ಸಾಂಸ್ಕ್ರತಿಕ

ಪುರಾಣದ ಶ್ರೀ ರಾಮಚಂದ್ರ ಭಾರತೀಯರ ಹೃದಯವಾಸಿ: ಡಾ. ಚಂದ್ರಶೇಖರ ಕಂಬಾರ

ಹೊಸಪೇಟೆ: ರಾಮ ಅಯೋಧ್ಯೆಯಲ್ಲಿದ್ದಾನೆ ಎಂದರೆ ಅದು ಇತಿಹಾಸವಾಗುತ್ತದೆ. ಹೃದಯದಲ್ಲಿದ್ದಾನೆ ಎಂದರೆ ಅದು ಪುರಾಣವಾಗುತ್ತದೆ. ಈ ಹಿನ್ನೆಲೆಯಲ್ಲಿ ನಮ್ಮದು ಅಖಂಡ ಕಾಲದ ಕಲ್ಪನೆ ಎಂದು ಎಂದು ನಾಡೋಜ ಡಾ.ಚಂದ್ರಶೇಖರ ಕಂಬಾರ ಹೇಳಿದರು.

ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಮಂಟಪ ಸಭಾಂಗಣದಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ ಸಾಹಿತ್ಯ ಸಂವಾದದಲ್ಲಿ ಅವರು ಮಾತನಾಡಿದರು. ‘ಮೆಕಾಲೆ ಅವರು ಇತಿಹಾಸದ ಕಲ್ಪನೆ ಕೊಡುವುದಕ್ಕೂ ಮೊದಲೇ ನಮ್ಮಲ್ಲಿ ಕಾಲದ ಕಲ್ಪನೆ ಅಖಂಡವಾಗಿತ್ತು. ರಾಮ ಅಯೋಧ್ಯೆಯಲ್ಲಿದ್ದಾನೆ ಎಂದರೆ ಅದು ಇತಿಹಾಸವಾಗುತ್ತದೆ. ಹೃದಯದಲ್ಲಿದ್ದಾನೆ ಎಂದರೆ ಅದು ಪುರಾಣವಾಗುತ್ತದೆ. ಈ ಹಿನ್ನೆಲೆಯಲ್ಲಿ ನಮ್ಮದು ಅಖಂಡ ಕಾಲದ ಕಲ್ಪನೆ. ಆದರೆ, ಮೆಕಾಲೆ ಅವರು, ನಮ್ಮನ್ನು ಭೂತಕಾಲದಿಂದ ಕಿತ್ತು ದೂರ ಸರಿಸಿದರು. ಪಂಪನ ಕಾಲಕ್ಕೆ ಒಡ್ಡೋಲಗದಲ್ಲಿದ್ದವರನ್ನು ಸಂಬೋಧಿಸಿ ಕಾವ್ಯ ಬರೆದರೆ, ವಚನ ಕಾಲದಲ್ಲಿ ನೇರವಾಗಿ ದೇವರನ್ನು ಸಂಬೋಧಿಸಿ ಕಾವ್ಯ ರಚನೆಯಾಯಿತು. ಹರಿಹರ, ರಾಘವಾಂಕರು ಜನರನ್ನು ಸಂಬೋಧಿಸಿ ಬರೆದರೆ, ನವ್ಯಕಾಲದಲ್ಲಿ ವೈಯಕ್ತಿಕತೆ ಸಂಬೋಧಿಸಿ ಕಾವ್ಯ ರಚಿಸಲಾಯಿತು. ಆದರೆ, ನಾನು ಜನಪದರಿಗೆ ಸಮುದಾಯದವರಿಗೆ ಸಂಬಂಧಿಸಿದವನು. ಇವರನ್ನೇ ಸಂಬೋಧಿಸಿ ಕಾವ್ಯ ಬರೆದೆ” ಎಂದು ಕಾವ್ಯ ಪಯಣ ಬಿಚ್ಚಿಟ್ಟರು.

