ರಾಜ್ಯ ಸುದ್ದಿ

ನಮ್ಮ ಮೆಟ್ರೊದ ಎರಡನೇ 6 ಬೋಗಿಯ ಮತ್ತೊಂದು ರೈಲು ನಾಳೆಯಿಂದ ಸಂಚಾರ

ಬೆಂಗಳೂರು: ನಮ್ಮ ಮೆಟ್ರೊದ ಎರಡನೇ ಆರು ಬೋಗಿಯ ರೈಲು ಅ.4ರಿಂದ ಹಳಿಗೆ ಇಳಿಯಲಿದ್ದು, ಅಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಅವರು ಮೆಜೆಸ್ಟಿಕ್‌ ನಿಲ್ದಾಣದಲ್ಲಿ ಹಸಿರು ನಿಶಾನೆ ತೋರಲಿದ್ದಾರೆ. ಈ ಬಾರಿ ಹೊಸ ಆರು ಬೋಗಿಯ ರೈಲು ಹಸಿರು ಮಾರ್ಗ ನಾಗಸಂದ್ರದಿಂದ ಯಲಚೇನಹಳ್ಳಿ ಮಾರ್ಗದಲ್ಲೂ ಸಂಚರಿಸುವ ಸಾಧ್ಯತೆ ಇದೆ. ಆದರೆ, ಬಿಎಂಆರ್‌ಸಿಎಲ್‌ ಇದನ್ನು ಖಚಿತಪಡಿಸಿಲ್ಲ. ಪ್ರಯಾಣಿಕರ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು ಹಸಿರು ಮಾರ್ಗ ಅಥವಾ ನೇರಳೆ ಮಾರ್ಗದಲ್ಲಿ ಕಾರ್ಯಾಚರಣೆ ನಡೆಸಲು ನಿರ್ಧಾರ ತೆಗೆದುಕೊಳ್ಳಲಾಗುತ್ತದೆ ಎಂದು ಬಿಎಂಆರ್‌ಸಿಎಲ್‌ ತಿಳಿಸಿದೆ.

ಬೈಯ್ಯಪ್ಪನಹಳ್ಳಿಯಿಂದ ಮೈಸೂರು ರಸ್ತೆ ನೇರಳೆ ಮಾರ್ಗದಲ್ಲಿ ಅತಿ ಹೆಚ್ಟು ಪ್ರಯಾಣಿಕರಿದ್ದು, ಇಲ್ಲಿ ಆರು ಬೋಗಿ ರೈಲಿನ ಅಗತ್ಯತೆ ಹೆಚ್ಚಿದೆ. ಇದು ವೈಟ್‌ಫೀಲ್ಡ್‌ ಭಾಗಕ್ಕೂ ಸಂಪರ್ಕ ಕಲ್ಪಿಸುವ ಕಾರಣ ಖಾಸಗಿ ಉದ್ಯೋಗಿಗಳು, ಸರಕಾರಿ ಕಚೇರಿಗೆ ತೆರಳುವ ಪ್ರಯಾಣಿಕರ ಸಂಖ್ಯೆ ಹೆಚ್ಚಿದೆ. ಆರು ಬೋಗಿಯಲ್ಲಿ ಒಮ್ಮೆಗೆ 2,004 ಪ್ರಯಾಣಿಕರು ಸಂಚರಿಸಬಹುದಾಗಿದೆ. ಇದರಿಂದ ದಟ್ಟಣೆ ಸ್ವಲ್ಪ ಕಮ್ಮಿ ಆಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮೊದಲ ಆರು ಬೋಗಿ ರೈಲು 2018ರ ಫೆ. 14ರಂದು ಹಸ್ತಾಂತರವಾಗಿದ್ದರೂ, ಸಂಚಾರ ತಡವಾಗಿತ್ತು. ರೈಲ್ವೆ ಸುರಕ್ಷತಾ ಆಯುಕ್ತರ ಅನುಮತಿ ಪಡೆಯುವುದು ಸೇರಿದಂತೆ ಹಲವು ಪ್ರಕ್ರಿಯೆಗಳನ್ನು ನಡೆಸಬೇಕಿದ್ದರಿಂದ ಕಾರ್ಯಾರಂಭ ತಡವಾಗಿತ್ತು. ಆದರೆ, 2ನೇ ಆರು ಬೋಗಿ ರೈಲಿಗೆ ರೈಲ್ವೆ ಸುರಕ್ಷತಾ ಆಯುಕ್ತರ ಅನುಮತಿ ಅಗತ್ಯವಿಲ್ಲ. ಸೆಪ್ಟೆಂಬರ್‌ ತಿಂಗಳಲ್ಲಿ ಹೊಸ ರೈಲನ್ನು ಬೆಮೆಲ್‌ನಿಂದ ಪಡೆಯಲಾಗಿದ್ದು, ಅತಿ ಕಡಿಮೆ ಸಮಯದಲ್ಲೇ ಸಂಚಾರಕ್ಕೆ ಮುಕ್ತಗೊಳಿಸಲಾಗಿದೆ. ಕೇವಲ 3 ವಾರದಲ್ಲೇ ಹೊಸ ಬೋಗಿಗಳನ್ನು ಜೋಡಿಸಿ, ವಿದ್ಯುತ್‌ ಸಂಪರ್ಕ, ಬ್ರೇಕ್‌, ಸಿಗ್ನಲಿಂಗ್‌ ಮುಂತಾದ ಪರೀಕ್ಷೆಗೆ ಒಳಪಡಿಸಲಾಗಿದೆ.

About the author

ಕನ್ನಡ ಟುಡೆ

Leave a Comment