ರಾಜ್ಯ ಸುದ್ದಿ

ಮಠಕ್ಕೆ ಬಂದ ನಾಲ್ಕೇ ದಿನದಲ್ಲಿ ಪವಾಡ ಸೃಷ್ಟಿಸಿದ ಸಿದ್ಧಗಂಗಾ ಶ್ರೀ

ತುಮಕೂರು: ಸಿದ್ಧಗಂಗಾ ಮಠದ ಹಿರಿಯ ಶ್ರೀ ಡಾ.ಶಿವಕುಮಾರ ಸ್ವಾಮಿಗಳ ಆರೋಗ್ಯದಲ್ಲಿ ಶನಿವಾರ ಬೆಳಗ್ಗಿನ ವೇಳೆಗೆ ಸಾಕಷ್ಟು ಸುಧಾರಣೆ ಕಂಡು ಬಂದಿದೆ. ಎಂದಿನಂತೆ ಬೆಳಗ್ಗೆ 5 ಗಂಟೆಗೆ ಶ್ರೀಗಳಿಗೆ ರಕ್ತ ಪರೀಕ್ಷೆ ಮಾಡಲಾಗಿದೆ. ಶ್ರೀಗಳು ವೆಂಟಿಲೇಟರ್ ಇಲ್ಲದೆ ಸ್ವಂತ ಶಕ್ತಿಯಿಂದ ಉಸಿರಾಡುತ್ತಿದ್ದಾರೆ. ಶ್ರೀಗಳ ಪಕ್ಕದಲ್ಲಿ ಕುಳಿತು ಕಿರಿಯ ಶ್ರೀಗಳು ಅವರ ಇಷ್ಟಲಿಂಗ ಪೂಜೆ ನೆರವೇರಿಸಿದ್ದಾರೆ. ಮಠದ ಪೂಜೆಯ ವೇಳೆಗೆ ಶ್ರೀಗಳು ಕಣ್ಣು ತೆರೆದು ನೋಡಿದ್ದಾರೆ. ಶ್ರೀಗಳ ಆರೋಗ್ಯ ಸುಧಾರಣೆ ಬಗ್ಗೆ ವೈದ್ಯರು, ಕಿರಿಯ ಶ್ರೀ ಹಾಗೂ ರಾಜಕೀಯ ಮತ್ತು ಧಾರ್ಮಿಕ ಮುಖಂಡರು ಮತ್ತು ಭಕ್ತರು ಸಂತಸ ವ್ಯಕ್ತಪಡಿಸಿದ್ದಾರೆ. ಜ.16 ರಂದು ಬೆಳಗ್ಗೆ 3.50ರ ಸಮಯದಲ್ಲಿ ಸಿದ್ಧಗಂಗಾ ಆಸ್ಪತ್ರೆಯಿಂದ ಮಠಕ್ಕೆ ಮರಳಿದ ಶ್ರೀಗಳಿಗೆ ಮಠದಲ್ಲಿ ಚಿಕಿತ್ಸೆ ಮುಂದುವರೆಸಲಾಗಿದೆ.

13 ದಿನಗಳ ಆಸ್ಪತ್ರೆ ಚಿಕಿತ್ಸೆ ಬಳಿಕ ಮಠಕ್ಕೆ ಮರಳಿದ ಮೂರೇ ದಿನಗಳಲ್ಲಿ ಶ್ರೀಗಳ ಆರೋಗ್ಯದಲ್ಲಿ ವಿಸ್ಮಯಕಾರಿ ಚೇತರಿಕೆ ಕಂಡು ಬಂದಿದೆ. ಶ್ರೀಗಳ ಗುಣಮುಖ ವಿಚಾರ ಕೇಳಿ ಅವರ ಕೋಟ್ಯಂತರ ಭಕ್ತರಲ್ಲಿ ಸಂತಸ ಮನೆ ಮಾಡಿದೆ. ಮಠದ ಆವರಣದಲ್ಲಿ ಮಕ್ಕಳು ಲವಲವಿಕೆಯಿಂದ ಓಡಾಡುತ್ತಿದ್ದಾರೆ. ಶ್ರೀಗಳ ದರ್ಶನಕ್ಕಾಗಿ ಬರುವ ಭಕ್ತರ ಸಂಖ್ಯೆಯೂ ಹೆಚ್ಚುತ್ತಿದೆ.

