಿದ್ದು 8 ಕ್ಷೇತ್ರಗಳನ್ನು ಜೆಡಿಎಸ್‌ಗೆ ನೀಡುವ ತೀರ್ಮಾನವನ್ನು ಕಾಂಗ್ರೆಸ್‌ ಹೈಕಮಾಂಡ್‌ ಪ್ರಕಟಿಸಿದೆ. ಇದರಿಂದ ಸ್ಥಳೀಯ ಮಟ್ಟದ ಅತೃಪ್ತಿಯ ಬೆಂಕಿಗೆ ತುಪ್ಪ ಸುರಿದಂತಾಗಿದೆ. ಈ ಮೈತ್ರಿಯ ಸಹವಾಸವೇ ಬೇಡ. ಎಲ್ಲ ಕ್ಷೇತ್ರಗಳಲ್ಲೂ ಕಾಂಗ್ರೆಸ್‌ ಏಕಾಂಗಿ ಸ್ಪರ್ಧೆ ಮಾಡುವುದು ಉತ್ತಮ. ಇಲ್ಲದಿದ್ದರೆ ರಾಜಕೀಯವಾಗಿ ಆತ್ಮಹತ್ಯೆ ಮಾಡಿಕೊಂಡಂತಾಗುತ್ತದೆ ಎಂದು ಕಾರ್ಯಕರ್ತರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

‘ಮಂಡ್ಯ, ಹಾಸನದೊಂದಿಗೆ ಶಿವಮೊಗ್ಗವನ್ನು ಜೆಡಿಎಸ್‌ಗೆ ನೀಡುವುದು ಮೊದಲೇ ನಿರ್ಧಾರವಾಗಿತ್ತು. ಬೆಂಗಳೂರು ಉತ್ತರವೂ ಮಿತ್ರಪಕ್ಷದ ಪಾಲಾಗುವ ಸುಳಿವಿತ್ತು. ತುಮಕೂರಿನ ಮೇಲೆ ಜೆಡಿಎಸ್‌ ಕಣ್ಣಿಟ್ಟಿರುವುದು ಗೊತ್ತಿತ್ತು. ನಮ್ಮ ಸಂಸದರಿರುವ ತುಮಕೂರನ್ನು ಯಾವುದೇ ಕಾರಣಕ್ಕೂ ಜೆಡಿಎಸ್‌ಗೆ ಕೊಡಬಾರದೆಂದು ಒತ್ತಾಯಿಸಲಾಗಿತ್ತು. ಆದರೆ, ವರಿಷ್ಠರು ಈ ಮನವಿಗೆ ಬೆಲೆ ನೀಡಿಲ್ಲ. ಇನ್ನು ಉತ್ತರ ಕನ್ನಡ, ವಿಜಯಪುರ, ಉಡುಪಿ-ಚಿಕ್ಕಮಗಳೂರು ಕ್ಷೇತ್ರಗಳನ್ನು ಜೆಡಿಎಸ್‌ಗೆ ನೀಡುವ ತೀರ್ಮಾನ ಅನಿರೀಕ್ಷಿತವಾದುದು. ಈ ಕ್ಷೇತ್ರಗಳಲ್ಲಿ ಜೆಡಿಎಸ್‌ಗೆ ನೆಲೆಯೇ ಇಲ್ಲ. ಮೈತ್ರಿ ಮಾಡಿಕೊಳ್ಳಲಾಗಿದೆ ಎಂಬ ಏಕೈಕ ಕಾರಣದಿಂದ ಕಾಂಗ್ರೆಸ್‌ ಹಿತ ಬಲಿಕೊಡುವುದು ಸರಿಯಲ್ಲ,” ಎಂಬ ಆಕ್ಷೇಪದ ಮಾತುಗಳು ಕಾಂಗ್ರೆಸ್‌ ವಲಯದಲ್ಲಿ ಕೇಳಿ ಬರುತ್ತಿವೆ.

ಸೀಟು ಹಂಚಿಕೆ ತೀರ್ಮಾನ ಹೊರಬೀಳುತ್ತಿದ್ದಂತೆ ಕೆಪಿಸಿಸಿ ಅಧ್ಯಕ್ಷ ದಿನೇಶ್‌ ಗುಂಡೂರಾವ್‌, ಮಾಜಿ ಸಿಎಂ ಸಿದ್ದರಾಮಯ್ಯ ಸೇರಿದಂತೆ ಪಕ್ಷದ ಮುಂಚೂಣಿ ನಾಯಕರನ್ನು ಭೇಟಿಯಾಗಿರುವ ಕೆಳಹಂತದ ಮುಖಂಡರು ”ಈ ಬಗ್ಗೆ ಪುನರ್‌ ಪರಿಶೀಲನೆಯಾಗಬೇಕು. ಹೈಕಮಾಂಡ್‌ಗೆ ಮನದಟ್ಟು ಮಾಡಿಕೊಡಬೇಕು,” ಎಂದು ಮೊರೆಯಿಡುತ್ತಿದ್ದಾರೆ. ಆದರೆ, ಎಲ್ಲ ನಾಯಕರೂ ಹೈಕಮಾಂಡ್‌ನತ್ತ ಕೈತೋರಿಸಿ ಕಾರ್ಯಕರ್ತರ ಬಾಯಿಮುಚ್ಚಿಸುವ ಯತ್ನ ಮಾಡುತ್ತಿದ್ದಾರೆ.

