ರಾಷ್ಟ್ರ ಸುದ್ದಿ

ಬಹುಮತದ ಮೋದಿ ಸರಕಾರದಿಂದ ಮಾತ್ರ ದೇಶದ ಭದ್ರತೆ ಖಾತ್ರಿ: ಅಮಿತ್ ಶಾ

ಹೊಸದಿಲ್ಲಿ: ನರೇಂದ್ರ ಮೋದಿ ನಾಯಕತ್ವದ ಸ್ಪಷ್ಟ ಬಹುಮತವುಳ್ಳ ಸ್ಥಿರ ಸರಕಾರ ಮಾತ್ರ ದೇಶದ ಮುಂದಿರುವ ಸವಾಲುಗಳನ್ನು ಸಮರ್ಥವಾಗಿ ಎದುರಿಸಬಲ್ಲದು ಎಂದು ಬಿಜೆಪಿ ಅಧ್ಯಕ್ಷ ಅಮಿತ್ ಶಾ ಹೇಳಿದ್ದಾರೆ. ಆರ್ಥಿಕ ಪ್ರಗತಿಯ ಸವಾಲುಗಳು ಹಾಗೂ ದೇಶದ ಭದ್ರತೆಗೆ ಎದುರಾಗುವ ಸವಾಲುಗಳನ್ನು ದಿಟ್ಟತನದಿಂದ ಎದುರಿಸಬೇಕಿದ್ದರೆ ಮೋದಿ ನೇತೃತ್ವದ ಸ್ಥಿರ ಹಾಗೂ ಬಲಿಷ್ಠ ಸರಕಾರವೇ ಬೇಕು ಎಂದು ಅವರು ಪ್ರತಿಪಾದಿಸಿದರು.

ಚುನಾವಣೆ ದಿನಾಂಕಗಳು ಘೋಷಣೆಯಾದ ಬಳಿಕ ಟೈಮ್ಸ್‌ ಆಫ್ ಇಂಡಿಯಾಗೆ ನೀಡಿದ ಮೊದಲ ಮಾಧ್ಯಮ ಸಂದರ್ಶನದಲ್ಲಿ, ‘ಮೋದೀಜಿ ಅವರಲ್ಲಿ ನಾವು ಮಜಬೂತ್ ನಾಯಕನನ್ನು ಕಾಣುತ್ತೇವೆ. ಅವರ ಆಡಳಿತದಲ್ಲಿ ಭಾರತ ಮುಂಚೂಣಿ ಅರ್ಥವ್ಯವಸ್ಥೆಗಳಲ್ಲಿ ಒಂದಾಗಿ ಹೊರಹೊಮ್ಮಿದೆ. ದೇಶವನ್ನು ಯಾರು ಸುರಕ್ಷಿತವಾಗಿ ಇರಿಸಬಲ್ಲರು ಎಂಬುದು ಮತ್ತೊಂದು ಪ್ರಮುಖ ವಿಚಾರ. ಅದರಲ್ಲೂ ಮೋದಿಯವರೇ ಅತ್ಯಂತ ಸಮರ್ಥರು ಎಂಬುದು ಈ ಚುನಾವಣೆಯ ಪ್ರಮುಖ ವಿಚಾರವಾಗಲಿದೆ’ ಎಂದು ಅಮಿತ್ ಶಾ ನುಡಿದರು.