ಗಣ್ಯರ ಭೇಟಿ : ಶುಕ್ರವಾರ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ, ನಿಡುಮಾಮಿಡಿ ಶ್ರೀ ಸೇರಿದಂತೆ ಅನೇಕ ಗಣ್ಯರು ಶ್ರೀಗಳನ್ನು ಭೇಟಿ ಮಾಡಿ ಆರೋಗ್ಯ ಮಾಹಿತಿ ಪಡೆದಿದ್ದಾರೆ. ಇಂದು ಕೂಡ ಅನೇಕ ಗಣ್ಯರು ಶ್ರೀಗಳ ಭೇಟಿಗಾಗಿ ಆಗಮಿಸುವ ನಿರೀಕ್ಷೆ ಇದೆ.

ಜೀವನ ಪ್ರೀತಿ ಅದಮ್ಯ
 : ಶುಕ್ರವಾರ ಶ್ರೀಗಳ ಭೇಟಿ ಬಳಿಕ ನಿಡುಮಾಮಿಡಿ ಶ್ರೀಗಳು ಸುದ್ದಿಗಾರರೊಂದಿಗೆ ತಮ್ಮ ಸಂತಸ ಹಂಚಿಕೊಂಡರು. “ನಾವು ಮಹಾಸ್ವಾಮಿಗಳ ದರ್ಶನ ಮಾಡಿದ್ದೇವೆ. ನಮ್ಮ ಎದುರು ಮೂರು ಬಾರಿ ಕಣ್ಣು ಬಿಟ್ಟು ನೋಡಿದರು. ಶ್ರೀಗಳು ನಮ್ಮ ಕಾಲದ ಶ್ರೇಷ್ಠ ಗುರುಗಳಲ್ಲೊಬ್ಬರು. ಅವರದ್ದು ಅಸಾಮಾನ್ಯ, ಪವಾಡ ಸದೃಶ ಸಾಧನೆ. ದೈವೈಚ್ಛೆಯಂತೆ ಮುಂದಿನದು ನಡೆಯುತ್ತದೆ”, ಎಂದರು. ಅವರ ಜೀವನ ಪ್ರೀತಿ ಇಂತಹ ಸಂದರ್ಭದಲ್ಲಿಯೂ ಅಧಮ್ಯವಾಗಿದೆ. 111 ವರ್ಷ ಸಮೀಪಿಸುತ್ತಿರುವಾಗಲೂ ಅವರ ಸಾಧನೆ, ಜೀವನ ಪವಾಡ ಸದೃಶ ಎಂದು ತಿಳಿಸಿದರು. ವಿಧಾನ ಪರಿಷತ್ ಸದಸ್ಯ ಬಸವರಾಜ ಹೊರಟ್ಟಿ ಶ್ರೀಗಳನ್ನು ಭೇಟಿ ಮಾಡಿ ಸುದ್ದಿಗಾರರೊಂದಿಗೆ ಮಾತನಾಡಿದರು.

“ನಾನು ವೈದ್ಯರೊಂದಿಗೆ ಮಾತನಾಡಿದೆ. ವೈದ್ಯಕೀಯ ಕ್ಷೇತ್ರದಲ್ಲಿ ನಾವೆಂದೂ ಇಂತಹ ಸಂದರ್ಭವನ್ನು ನೋಡಿಲ್ಲ. ಇದು ಪವಾಡ ಎಂದು ವೈದ್ಯರು ಹೇಳುತ್ತಿದ್ದಾರೆ. ಶ್ರೀಗಳು ಸಹಜವಾಗಿದೆ ಉಸಿರಾಡುತ್ತಿದ್ದಾರೆ. ಜಗತ್ತಿನಲ್ಲಿ ಪುಣ್ಯ ಮಾಡಿದವರಿಗೆ ಇನ್ನೂ ಕಾಲವಿದೆ ಎನ್ನುವುದು ಸ್ಚಾಮೀಜಿಗಳಿಂದ ತಿಳಿಯಿತು. ನಾವು ದೇವರನ್ನು ನೋಡಿಲ್ಲ. ಸ್ವಾಮೀಜಿಯವರು ಮಾಡಿದ ಪುಣ್ಯದ ಕೆಲಸದಿಂದ ಅವರಲ್ಲಿ ನಾವು ದೇವರನ್ನು ಕಾಣುತ್ತಿದ್ದೇವೆ” ಎಂದು ತಿಳಿಸಿದರು.