ಕೈಕೊಡುವ ಮುನ್ಸೂಚನೆ : ಜೆಡಿಎಸ್‌ಗೆ ನೀಡಿದ ಕ್ಷೇತ್ರ ಹಿಂಪಡೆಯಲು ಹೊರಟರೆ ಮತ್ತೊಂದು ಸಂಘರ್ಷ ಶುರುವಾಗುತ್ತದೆ. ಈ ಕಾರಣದಿಂದ ಯಾವುದೇ ಬದಲಾವಣೆ ಮಾಡದಿರುವ ನಿಲುವನ್ನು ಹೈಕಮಾಂಡ್‌ ಕೈಗೊಳ್ಳುವ ಸಾಧ್ಯತೆ ನಿಚ್ಚಳವೆಂದು ಹೇಳಲಾಗುತ್ತಿದೆ. ಇದು ಕಾಂಗ್ರೆಸ್‌ ಕಾರ್ಯಕರ್ತರನ್ನು ಕೆರಳಿಸುವಂತೆ ಮಾಡಿದೆ. ಜೆಡಿಎಸ್‌ ಪರವಾಗಿ ಮತ ಕೇಳಲು ಸಾಧ್ಯವೇ ಇಲ್ಲ. ರಾಜ್ಯ ಮಟ್ಟದ ನಾಯಕರು ಬೇಕಾದರೆ ವೇದಿಕೆಗೆ ಹೋಗಿ ಭಾಷಣ ಮಾಡಿಕೊಂಡು ಬರಲಿ. ಕಾರ್ಯಕರ್ತರು ಮಾತ್ರ ಮನೆ ಮನೆಗೆ ತೆರಳಿ ಜೆಡಿಎಸ್‌ ಬೆಂಬಲಿಸುವಂತೆ ಕೇಳಿಕೊಳ್ಳುವುದಿಲ್ಲ. ಜೆಡಿಎಸ್‌ ಮುಖಂಡರೊಂದಿಗೆ ಸೇರಿ ಕೆಲಸ ಮಾಡುವ ಪ್ರಶ್ನೆಯೇ ಇಲ್ಲ. ಜೆಡಿಎಸ್‌ನ ಕುಟುಂಬ ರಾಜಕಾರಣದ ಬಗ್ಗೆ ಜನರು ಈಗಾಗಲೇ ಮಾತನಾಡಿಕೊಳ್ಳುತ್ತಿದ್ದಾರೆ. ಅಂತಹ ಪಕ್ಷಕ್ಕೆ ಮತ ನೀಡುವಂತೆ ಜನರ ಬಳಿ ಹೋಗುವುದಾದರೂ ಹೇಗೆ ಎಂದು ಕಾಂಗ್ರೆಸ್‌ನ ಸ್ಥಳೀಯ ಮುಖಂಡರು ಪ್ರಶ್ನಿಸುತ್ತಿದ್ದಾರೆ. ಹಾಗಾಗಿ ಮೇಲ್ನೋಟಕ್ಕೆ ಮೈತ್ರಿಯಿದ್ದರೂ ಅಖಾಡದ ಒಳಗೆ ಒಗ್ಗಟ್ಟಿನ ಸೂತ್ರ ಕಾಣಿಸುವುದು ಕಷ್ಟವೆಂಬ ಮಾತುಗಳು ಕೇಳಿಬರುತ್ತಿವೆ.

ಖರ್ಗೆಯನ್ನು ಭೇಟಿಯಾದ ತುಮಕೂರು ಮುಖಂಡರು: ಹಿರಿಯ ನಾಯಕ ಮಲ್ಲಿಕಾರ್ಜುನ ಖರ್ಗೆ ಅವರನ್ನು ಭೇಟಿಯಾದ ತುಮಕೂರು ಜಿಲ್ಲಾ ಕಾಂಗ್ರೆಸ್‌ ಮುಖಂಡರು, ಈ ಕ್ಷೇತ್ರವನ್ನು ಕಾಂಗ್ರೆಸ್‌ಗೆ ಉಳಿಸಿಕೊಳ್ಳಬೇಕು. ಈ ಕುರಿತು ಹೈಕಮಾಂಡ್‌ ಮಟ್ಟದಲ್ಲಿ ತಾವು ಮಾತುಕತೆ ನಡೆಸಬೇಕು ಎಂದು ಆಗ್ರಹಿಸಿದ್ದಾರೆ. ಈ ನಿಯೋಗದಲ್ಲಿ ಕ್ಷೇತ್ರದ ಹಾಲಿ ಸಂಸದ ಮುದ್ದಹನುಮೇಗೌಡ, ಸಚಿವ ವೆಂಕಟರಮಣಪ್ಪ, ಮಾಜಿ ಶಾಸಕರಾದ ಕೆ.ಎನ್‌.ರಾಜಣ್ಣ, ಷಡಕ್ಷರಿ ಮತ್ತಿತರರು ಇದ್ದರು.