‘ನಾ ಸಣ್ಣಾವ ಇದ್ದಾಗ ದನ ಕಾಯುತ್ತಲೇ ಹಾಡು ಗುನುಗುತ್ತಿದ್ದೆ. ನನ್ನ ಸೋದರ ಕೈಕಾಲುಗಳನ್ನು ಕಟ್ಟಿ ಶಾಲೆಗೆ ಹಾಕಿ ಬರುತ್ತಿದ್ದ. ಬಾಲ್ಯದಲ್ಲಿ ಬಯಲಾಟಗಳನ್ನೇ ಹೆಚ್ಚು ನೋಡುತ್ತಿದ್ದೆ. ಇದುವೇ ನನಗೆ ಸಾಹಿತ್ಯ ರಚಿಸಲು ಪ್ರೇರಣೆಯಾಯಿತು. ನನ್ನ ತಾಯಿಯೇ ನನಗೆ ಸರಸ್ವತಿ. ತಾಯಿ ‘ಮಿಥ್‌’ ಕಲಿಸಿದರೆ ತಂದೆ ಇತಿಹಾಸ ಕಲಿಸುತ್ತಾನೆ. ತಾಯಿಯು ಕಾಪಾಡುವ ಗುಣ ಕಲಿಸಿದರೆ, ತಂದೆ ಸ್ಪರ್ಧೆಯನ್ನು ಕಲಿಸುತ್ತಾನೆ. 14 ಲೋಕಗಳ ಕಲ್ಪನೆ ಬಂದಿದ್ದೇ ತಾಯಿಯಿಂದ. ಬದುಕಿನ ಆನಂದ, ಬದುಕಿನ ಗುರಿ ಕೊಡುವುದು ಹೆಣ್ಣು. ತಾಯಿಯೇ ಸಂಸ್ಕೃತಿಯ ಪ್ರತಿನಿಧಿ’ ಎಂದರು.

ಸಂವಾದದ ಅಧ್ಯಕ್ಷ ತೆ ವಹಿಸಿದ್ದ ಹಿರಿಯ ವಿಮರ್ಶಕ ಡಾ.ಎಚ್‌.ಎಸ್‌.ರಾಘವೇಂದ್ರರಾವ್‌ ಮಾತನಾಡಿ, ‘ಕಂಬಾರರ ಏಕಾಂತ ಮತ್ತು ಲೋಕಾಂತ ಎರಡನ್ನೂ ಉಳಿಸಿಕೊಳ್ಳುವ ಶಕ್ತಿ ನಮಗೆ ಇಂದಿನ ಸವಾಲಾಗಿದೆ. ಸಮಕಾಲೀನ ಒತ್ತಡಗಳನ್ನು ಮೀರುವುದನ್ನು ಅವರ ಎಲ್ಲ ಕೃತಿಗಳಲ್ಲಿ ಕಾಣಬಹುದು. ಅವರು ಸದಾ ಹೇಳುತ್ತಿದ್ದಾರೆ, ಆದರೆ ನಾವು ಕೇಳುತ್ತಿಲ್ಲ’ ಎಂದರು. ಸಾಹಿತಿಗಳಾದ ವಿ.ಕೃಷ್ಣಮೂರ್ತಿರಾವ್‌, ಡಾ.ಹೇಮಾ ಪಟ್ಟಣಶೆಟ್ಟಿ, ಡಾ.ಶ್ಯಾಮಸುಂದರ ಬಿದರಕುಂದಿ, ಡಾ.ರಾಘವೇಂದ್ರ ಪಾಟೀಲ್‌, ಡಾ.ಬಾಳಾಸಾಹೇಬ ಲೋಕಾಪುರ, ಡಾ.ಸಿ.ಕೆ.ನಾವಲಗಿ ಅವರು ಸಂವಾದಲ್ಲಿ ಭಾಗವಹಿಸಿದ್ದರು. ಇದಕ್ಕೂ ಮೊದಲು ಗೊಂದಲಿಗರ ಹನುಮಂತಪ್ಪ ಮತ್ತು ಸಂಗಡಿಗರು ಗೊಂದಲಿಗರ ಪದ ಹಾಡಿದರು.

About the author

ಕನ್ನಡ ಟುಡೆ

Leave a Comment