ರಾಷ್ಟ್ರ ಸುದ್ದಿ

ಬಿಎಸ್‌ಎಫ್‌ನ ಮೊದಲ ಮಹಿಳಾ ಕಂಬ್ಯಾಟ್‌ ಆಫೀಸರ್‌ ತನುಶ್ರೀ ಪಾರೀಖ್‌

ದೇಶದ ಗಡಿ ಭದ್ರತಾ ಪಡೆಗೆ 51 ವರ್ಷಗಳ ಇತಿಹಾಸವಿದೆ. ಆದರೆ ಇದುವರೆಗೆ ಮಹಿಳೆಯರು ಅಲ್ಲಿ ಯೋಧರಾಗಿಲ್ಲ. ಈ ಪರಂಪರೆಯನ್ನು ಮುರಿದು, ಮೊದಲ ಮಹಿಳಾ ಬಿಎಸ್‌ಎಫ್‌ ಕಂಬ್ಯಾಟ್‌ ಆಫೀಸರ್‌ ಆಗಿ ಆಯ್ಕೆಯಾದವರು ತನುಶ್ರೀ ಪಾರೀಖ್‌. ರಾಜಸ್ಥಾನದ ಬಿಕಾನೇರ್‌ನಿಂದ ಬಂದ ಈ ಹುಡುಗಿ ಬಿಎಸ್‌ಎಫ್‌ನಲ್ಲೀಗ ಯೋಧೆ ಬಿಕಾನೇರ್‌ನ ಸರಕಾರಿ ಇಂಜಿನಿಯರಿಂಗ್‌ ಕಾಲೇಜಿನಲ್ಲಿ ಬಿಟೆಕ್‌ ಮುಗಿಸಿದ ತನುಶ್ರೀ, ಅಲ್ಲಿನ ನ್ಯಾಷನಲ್‌ ಕೆಡೆಟ್‌ ಕೋರ್‌ನಲ್ಲಿದ್ದಳು. ಬ್ಯಾಡ್ಮಿಂಟನ್‌, ಕುದುರೆ ಸವಾರಿ ಕಲಿತಿದ್ದಳು. ಅಲ್ಲಿಂದ ಸೈನ್ಯಕ್ಕೆ ಸೇರುವ ಹಂಬಲ ಮೊದಲಾಯಿತು. ಇಂಜಿನಿಯರಿಂಗ್‌ ಮುಗಿಸಿದ ಆಕೆಯನ್ನು ಮಲ್ಟಿನ್ಯಾಶನಲ್‌ ಕಂಪನಿ ಐಬಿಎಂ ಕೈಬೀಸಿ ಕರೆದಿತ್ತು. ಆದರೆ ಆಕೆ ಯಂತ್ರಗಳ ಸಹವಾಸ ಬಿಟ್ಟು ಸೈನ್ಯಕ್ಕೆ ಸೇರಲು ಮುಂದಾಗಿದ್ದಳು.

ತಂದೆ, ಪಶುವೈದ್ಯ ಎಸ್‌ಪಿ ಜೋಶಿ ಈಕೆಗೆ ಸದಾ ಬೆನ್ನೆಲುಬು. ಒಂದೇ ಒಂದು ದಿನವೂ ಜಿಮ್‌ಗೆ ಹೋಗದ ಈಕೆ ದೈಹಿಕ ಫಿಟ್‌ನೆಸ್‌ ಪರೀಕ್ಷೆಯಲ್ಲಿ ಪಾಸಾಗಲು, ಒಂದೇ ತಿಂಗಳಲ್ಲಿ ಹಠ ಹಿಡಿದು ಓಡಿ ಏಳು ಕಿಲೋ ಮೈತೂಕ ಇಳಿಸಿಕೊಂಡಳು. 2016ರಲ್ಲಿ ಬಿಎಸ್‌ಎಫ್‌ನ ಅಕಾಡೆಮಿಗೆ ಈಕೆ ತರಬೇತಿಗೆ ಸೇರಿದಾಗ, ಅಲ್ಲಿನವರಿಗೂ ಈಕೆ ಮೊದಲ ಮಹಿಳಾ ಆಫೀಸರ್‌ ಎಂಬ ಅರಿವೇ ಇರಲಿಲ್ಲ. ಸುಮಾರು 16,000 ಪುರುಷರ ನಡುವೆ ಈಕೆ ಒಬ್ಬಳೇ. ಅಧಿಕಾರಿಗಳೇನೂ ಈಕೆ ಮಹಿಳೆ ಎಂದು ರಿಯಾಯಿತಿ ತೋರಿಸಲಿಲ್ಲ. ಅದೇ ಆಕೆಗೆ ಬೇಕಾಗಿತ್ತು ಕೂಡ. ಒಂದು ವರ್ಷದ ಕಠಿಣ ತರಬೇತಿಯ ಬಳಿಕ ತನ್ನ ಬ್ಯಾಚ್‌ನಲ್ಲಿ ಎರಡನೆಯವಳಾಗಿ ಹೊರಹೊಮ್ಮಿದಾಗ ಆಕೆಗೆ ಹೆಮ್ಮೆ. ಅಲ್ಲಿ 20 ಟ್ರೈನೀಗಳು ಡ್ರಾಪೌಟ್‌ ಆಗಿದ್ದರು ಎಂಬುದನ್ನು ನೆನಪಿಡಬೇಕು.

