ರಾಜ್ಯ ಸುದ್ದಿ

ಬರಗಾಲ ಬವಣೆ ಚರ್ಚೆಗೆ ಸದಸ್ಯರದ್ದೇ ಬರ

ಬೆಳಗಾವಿ: ರಾಜ್ಯದಲ್ಲಿನ ಬರ ಪರಿಸ್ಥಿತಿ ಕುರಿತಂತೆ ಚರ್ಚೆ ಮುಂದುವರಿಕೆ ವಿಚಾರದಲ್ಲಿ ಪ್ರತಿಪಕ್ಷ ನಾಯಕ ಬಿ.ಎಸ್‌.ಯಡಿಯೂರಪ್ಪ ಹಾಗೂ ಸಭಾಧ್ಯಕ್ಷ ಕೆ.ಆರ್‌.ರಮೇಶ್‌ಕುಮಾರ್‌ ಮಧ್ಯೆ ಗುರುವಾರ ವಿಧಾನಸಭೆಯಲ್ಲಿ ತೀವ್ರ ವಾಗ್ವಾದ ನಡೆಯಿತಲ್ಲದೇ, ದಿನದ ಅಂತ್ಯದಲ್ಲಿ ಬರಗಾಲ ಕುರಿತ ಚರ್ಚೆಗೆ ಸದಸ್ಯರ ಬರವೂ ಕಂಡು ಬಂತು.

ಭೋಜನ ವಿರಾಮದ ಬಳಿಕ ಭರ್ತಿ ಒಂದು ತಾಸು ತಡವಾಗಿ ಕಲಾಪ ಪ್ರಾರಂಭಗೊಂಡದ್ದು ಬಿಎಸ್‌ವೈ ಕ್ರೋಶಕ್ಕೆ ಕಾರಣವಾದರೆ, ಸತತ ಮೂರು ದಿನಗಳ ಚರ್ಚೆ ಬಳಿಕವೂ ಬರದ ಚರ್ಚೆ ಮುಂದುವರಿಕೆಗೆ ಪ್ರತಿಪಕ್ಷ ದ ಪಟ್ಟು ಹಿಡಿದದ್ದು ಸ್ಪೀಕರ್‌ ಕೆರಳುವಂತೆ ಮಾಡಿತು.

4 ಗಂಟೆ ಸುಮಾರಿಗೆ ತಡವಾಗಿ ಕಲಾಪ ಆರಂಭವಾದಾಗ ಪ್ರತಿಪಕ್ಷ ಸದಸ್ಯರು ವಿಳಂಬಕ್ಕೆ ಆಕ್ಷೇಪಿಸಿದರು. ಡೆಪ್ಯೂಟಿ ಸ್ಪೀಕರ್‌ ಕೃಷ್ಣಾರೆಡ್ಡಿ ಬರದ ಚರ್ಚೆ ಮುಗಿದಿದ್ದು, ಬೇರೆ ಕಲಾಪ ಕೈಗೆತ್ತಿಕೊಳ್ಳುವುದಾಗಿ ಪ್ರಕಟಿಸಿದರು. ಈ ಹಂತದಲ್ಲಿ ಆಕ್ರೋಶಗೊಂಡ  ಯಡಿಯೂರಪ್ಪ ಅವರು ”ಕಾಟಾಚಾರಕ್ಕೆ ಏಕೆ ಕಲಾಪ ನಡೆಸುತ್ತೀರಿ? ಎಂದು ಪ್ರಶ್ನಿಸಿದರು. ”ರಾಜ್ಯಾದ್ಯಂತ ಬರ ಪರಿಸ್ಥಿತಿ ಇದ್ದು, ನಮ್ಮ ಸದಸ್ಯರು ಸಮಸ್ಯೆ ಹೇಳಬೇಕು. ಅದಕ್ಕಾಗಿ ಚರ್ಚೆಗೆ ಅವಕಾಶ ಬೇಕು, ಎಂದು ಯಡಿಯೂರಪ್ಪ ಪಟ್ಟುಹಿಡಿದರು. ಈ ಹಂತದಲ್ಲಿ ಮಾತನಾಡಿದ ಕಂದಾಯ ಸಚಿವ ಅರ್‌.ವಿ.ದೇಶಪಾಂಡೆ, ಜೆಡಿಎಸ್‌ನ ಕೆ.ಎಂ.ಶಿವಲಿಂಗೇಗೌಡ ಮತ್ತಿತರ ಸದಸ್ಯರು, ಮೂರು ದಿನಗಳಿಂದ ಕಲಾಪ ಪಟ್ಟಿಯಲ್ಲಿರುವ ವಿಚಾರಗಳು ಬರುತ್ತಿಲ್ಲ. ಬರ ಒಂದೇ ವಿಚಾರ ಚರ್ಚಿಸಿದರೆ ಬೇರೆ ವಿಚಾರ ಚರ್ಚೆ ಹೇಗೆ ಎಂದು ತಕರಾರು ಎತ್ತಿದರು. ಈ ವೇಳೆ ಬಿಜೆಪಿಯ ಎಂ.ಪಿ.ರೇಣುಕಾಚಾರ್ಯ ಹಾಗೂ ಶಿವಲಿಂಗೇಗೌಡ ಮಧ್ಯೆ ಏಕವಚನದಲ್ಲಿ ಪರಸ್ಪರ ನಿಂದನೆ ಮಾತುಗಳೂ ವಿನಿಮಯವಾದವು. ಸುಮಾರು ಅರ್ಧತಾಸು ವಾಗ್ವಾದವಾಯಿತು. ಬಳಿಕ ಪೀಠಕ್ಕೆ ಬಂದ ಸ್ಪೀಕರ್‌ ರಮೇಶ್‌ಕುಮಾರ್‌,”ರಾಜ್ಯದಲ್ಲಿ ಬರ ಇಲ್ಲ ಮತ್ತು ಬರದ ವಿಚಾರ ಮುಖ್ಯವಲ್ಲ ಎಂದು ಯಾರೂ ಹೇಳುತ್ತಿಲ್ಲ. ಶಾಸನ ರಚನೆ ಮತ್ತಿತರ ಕಲಾಪವನ್ನೂ ಕೈಗೆತ್ತಿಕೊಳ್ಳಬೇಕು. ಬರದ ವಿಚಾರವನ್ನೇ ಚರ್ಚಿಸುತ್ತಾ ಕುಳಿತರೆ ಉಳಿದ ವಿಚಾರಗಳ ಚರ್ಚೆ ಮಾಡುವುದು ಹೇಗೆ?,” ಎಂದು ಸ್ಪೀಕರ್‌ ಗರಂ ಆದರು.

