ರಾಜ್ಯ ಸುದ್ದಿ

ಮಗನಿಗೆ ಬುದ್ಧಿವಾದ ಹೇಳಿ: ದೇವೇಗೌಡರಿಗೆ ಸಿದ್ದರಾಮಯ್ಯ ಸಲಹೆ

ಬೆಂಗಳೂರು :ಸಿಎಂ  ಕುಮಾರಸ್ವಾಮಿ ಪದೇ ಪದೆ ವಿವಾದಾತ್ಮಕ ಹೇಳಿಕೆ ನೀಡುತ್ತಿರುವ ಹಿನ್ನೆಲೆಯಲ್ಲಿ ನಿಮ್ಮ ಪುತ್ರನಿಗೆ ಬುದ್ಧಿವಾದ ಹೇಳಿ ಎಂದು ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡ ಅವರಿಗೆ ಮಾಜಿ ಸಿಎಂ ಸಿದ್ದರಾಮಯ್ಯ ಕಿವಿಮಾತು ಹೇಳಿದ್ದಾರೆ.

ಸಿದ್ದರಾಮಯ್ಯ ಹಾಗೂ ದೇವೇಗೌಡ ಸೋಮವಾರ ಸಂಜೆ ಕುಮಾರಕೃಪ ಅತಿಥಿ ಗೃಹದಲ್ಲಿ ಭೇಟಿಯಾಗಿದ್ದರು. ಸಂಪುಟ ಸಭೆಯಿಂದ ಸಚಿವ ರಮೇಶ್‌ ಜಾರಕಿಹೊಳಿ ಹೊರನಡೆದ ಘಟನೆ ಹಾಗೂ ಮಂತ್ರಿಮಂಡಲ ವಿಸ್ತರಣೆಗೆ ಒತ್ತಡ ಹೆಚ್ಚುತ್ತಿರುವುದರಿಂದ ಉಭಯ ನಾಯಕರೂ ಸಮಾಲೋಚಿಸಿದ್ದರು ಎಂದು ಹೇಳಲಾಗಿದೆ. ಇದೇ ಸಂದರ್ಭದಲ್ಲಿ ರೈತ ಮಹಿಳೆ ಬಗ್ಗೆ ಸಿಎಂ ಎಚ್‌ಡಿಕೆ ಆಡಿರುವ ಮಾತಿನ ಕುರಿತು ಸಿದ್ದರಾಮಯ್ಯ ಪ್ರಸ್ತಾಪಿಸಿದರು. ಇಂತಹ ಹೇಳಿಕೆ ನೀಡಿದರೆ ವಿನಾಕಾರಣ ವಿವಾದವನ್ನು ಮೈಮೇಲೆ ಎಳೆದುಕೊಂಡಂತಾಗುತ್ತದೆ. ಇದರ ಅಗತ್ಯವಿತ್ತಾ ಎಂದು ಪ್ರಶ್ನಿಸಿದರು. ಕುಮಾರಸ್ವಾಮಿ ಅವರಿಗೆ ಮಹಿಳೆಯರ ಬಗ್ಗೆ ಅಗೌರವ ಇಲ್ಲ. ರೈತರ ಬಗ್ಗೆಯೂ ಕಾಳಜಿ ಹೊಂದಿದ್ದಾರೆ. ಅವರ ಹೇಳಿಕೆಯಲ್ಲಿ ಯಾವುದೇ ದುರುದ್ದೇಶ ಇರಲಿಲ್ಲವೆಂದು ದೇವೇಗೌಡರು ಸಮಜಾಯಿಷಿ ನೀಡಿದರು ಎನ್ನಲಾಗಿದೆ.