ಉಗ್ರ ನೆಲೆಗಳ ಮೇಲೆ ವೈಮಾನಿಕ ದಾಳಿಯನ್ನು ರಾಜಕೀಯಗೊಳಿಸಲಾಗುತ್ತಿದೆ ಎಂಬ ಆರೋಪವನ್ನು ತಳ್ಳಿಹಾಕಿದ ಅವರು, ‘ಭಯೋತ್ಪಾದಕ ದಾಳಿಗೆ ತಕ್ಕ ತಿರುಗೇಟು ನೀಡುವುದೆಂದರೆ ಭದ್ರತಾಪಡೆಗಳನ್ನು ರಾಜಕೀಯಗೊಳಿಸಿದಂತಾಗುವುದೆ?’ ಎಂದು ಮರು ಪ್ರಶ್ನೆ ಹಾಕಿದರು. ಈ ಬಾರಿ ಬಿಜೆಪಿ ಇನ್ನೂ ಹೆಚ್ಚಿನ ಬಹುಮತದಿಂದ ಗೆದ್ದು ಬರುತ್ತದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ ಅಮಿತ್ ಶಾ, 2014ರಲ್ಲಿ ಭಾರೀ ಬಹುಮತದಿಂದ ಗೆದ್ದ ಕ್ಷೇತ್ರಗಳಲ್ಲಿ ಈ ಬಾರಿ ಕಡಿಮೆ ಸ್ಥಾನಗಳು ಬರಬಹುದೆಂಬ ಆರೋಪಗಳನ್ನು ತಳ್ಳಿಹಾಕಿದರು. ‘ಸರಕಾರದ ಬಗ್ಗೆ ಜನತೆಗಿರುವ ಸದಭಿಪ್ರಾಯವೇ ಬಿಜೆಪಿಗೆ ಶ್ರೀರಕ್ಷೆ. ಕಳೆದ ಬಾರಿ ಗೆದ್ದ ಪ್ರದೇಶಗಳಷ್ಟೇ ಅಲ್ಲ, ಈಶಾನ್ಯ ರಾಜ್ಯಗಳು, ಪಶ್ಚಿಮ ಬಂಗಾಳ, ಒಡಿಶಾ ಮತ್ತು ದಕ್ಷಿಣದ ರಾಜ್ಯಗಳಲ್ಲೂ ನಾವು ಹೆಚ್ಚು ಸಂಖ್ಯೆಯ ಸ್ಥಾನಗಳನ್ನು ಗೆಲ್ಲಲಿದ್ದೇವೆ’ ಎಂದು ಅಮಿತ್ ಶಾ ಟೈಮ್ಸ್‌ ಆಫ್‌ ಇಂಡಿಯಾಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹೇಳಿದರು.

ನಿರುದ್ಯೋಗ ಪ್ರಮಾಣ ಹೆಚ್ಚಿದೆ ಎಂಬ ಪ್ರತಿಪಕ್ಷದ ಆರೋಪಗಳನ್ನು ನಿರಾಕರಿಸಿದ ಅವರು, ಮೂಲಸೌಕರ್ಯ ಅಭಿವೃದ್ಧಿ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಆಗುತ್ತಿರಬೇಕಾದರೆ, ಉದ್ಯೋಗಾವಕಾಶ ಸೃಷ್ಟಿಯಾಗಿಲ್ಲ ಎನ್ನುವುದರಲ್ಲಿ ಅರ್ಥವಿಲ್ಲ. ಲಭ್ಯವಿರುವ ಅಂಕಿ ಅಂಶಗಳು ಪೂರ್ಣ ಪ್ರಮಾಣದಲ್ಲಿ ಉದ್ಯೋಗಗಳ ಸೃಷ್ಟಿ ಬಗ್ಗೆ ಮಾಹಿತಿ ನೀಡುತ್ತಿಲ್ಲ ಎಂದು ಪ್ರತಿಪಾದಿಸಿದರು. ಕೃಷಿ ಸಮಸ್ಯೆಗಳನ್ನು ಪ್ರಸ್ತಾಪಿಸುತ್ತ, ರೈತರ ಆದಾಯ ಹೆಚ್ಚಿಸಲು ಸರಕಾರ ಹಲವು ಕ್ರಮಗಳನ್ನು ಕೈಗೊಂಡಿದೆ. ಅದರಲ್ಲಿ ವಾರ್ಷಿಕ 6,000 ರೂ.ಗಳ ಗೌರವಧನವನ್ನು ಅನ್ನದಾತನಿಗೆ ನೇರವಾಗಿ ನೀಡುವುದೂ ಸೇರಿದೆ ಎಂದು ಶಾ ಉತ್ತರಿಸಿದರು.

About the author

ಕನ್ನಡ ಟುಡೆ

Leave a Comment