ಸಿನಿ ಸಮಾಚಾರ

ಪ್ರೀಮಿಯರ್ ಪದ್ಮಿನಿ ಫ್ಯಾಮಿಲಿ ಕೇ ಲಿಯೇ ಎಂದ ಚಾಲೆಂಜಿಂಗ್ ಸ್ಟಾರ್

ನವರಸ ನಾಯಕ ಜಗ್ಗೇಶ್ ಅಭಿನಯದ ‘ಪ್ರಿಮಿಯರ್‌ ಪದ್ಮಿನಿ’ ಸಿನಿಮಾದ ಆಡಿಯೋ ಬಿಡುಗಡೆಯಾಗಿದೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರು ಚಿತ್ರದ ಆಡಿಯೋ ಬಿಡುಗಡೆ ಮಾಡಿ ಮೈಸೂರಿನ ತಮ್ಮ ಹಳೆಯ ನೆನಪನ್ನು ಮೆಲುಕು ಹಾಕಿದರು.

ಈ ಸಂದರ್ಭದಲ್ಲಿ ಒಂದು ಮಾತು ಹೇಳಲಿಕ್ಕೆ ಇಚ್ಛಿಸುತ್ತೇನೆ. ಬಹುಶಃ 1993-95ರಲ್ಲಿ ಮೈಸೂರಿನ ಮಂಡಿ ಮೊಹಲ್ಲಾದಲ್ಲಿ ನಮ್ಮ ಹುಡುಗರು ಮಾತನಾಡಿಕೊಳ್ಳುತ್ತಿದ್ದರು. ಅಂದರೆ ಯಾವುದೇ ಒಂದು ಕಾರನ್ನು ಡಿಫೈನ್ ಮಾಡುತ್ತಿದ್ದ ರೀತಿ ಅದು. ಮಾರುತಿ ಮರ್ನೆ ಕೆ ಲಿಯೇ, ಫಿಯಟ್ ಫ್ಯಾಮಿಲಿಕೆ ಲಿಯೇ, ಅಂಬಾಸಿಡರ್ ಜೀನೆ ಕೆ ಲಿಯೇ ಎಂದು ಹೇಳುತ್ತಿದ್ದೆವು ಎಂದು ಅಂದಿನ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ ದರ್ಶನ್. ಹಳೆ ಮೈಸೂರಿನ ಭಾಷೆಯಲ್ಲಿ ಈ ರೀತಿ ಹೇಳುತ್ತಿದ್ದರು. ಯಾಕೆಂದರೆ ಮಾರುತಿ ಅಷ್ಟು ದೃಢವಾಗಿ ಇರುತ್ತಿರಲಿಲ್ಲ. ಗುದ್ದಿ ತಕ್ಷಣ ಅದರಲ್ಲಿದ್ದವರು ಹೋಗುತ್ತಿದ್ದರು.

ಪ್ರೀಮಿಯರ್ ಪದ್ಮಿನಿ ಎಂದರೆ ಒಂದು ಪಕ್ಕಾ ಫ್ಯಾಮಿಲಿ ಓರಿಯೆಂಟೆಡ್ ಸಿನಿಮಾ ಅನ್ನಿಸುತ್ತಿದೆ. ಹಾಡುಗಳನ್ನು ಕೇಳಿದರೆ ಫ್ಯಾಮಿಲಿ ಫೀಲಿಂಗ್ ಬರುತ್ತದೆ. ಚಿತ್ರತಂಡಕ್ಕೆ ಶುಭವಾಗಲಿ ಎಂದಿದ್ದಾರೆ ದರ್ಶನ್.  ಶ್ರುತಿ ನಾಯ್ಡು ಅವರ ಬಗ್ಗೆ ಹೇಳಬೇಕು ಎಂದರೆ ಅವರ ಬಳಿ ಸಾಕಷ್ಟು ಕಾರುಗಳಿವೆ. ನಿಮಗ್ಯಾರಿಗೂ ಗೊತ್ತಿಲ್ಲ ಬೇಜಾನ್ ಗಾಡಿಗಳನ್ನು ಇಟ್ಟಿದ್ದಾರೆ. ಅವರ ಬಳಿ ಇದ್ದ ಕೂಪರ್ ಗಾಡಿಯನ್ನು ನಾನೇ ತಗೊಂಡಿದ್ದೇನೆ. ಅವರಿಗೆ ಕಾರಿನ ಬಗ್ಗೆ ಎಷ್ಟು ಪ್ಯಾಷನ್ ಇದೆ ಎಂಬುದು ಇದರಿಂದಲೇ ಅರ್ಥವಾಗುತ್ತದೆ. ಅವರ ಜರ್ನಿ ಅಲ್ಲಿಂದ ಹಿಡಿದು ಇಲ್ಲಿಯವರೆಗೆ ಅದ್ಭುತವಾದದ್ದು ಎಂದಿದ್ದಾರೆ ಚಾಲೆಂಜಿಂಗ್ ಸ್ಟಾರ್ ದರ್ಶನ್.

ನಾಗೇಂದ್ರ ಪ್ರಸಾದ್ ಹಾಗೂ ಯೋಗರಾಜ್ ಭಟ್ ಬರೆದಿರುವ ನಾಲ್ಕು ಹಾಡುಗಳು ಸಿನಿಮಾದಲಿವೆ. ಜಗ್ಗೇಶ್‌ ಮುಖ್ಯ ಭೂಮಿಕೆಯ ‘ಪ್ರಿಮಿಯರ್‌ ಪದ್ಮಿನಿ’ ಚಿತ್ರದ ಹಾಡುಗಳನ್ನು ದರ್ಶನ್‌ ಲೋಕಾರ್ಪಣೆ ಮಾಡಿದರು. ಶ್ರುತಿ ನಾಯ್ಡು ನಿರ್ಮಾಣದಲ್ಲಿ ಈ ಸಿನಿಮಾ ಮೂಡಿ ಬಂದಿದ್ದು, ರಮೇಶ್‌ ಇಂದಿರಾ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಆಡಿಯೋ ಬಿಡುಗಡೆ ಸಮಾರಂಭದಲ್ಲಿ ಸಂಗೀತ ನಿರ್ದೇಶಕ ಅರ್ಜುನ್‌ ಜನ್ಯ, ನಟ ಪ್ರಮೋದ್‌, ವಿವೇಕ ಸಿಂಹ ಸೇರಿದಂತೆ ಹಲವು ಕಲಾವಿದರು ಹಾಜರಿದ್ದರು.

About the author

ಕನ್ನಡ ಟುಡೆ

Leave a Comment