ಬಿಎಸ್‌ಎಫ್‌ನ್ನೇ ಆರಿಸಿಕೊಳ್ಳಲೂ ಆಕೆಯಲ್ಲಿ ಕಾರಣವಿದೆ. ಇಲ್ಲಿ ಯೋಧರ ಶ್ರೇಯಾಂಕಗಳಲ್ಲೂ ಸಂಬಳದಲ್ಲೂ ಮಹಿಳೆಗೆ ಸಂಬಂಧಿಸಿದಂತೆ ಯಾವುದೇ ತಾರತಮ್ಯವಿಲ್ಲ. ಸದ್ಯ ತನುಶ್ರೀಯನ್ನು ಮಾದಕ ಪದಾರ್ಥಗಳ ಅವ್ಯಾಹತ ಕಳ್ಳಸಾಗಣೆ ನಡೆಯುತ್ತಿರುವ ಪಂಜಾಬ್‌- ಪಾಕಿಸ್ತಾನ ಗಡಿಯಲ್ಲಿ ನಿಯೋಜಿಸಲಾಗಿದೆ. ಗಡಿಯಾಚೆಯಿಂದ ಹೇಗೋ ಬರುತ್ತಿರುವ ಮಾದಕವಸ್ತುಗಳಿಗೆ ಪಂಜಾಬ್‌ನ ಗಂಡು- ಹೆಣ್ಣೆಂಬ ಭೇದವಿಲ್ಲದೆ ಬಹುಮಂದಿ ಬಲಿಯಾಗುತ್ತಿರುವುದನ್ನು ಕಂಡು ಆಕೆಗೆ ದುಃಖವಾಗುತ್ತದೆ. ಬಿಎಸ್‌ಎಫ್‌ಗೆ ಶಾಂತಿಸಮಯ-ಯುದ್ಧದ ಸಮಯ ಎಂಬ ಭೇದವಿಲ್ಲ. ಶನಿವಾರ- ಭಾನುವಾರಗಳಿಲ್ಲ. ನಿರಂತರ ಎಚ್ಚರದ ಪಹರೆ ಅನಿವಾರ‍್ಯ. ಗಡಿಯಲ್ಲೇ ಜೀವ ಹೋದರೂ ಅದು ಗೌರವಾರ್ಹ ಎಂಬ ಭಾವ ಆಕೆಯಲ್ಲಿದೆ. ಬೇಟಿ ಬಚಾವೊ, ಬೇಟಿ ಪಡಾವೊ ಅಭಿಯಾನದ ಅಂಬಾಸಡರ್‌ ಆಗಿರುವ ತನುಶ್ರೀ ರಜಾದಿನಗಳಲ್ಲಿ ಶಾಲೆಗಳಿಗೆ ಭೇಟಿ ನೀಡಿ ಅರಿವು ಮೂಡಿಸುವ
ಕೆಲಸ ಮಾಡುತ್ತಾರೆ.

About the author

ಕನ್ನಡ ಟುಡೆ

Leave a Comment