ವಾದ- ಪ್ರತಿವಾದ 

ಸ್ಪೀಕರ್‌ ವಾದಕ್ಕೆ ತಿರುಗೇಟು ನೀಡಿದ ಯಡಿಯೂರಪ್ಪ ”ನಿಗದಿಯಂತೆ ಕಲಾಪ ನಡೆಸುತ್ತಿಲ್ಲ ಮತ್ತು ಚರ್ಚೆ ವೇಳೆ ಸಚಿವರು ಸದನದಲ್ಲಿ ಇರುವುದಿಲ್ಲ,” ಎಂದು ವಾದಿಸಿದರು. ”ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಹಾಲು ಉತ್ಪಾದಕರ ಸಮಸ್ಯೆ ಬಗ್ಗೆ ಸಿಎಂ ಜತೆ ಸಭೆ ನಿಗದಿಯಾಗಿತ್ತು. ಹೀಗಾಗಿ, ಕಲಾಪ ಆರಂಭವೂ ತಡವಾಗಿದೆ. ಸಹಕರಿಸಿ,” ಎಂದು ಸ್ಪೀಕರ್‌ ಕೇಳಿದರು.

ಈ ಮಾತು ಹೇಳಿ ಸ್ಪೀಕರ್‌ ಶಾಸನ ರಚನೆ ಕಲಾಪ ಕೈಗೆತ್ತಿಕೊಳ್ಳಲು ಮುಂದಾದಾಗ ಯಡಿಯೂರಪ್ಪ ಆಕ್ಷೇಪಿಸಿದರು. ವಿಧೇಯಕಗಳನ್ನು ಅಭ್ಯಾಸ ಮಾಡಲು ಸಮಯ ಬೇಕು ಎಂದರು. ನಿನ್ನೆಯೇ ವಿಧೇಯಕ ಮಂಡನೆಯಾಗಿವೆ ಎಂದು ಸ್ಪೀಕರ್‌ ತಿರುಗೇಟು ನೀಡಿದರು. ಕನಿಷ್ಠ ಇನ್ನೂ ಒಂದು ತಾಸು ಬರದ ಚರ್ಚೆಗೆ ಅವಕಾಶ ಬೇಕು ಎಂದು ಯಡಿಯೂರಪ್ಪ ಪಟ್ಟುಹಿಡಿದರು. ಒಂದು ತಾಸು ಚರ್ಚೆ ಮಾಡಿದರೆ ಮಳೆ ಬರಲ್ಲ ಬಿಡಿ ಎಂದು ಸ್ಪೀಕರ್‌ ವ್ಯಂಗ್ಯವಾಡಿದರು. ಇದರಿಂದ ಕೆರಳಿದ ಯಡಿಯೂರಪ್ಪ ”ಈ ಸರಕಾರ ರೈತರನ್ನು ಬದುಕಿಸಲ್ಲ. ವಿಷ ಸೇವಿಸಿ ಸಾಯುವಂತೆ ಮಾಡುತ್ತದೆ,” ಎಂದು ಆಕ್ರೋಶ ವ್ಯಕ್ತಪಡಿಸಿದರು. ”ನಿಮ್ಮ ಈ ವಾದಕ್ಕೆ ನಾನು ಉತ್ತರ ಕೊಡಲು ಆಗಲ್ಲ,” ಎಂದು ಸ್ಪೀಕರ್‌ ಟಾಂಗ್‌ ನೀಡಿದರು. ಬಳಿಕ ಒತ್ತಡಕ್ಕೆ ಮಣಿದ ಸ್ಪೀಕರ್‌ ಬರ ಕುರಿತಂತೆ ಚರ್ಚೆ ಮುಂದುವರಿಕೆಗೆ ಸಮ್ಮತಿ ನೀಡಿದರು.