ಈ ಸಮರ್ಥನೆ ಒಪ್ಪದ ಸಿದ್ದರಾಮಯ್ಯ, ”ಮುಖ್ಯಮಂತ್ರಿ ಸ್ಥಾನದಲ್ಲಿದ್ದವರು ವಿವೇಚನೆಯಿಂದ ಮಾತಾಡಬೇಕು. ಮಾಧ್ಯಮದವರು ಕೇಳಿದಾಕ್ಷಣ ಎಲ್ಲ ವಿಚಾರಕ್ಕೂ ಪ್ರತಿಕ್ರಿಯಿಸಬಾರದು. ಅದರಲ್ಲೂ ರೈತರ ಸಮಸ್ಯೆಯಂತಹ ಸೂಕ್ಷ್ಮ ವಿಚಾರದಲ್ಲಿ ಮಾತನಾಡುವಾಗ ಹತ್ತು ಬಾರಿ ಯೋಚಿಸಿ ಮುಂದುವರಿಯಬೇಕು. ರಾಜಕಾರಣಿಗಳ ಮೇಲೆ ಒತ್ತಡ ಇರುವುದು ಸಹಜ. ಅದನ್ನು ಸಹನೆಯಿಂದಲೇ ನಿಭಾಯಿಸಬೇಕು. ಈ ಕುರಿತು ನಿಮ್ಮ ಸುದೀರ್ಘ ಅನುಭವದ ಆಧಾರದಲ್ಲಿ ಕುಮಾರಸ್ವಾಮಿ ಅವರಿಗೆ ತಿಳಿವಳಿಕೆ ಹೇಳಿ. ಇಕ್ಕಟ್ಟಿನ ರಾಜಕೀಯ ಸನ್ನಿವೇಶವನ್ನು ನಿಭಾಯಿಸಲು ಎಚ್‌ಡಿಕೆ ಅವರಿಗೆ ನಿಮಗಿಂತಲೂ ಉತ್ತಮ ಮಾರ್ಗದರ್ಶಕರು ಸಿಗಲಾರರು,” ಎಂದರು ಎಂದು ತಿಳಿದು ಬಂದಿದೆ.

ಮೈತ್ರಿಭಂಗದ ಆತಂಕ : ”ಸರಕಾರದ ನೇತೃತ್ವ ವಹಿಸಿದವರು ಹಗುರವಾಗಿ ಮಾತನಾಡಿದರೆ ಅದರ ಪರಿಣಾಮವನ್ನು ಮಿತ್ರಪಕ್ಷ ಕಾಂಗ್ರೆಸ್‌ ಕೂಡ ಅನುಭವಿಸಬೇಕಾಗಿ ಬರುತ್ತದೆ. ಈಗಾಗಲೇ ಕಾಂಗ್ರೆಸ್‌ನಲ್ಲಿ ಈ ಬಗ್ಗೆ ಅಸಮಾಧಾನವಿದೆ. ಇದನ್ನು ಮತ್ತಷ್ಟು ಬೆಳೆಯಗೊಟ್ಟರೆ ಪರಿಸ್ಥಿತಿ ಗಂಭೀರ ಸ್ವರೂಪವನ್ನೂ ಪಡೆದುಕೊಳ್ಳಬಹುದು. ಜಾತ್ಯತೀತ ನೆಲೆಯಲ್ಲಿ ಬಿಜೆಪಿಯನ್ನು ದೂರವಿಡಬೇಕು ಎಂಬ ಏಕೈಕ ಕಾರಣಕ್ಕೆ ಜೆಡಿಎಸ್‌ಗೆ ಕಾಂಗ್ರೆಸ್‌ ಬೆಂಬಲಿಸಿದೆ. ಸ್ಥಳೀಯವಾಗಿ ಎಷ್ಟೇ ಭಿನ್ನಾಭಿಪ್ರಾಯವಿದ್ದರೂ ಹೈಕಮಾಂಡ್‌ನ ಈ ತೀರ್ಮಾನ ಒಪ್ಪಿಕೊಂಡು ಸಹಕಾರ ನೀಡಲಾಗುತ್ತಿದೆ. ಸಿಎಂ ಅವರೂ ಇದನ್ನು ಅರ್ಥ ಮಾಡಿಕೊಳ್ಳಬೇಕು. ಲೋಕಸಭೆ ಚುನಾವಣೆ ಸಮೀಪಿಸುತ್ತಿರುವುದರಿಂದ ಮೈತ್ರಿಯಲ್ಲಿ ಯಾವುದೇ ಗೊಂದಲವಾಗದಂತೆ ಮುಂಜಾಗ್ರತೆ ವಹಿಸಬೇಕು. ಎರಡೂ ಪಕ್ಷಗಳ ನಾಯಕರಿಗೆ ಈ ಹೊಣೆಗಾರಿಕೆಯಿದೆ. ಸಿಎಂ ಅವರಿಗೆ ಮತ್ತಷ್ಟು ಹೆಚ್ಚಿನ ಜವಾಬ್ದಾರಿ ಇರುತ್ತದೆ,” ಎಂದು ದೇವೇಗೌಡ ಅವರ ಮುಂದೆ ಸಿದ್ದರಾಮಯ್ಯ ಪ್ರಸ್ತಾಪಿಸಿದರು ಎಂದು ಹೇಳಲಾಗಿದೆ.