ಸಂಜೆ ವೇಳೆಗೆ ಸಂಸದ ಪ್ರತಾಪ್ ಸಿಂಹ ಶ್ರೀಗಳನ್ನು ಭೇಟಿ ಮಾಡಿ ಆರೋಗ್ಯ ಮಾಹಿತಿ ಪಡೆದರು. ಬಳಿಕ ಮಾತನಾಡಿ, ಶ್ರೀಗಳು ಅನಾರೋಗ್ಯಕ್ಕೆ ತುತ್ತಾಗುತ್ತಾರೆಂದರೆ ಇಡೀ ಕರ್ನಾಟಕವೇ ಚಿಂತಿತವಾಗುತ್ತದೆ. ಇಂದು ಅವರ ಆರೋಗ್ಯದಲ್ಲಿ ಕೊಂಚ ಚೇತರಿಕೆಯಾಗಿದೆ. ಶ್ರೀಗಳು ವೆಂಟಿಲೇಟರ್ ಇಲ್ಲದೆ ಕಳೆದ ನಾಲ್ಕು ಗಂಟೆಗಳಿಂದ ಸ್ವತಂತ್ರವಾಗಿ ಉಸಿರಾಡುತ್ತಿದ್ದಾರೆ ಎನ್ನುವುದು ತಿಳಿದುಬಂದಿತು. ನಾವು ಹೋದಾಗ ಕೈ ಅಲುಗಾಡಿಸಿದ್ದು ಕಂಡು ಬಂದಿತು. ಅವರು ಚೇತರಿಸಿಕೊಳ್ಳುತ್ತಾರೆನ್ನುವ ಖಚಿತವಾದ ವಿಶ್ವಾಸವಿದೆ ಎಂದು ತಿಳಿಸಿದರು.ಇಂದು ಶ್ರೀಗಳನ್ನು ನೋಡಲು, ಕಿಟಕಿಯಲ್ಲಿ ದರ್ಶನ ಮಾಡಲು ಸಾವಿರಾರು ಜನ ಭಕ್ತರು ಸರಣಿಯಲ್ಲಿ ನಿಂತಿದ್ದಾರೆ. ಬಹುಶಃ ರಾಜ್ಯದ ಇತಿಹಾಸದಲ್ಲಿ ಮುಂದೆಂದು ಕೂಡ ಇಂತಹ ಗೌರವ, ಅಭಿಮಾನಕ್ಕೆ ಭಾಜನರಾದ ಮತ್ತೋರ್ವ ಶ್ರೀಗಳು ನಮಗೆ ಸಿಗುವುದಿಲ್ಲ ಎಂದರು. ಶಾಸಕರುಗಳಾದ ಜಿ.ಬಿ.ಜ್ಯೋತಿಗಣೇಶ್, ಮಸಾಲೆ ಜಯರಾಂ, ಡಿ.ಸಿ.ಗೌರಿಶಂಕರ್, ಮಾಜಿ ಶಾಸಕ ಸುರೇಶ್ ಬಾಬು ಮತ್ತಿತರರು ಶ್ರೀಗಳ ದರ್ಶನ ಪಡೆದರು.