ಪ್ರತಿಪಕ್ಷ ಸದಸ್ಯರ ಖಾಲಿ 

ದಿನದ ಕಲಾಪ ಅಂತ್ಯವಾಗುವ ವರೆಗೆ ಬರದ ಬಗ್ಗೆ ಚರ್ಚೆ ನಡೆಯಿತಾದರೂ, ಸದನದಲ್ಲಿ ಸದಸ್ಯರ ‘ಬರ’ ಕಾಡಿತು. ಸದಸ್ಯರು ಮಾತನಾಡುವ ತಮ್ಮ ಅವಕಾಶ ಮುಗಿಸಿ ಆಸನ ಖಾಲಿ ಮಾಡುತ್ತಿದ್ದ ಕಾರಣ ಆಡಳಿತ ಮತ್ತು ಪ್ರತಿಪಕ್ಷ ಸಾಲು ಸಂಜೆ ವೇಳೆಗೆ ಖಾಲಿಖಾಲಿಯಾಗಿ ಕಂಡಿತು.

ರಾಜ್ಯದಲ್ಲಿ ಸರಕಾರ ಸತ್ತಿದೆ. ಇದೊಂದು ಜೀವಂತಿಕೆ ಇಲ್ಲದ, ಹೃದಯಹೀನ ಸರಕಾರ. ಹಲವು ತಾಲೂಕುಗಳು ಬರಪೀಡಿತವಾಗಿದ್ದರೂ ಸರಕಾರ ಗಮನ ಹರಿಸಿಲ್ಲ.
-ಪಿ.ರಾಜೀವ್‌, ಕುಡಚಿ ಶಾಸಕ 

ಮಲೆನಾಡಿನಲ್ಲೂ ಅಂತರ್ಜಲ ಸಾವಿರ ಅಡಿಗೆ ಕುಸಿದಿದೆ. ತಿಂಗಳಾದರೂ ಟಿ.ಸಿ.ಗಳ ಬದಲಾವಣೆ ಮಾಡದ ಕಾರಣ ಬೋರ್‌ವೆಲ್‌ಗಳು ಕೆಲಸ ಮಾಡುತ್ತಿಲ್ಲ.
-ಅರಗ ಜ್ಞಾನೇಂದ್ರ, ತೀರ್ಥಹಳ್ಳಿ ಶಾಸಕ 

ಬರಪೀಡಿತ ಪ್ರತಿ ತಾಲೂಕುಗಳಿಗೆ ಕನಿಷ್ಠ 5 ಕೋಟಿ ರೂ. ಬಿಡುಗಡೆ ಮಾಡಬೇಕು.
-ಜಿ.ಕರುಣಾಕರ ರೆಡ್ಡಿ, ಹರಪನಹಳ್ಳಿ ಶಾಸಕ 

ಆಳಂದ ತಾಲೂಕು ಜನತೆ ಬರದಿಂದ ಕಂಗಾಲಾಗಿ ಉದ್ಯೋಗವಿಲ್ಲದೆ ಪುಣೆ, ಮುಂಬೈನತ್ತ ಗುಳೇ ಹೊರಟಿದ್ದಾರೆ. ಸರಕಾರ ತಕ್ಷ ಣ ಆಳಂದ ತಾಲೂಕನ್ನು ಬರಪೀಡಿತ ಎಂದು ಘೋಷಣೆ ಮಾಡಬೇಕು.
-ಸುಭಾಷ್‌ ಗುತ್ತೇದಾರ್‌, ಆಳಂದ ಶಾಸಕ

About the author

ಕನ್ನಡ ಟುಡೆ

Leave a Comment