ಸಿಎಂ ಹೇಳಿಕೆ ಬಗ್ಗೆ ಪ್ರತಿಕ್ರಿಯಿಸುವಂತೆ ಮಾಧ್ಯಮದವರು ಕೇಳಿದಾಗ ಸಿದ್ದರಾಮಯ್ಯ ಸಿಡಿಮಿಡಿಗೊಂಡಿದ್ದರು. ಸಿಎಂ ಹೇಳಿಕೆಯಿಂದ ಕಾಂಗ್ರೆಸ್‌ ಅಂತರ ಕಾಯ್ದುಕೊಂಡಿದೆ ಎಂಬ ವರ್ತಮಾನವಿತ್ತು. ಈ ಕಾರಣದಿಂದಲೂ ಜೆಡಿಎಸ್‌ ವರಿಷ್ಠರು ಕಾಂಗ್ರೆಸ್‌ ಶಾಸಕಾಂಗ ಪಕ್ಷದ ನಾಯಕರೂ ಆಗಿರುವ ಸಿದ್ದರಾಮಯ್ಯ ಅವರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಲು ಈ ಭೇಟಿ ಮಾಡಿದ್ದರು ಎಂದು ಮೂಲಗಳು ಹೇಳುತ್ತವೆ.

ಕೆಜೆ ಜಾರ್ಜ್‌ಗೂ ಕ್ಲಾಸ್‌!  ಸಕ್ಕರೆ ಖಾತೆ ಹೊಂದಿರುವ ತಮ್ಮ ಅತ್ಯಾಪ್ತರೇ ಆಗಿರುವ ಸಚಿವ ಕೆ.ಜೆ.ಜಾರ್ಜ್‌ ಅವರಿಗೂ ಸಿದ್ದರಾಮಯ್ಯ ಕ್ಲಾಸ್‌ ತೆಗೆದುಕೊಂಡಿದ್ದಾರೆ. ”ಕಬ್ಬು ಬೆಳೆಗಾರರ ಸಮಸ್ಯೆ ಬಿಗಡಾಯಿಸುವವರೆಗೆ ನೀವೇನು ಮಾಡುತ್ತಿದ್ದೀರಿ? ಈ ಸಮಸ್ಯೆಯ ಅರಿವು ನಿಮಗೆ ಇರಲಿಲ್ಲವೇ? ಈಗ ಇಷ್ಟೊಂದು ಗದ್ದಲವಾದದ್ದರಿಂದ ಕಾಂಗ್ರೆಸ್‌ ವರ್ಚಸ್ಸಿಗೂ ಧಕ್ಕೆಯಾಗುವಂತಾಗಿದೆ,” ಎಂದು ಬಿಸಿ ಮುಟ್ಟಿಸಿದರೆಂದು ಗೊತ್ತಾಗಿದೆ.

About the author

ಕನ್ನಡ ಟುಡೆ

Leave a Comment