ದೇಶ ವಿದೇಶ

ಬಾಹ್ಯಾಕಾಶಕ್ಕೆ ಮಾನವ ಯಾನ: ಭಾರತದೊಂದಿಗೆ ಜಿದ್ದಿಗೆ ಬಿದ್ದ ಪಾಕಿಸ್ತಾನ

ಇಸ್ಲಾಮಾಬಾದ್‌: ಭಾರತದ ಬಹು ಅಪೇಕ್ಷಿತ ಮಾನವ ಸಹಿತ ಬಾಹ್ಯಾಕಾಶ ಯಾನ ಕೈಗೊಳ್ಳಲು ಭರ್ಜರಿ ತಯಾರಿ ನಡೆಸುತ್ತಿರುವ ಮಧ್ಯೆ ನೆರೆಯ ಪಾಕಿಸ್ತಾನವೂ ಇದೇ ಯೋಜನೆಗೆ ಕೈಹಾಕಿದೆ. ಚೀನಾದ ಸಹಾಯದೊಂದಿಗೆ 2022ಕ್ಕೆ ಮೊದಲ ಮಾನವ ಸಹಿತ ಬಾಹ್ಯಾಕಾಶ ಯೋಜನೆ ಕೈಗೊಳ್ಳುತ್ತಿರುವ ಬಗ್ಗೆ ಪಾಕಿಸ್ತಾನ ಘೋಷಣೆ ಮಾಡಿದೆ.

ಮಾಹಿತಿ ಸಚಿವ ಫಹಾದ್‌ ಚೌಧರಿ ಗುರುವಾರ ಈ ಬಗ್ಗೆ ಘೋಷಣೆ ಮಾಡಿದ್ದಾರೆ. ಭಾರತವೂ 2022ಕ್ಕೆ ಬಾಹ್ಯಾಕಾಶಕ್ಕೆ ಮಾನವನನ್ನು ಕಳುಹಿಸುವ ಯೋಜನೆ ಹಾಕಿಕೊಂಡಿದ್ದು, ಮೊದಲು ಬಾಹ್ಯಾಕಾಶಕ್ಕೆ ಮಾನವನನ್ನು ಯಾರು ಕಳುಹಿಸುತ್ತಾರೆ ಎಂಬ ಸ್ಪರ್ಧೆ ಸದ್ದಿಲ್ಲದೆ ಏರ್ಪಟ್ಟಿದೆ. ಪ್ರಧಾನಿ ಇಮ್ರಾನ್‌ ಖಾನ್‌ ನೇತೃತ್ವದಲ್ಲಿ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಮಾನವ ಸಹಿತ ಬಾಹ್ಯಾಕಾಶ ಯೋಜನೆ ಕೈಗೊಳ್ಳುವ ಬಗ್ಗೆ ನಿರ್ಧಾರ ಕೈಗೊಳ್ಳಲಾಗಿದೆ. ನವೆಂಬರ್‌ 3ಕ್ಕೆ ಇಮ್ರಾನ್‌ ಖಾನ್‌ ಬೀಜಿಂಗ್‌ಗೆ ಭೇಟಿ ನೀಡುತ್ತಿದ್ದು, ಮಹತ್ವದ ಯೋಜನೆಗೆ ಚೀನಾ ಸಹಕರಿಸುವ ಕುರಿತಂತೆ ಚರ್ಚಿಸಲಿದ್ದಾರೆ ಎನ್ನಲಾಗಿದೆ.

ಪಾಕಿಸ್ತಾನ ಬಾಹ್ಯಾಕಾಶ ಸಂಸ್ಥೆ ಮತ್ತು ಚೀನಾದ ಕಂಪನಿ ಜತೆ ಈಗಾಗಲೇ ಯೋಜನೆ ಕುರಿತಾದ ಒಡಂಬಡಿಕೆ ಮಾಡಿಕೊಳ್ಳಲಾಗಿದೆ ಎಂದು ಚೌಧರಿ ತಿಳಿಸಿದ್ದಾರೆ. ‘ಬಾಹ್ಯಾಕಾಶಕ್ಕೆ ಮಾನವನನ್ನು ಕಳುಹಿಸಿದ 4ನೇ ರಾಷ್ಟ್ರ ಭಾರತವಾಗಲಿದೆ. 2022ಕ್ಕೆ ಮಾನವನನ್ನು ಕಳುಹಿಸಲಿದ್ದೇವೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಸ್ವಾತಂತ್ರ್ಯೋತ್ಸವದ ಭಾಷಣದಲ್ಲಿ ಘೋಷಿಸಿದ್ದರು. ಇದೀಗ ಪಾಕಿಸ್ತಾನವೂ ಮಾನವನನ್ನು ಬಾಹ್ಯಾಕಾಶಕ್ಕೆ ಕಳುಹಿಸುವ ಮಹತ್ವದ ಯೋಜನೆಗೆ ಮುಂದಾಗಿದ್ದು, ಚೀನಾ ಸಹಾಯ ಮಾಡುತ್ತಿರುವ ಕಾರಣ ಭಾರತದ ಜತೆ ಬಾಹ್ಯಾಕಾಶ ಯೋಜನೆ ವಿಚಾರದಲ್ಲೂ ಜಿದ್ದಿಗೆ ಬಿದ್ದಿರುವುದು ಸ್ಪಷ್ಟವಾಗಿದೆ. ಮಿತ್ರ ರಾಷ್ಟ್ರ ಪಾಕಿಸ್ತಾನವನ್ನು ಭಾರತಕ್ಕಿಂತ ಶ್ರೇಷ್ಠ ಎಂದು ಬಿಂಬಿಸುವ ನಿಟ್ಟಿನಲ್ಲಿ ಚೀನಾ ಎಂದಿನಂತೆ ತನ್ನ ಪ್ರಯತ್ನ ಮುಂದುವರಿಸಿದೆ.

ಇತ್ತೀಚೆಗೆ ಪಾಕಿಸ್ತಾನ ಸ್ವನಿರ್ಮಾಣದ ಉಪಗ್ರಹಗಳನ್ನು ಚೀನಾದ ರಾಕೆಟ್‌ ‘ಚೈನೀಸ್‌ ಲಾಂಗ್‌ ಮಾರ್ಚ್‌ (ಎಲ್‌ಎಂ-2ಸಿ) ಮೂಲಕ ಉಡಾವಣೆ ಮಾಡಿತ್ತು. ಚೀನಾದ ಗೋಬಿ ಮರುಭೂಮಿಯಲ್ಲಿರುವ ಉಡ್ಡಯನ ಕೇಂದ್ರದಿಂದ ಉಪಗ್ರಹಗಳನ್ನು ಉಡಾವಣೆ ಮಾಡಿತ್ತು. ಚೀನಾ 2003ರಲ್ಲಿ ಮೊದಲ ಬಾರಿಗೆ ಮಾನವ ಸಹಿತ ಬಾಹ್ಯಾಕಾಶ ಯೋಜನೆ ಕೈಗೊಂಡಿತ್ತು. ಈ ಮೂಲಕ ಮಾನವನನ್ನು ಬಾಹ್ಯಾಕಾಶಕ್ಕೆ ಕಳುಹಿಸಿದ ವಿಶ್ವದ 3ನೇ ರಾಷ್ಟ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಅಮೆರಿಕ ಮತ್ತು ರಷ್ಯಾ ಮೊದಲೆರಡು ಸ್ಥಾನದಲ್ಲಿವೆ.

About the author

ಕನ್ನಡ ಟುಡೆ

Leave a Comment