ವಿಶೇಷ ಪ್ರಾರ್ಥನೆ: ಶ್ರೀಗಳ ಶೀಘ್ರ ಚೇತರಿಕೆಗೆ ಪ್ರಾರ್ಥಿಸಿ ಬೆಂಗಳೂರಿನ ಸಿದ್ಧಗಂಗಾ ಶಾಲೆ‌‌ ವಿದ್ಯಾರ್ಥಿಗಳು ಮಠದ ಆವರಣದಲ್ಲಿ ಶುಕ್ರವಾರ ಬೆಳಗ್ಗೆ ವಿಶೇಷ ಪ್ರಾರ್ಥನೆ ಸಲ್ಲಿಸಿದರು. ಪತಂಜಲಿ ಯೋಗ ಶಿಕ್ಷಣ ಸಮಿತಿ ಸದಸ್ಯರು ವಿಶೇಷ ಪೂಜೆ ನೆರವೇರಿಸಿದರು. ಹನುಮಂತ ಪುರದ ದೇವಾಲಯದಲ್ಲಿ ಕೂಡ ಭಕ್ತರಿಂದ ವಿಶೇಷ ಪೂಜೆ, ಪ್ರಾರ್ಥನೆ ಸಲ್ಲಿಸಲಾಯಿತು. ಇದಲ್ಲದೆ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಶುಕ್ರವಾರ ವಿಶೇಷ ಪೂಜೆ, ಪ್ರಾರ್ಥನೆಗಳನ್ನು ಸಲ್ಲಿಸಿ ಭಕ್ತರು ಶ್ರೀಗಳ ಆರೋಗ್ಯ ಸುಧಾರಣೆಗೆ ಪ್ರಾರ್ಥನೆ ಸಲ್ಲಿಸಿದ್ದಾರೆ.

ಮಠದ ರಸ್ತೆ ರಿಪೇರಿ : ಶ್ರೀಗಳ ದರ್ಶನಕ್ಕಾಗಿ ಮಠಕ್ಕೆ ಆಗಮಿಸುತ್ತಿರುವ ಗಣ್ಯರ ಸಂಖ್ಯೆಯಲ್ಲಿ ದಿನೇ ದಿನೇ ಹೆಚ್ಚಳವಾಗುತ್ತಿದೆ. ಇದರ ಬೆನ್ನಲ್ಲೇ ಸಿದ್ಧಗಂಗಾ ಮಠಕ್ಕೆ ಸಂಪರ್ಕ ಕಲ್ಪಿಸುವ ಸುಮಾರು ಮೂರು ಕಿಮೀ ರಸ್ತೆಯನ್ನು ರಿಪೇರಿ ಮಾಡುವ ಕೆಲಸ ಶುಕ್ರವಾರದಿಂದ ಆರಂಭವಾಗಿದೆ. ಬಟವಾಡಿ ಎಪಿಎಂಸಿ ಆವರಣದಿಂದ ಶ್ರೀ ನಗರದ ವರೆಗಿನ ರಸ್ತೆಯ ಇಕ್ಕೆಲಗಳಲ್ಲಿ ಬೆಳೆದಿದ್ದ ನಿರುಪಯುಕ್ತ ಗಿಡಗಳನ್ನು ಪಾಲಿಕೆ ಪೌರ ಕಾರ್ಮಿಕರು ತೆರವುಗೊಳಿಸಿದ್ದಾರೆ.ರಸ್ತೆಯ ಎರಡೂ ಬದಿ ಸ್ವಚ್ಛ ಮಾಡಲಾಗಿದೆ. ಶ್ರೀ ನಗರದ ವೃತ್ತದಿಂದ ಮಠದ ವರೆಗಿನ ಎರಡು ಕಿಮೀ ರಸ್ತೆಗೆ ಡಾಂಬರು ಹಾಕಿ ವಿಸ್ತರಿಸಲಾಗುತ್ತಿದೆ. ಮಠದ ಮುಖ್ಯ ಗೇಟಿನ ಎದುರು ವಾಹನಗಳ ಪಾರ್ಕಿಂಗ್ ಗೆ ಭೂಮಿ ಸಮತಟ್ಟು ಮಾಡಲಾಗಿದೆ.

About the author

ಕನ್ನಡ ಟುಡೆ

Leave a Comment