ದೇಶಪಾಂಡೆ ವಿರೋಧ : ಉತ್ತರ ಕನ್ನಡ ಕ್ಷೇತ್ರವನ್ನು ಜೆಡಿಎಸ್‌ಗೆ ಬಿಟ್ಟುಕೊಡುವ ನಿರ್ಧಾರವನ್ನು ಸಚಿವ ಆರ್‌.ವಿ.ದೇಶಪಾಂಡೆ ವಿರೋಧಿಸಿದ್ದಾರೆ. ”ಈ ಬಗ್ಗೆ ವರಿಷ್ಠರು ಮರು ಪರಿಶೀಲನೆ ಮಾಡಬೇಕು. ಜಿಲ್ಲೆಯಲ್ಲಿ ಕಾಂಗ್ರೆಸ್‌ ಶಕ್ತಿಯುತವಾಗಿದ್ದು, ಕಾಂಗ್ರೆಸ್‌ ಅಭ್ಯರ್ಥಿಯೇ ಇರಬೇಕು ಎನ್ನುವುದು ನನ್ನ ಮತ್ತು ಮಾರ್ಗರೇಟ್‌ ಆಳ್ವ ನಿಲುವಾಗಿದೆ. ಜೆಡಿಎಸ್‌ ಕೂಡ ವಾಸ್ತವ ಅರ್ಥ ಮಾಡಿಕೊಂಡು ಕ್ಷೇತ್ರದಲ್ಲಿ ಕಾಂಗ್ರೆಸ್‌ಗೆ ಬೆಂಬಲಿಸಲು ಮುಂದಾಗಬೇಕು,” ಎಂದು ದೇಶಪಾಂಡೆ ಟ್ವೀಟ್‌ ಮಾಡಿದ್ದಾರೆ.

ಪಕ್ಷದ ಚಟುವಟಿಕೆಯಿಂದ ಡಿಸಿಎಂ ದೂರ: ತುಮಕೂರು ಕ್ಷೇತ್ರ ಜೆಡಿಎಸ್‌ ಪಾಲಾಗಿದ್ದಕ್ಕೆ ಬೇಸರಿಸಿಕೊಂಡಿರುವ ಡಿಸಿಎಂ ಜಿ. ಪರಮೇಶ್ವರ್‌ ಪಕ್ಷದ ಚಟುವಟಿಕೆಯಿಂದ ದೂರವುಳಿದಿದ್ದಾರೆ. ಕೆಪಿಸಿಸಿ ಕಚೇರಿಯಲ್ಲಿ ನಡೆದ ಹಿರಿಯ ಮುಖಂಡರು ಹಾಗೂ ಪ್ರಚಾರ ಸಮಿತಿಯ ಮಹತ್ವದ ಸಭೆಗಳಿಗೂ ಅವರು ಹೋಗಲಿಲ್ಲ. ಕಾಂಗ್ರೆಸ್‌ ಕೈಪಿಡಿ ಬಿಡುಗಡೆ ಸಮಾರಂಭದಿಂದಲೂ ದೂರ ಉಳಿದರು.

ಸಿದ್ದರಾಮಯ್ಯ, ಮಾಜಿ ಸಿಎಂ: “ಹಾಲಿ ಸಂಸದರಿರುವ ಕ್ಷೇತ್ರ ಬಿಟ್ಟುಕೊಡಬಾರದೆಂದು ಹೇಳಿದ್ದೆವು. ಆದರೆ, ಹೈಕಮಾಂಡ್‌ನವರು ಈ ಬಗ್ಗೆ ನಿರ್ಧಾರ ಕೈಗೊಂಡಿದ್ದಾರೆ. ಹೊಂದಾಣಿಕೆಯೆಂದ ಮೇಲೆ ‘ಗಿವ್‌ ಆ್ಯಂಡ್‌ ಟೇಕ್‌ ಪಾಲಿಸಿ’ ಇದ್ದೇ ಇರುತ್ತದೆ.”

About the author

ಕನ್ನಡ ಟುಡೆ

Leave a Comment