ರಾಷ್ಟ್ರ ಸುದ್ದಿ

ಮನೇಲಿ ಕುಳಿತೇ ಹೊಡೀತೀವಿ, ಪ್ರತಿ ಏಟಿಗೂ ತಿರುಗೇಟು ನನ್ನ ಸ್ವಭಾವ: ಉಗ್ರ ಸಂಘಟನೆಗಳಿಗೆ ಪ್ರಧಾನಿ ಮೋದಿ ವಾರ್ನಿಂಗ್‌

ಅಹಮದಾಬಾದ್/ಜಾಮ್‌ನಗರ್: ಪಾಕಿಸ್ತಾನದ ಉಗ್ರ ನೆಲೆಗಳ ಮೇಲೆ ವೈಮಾನಿಕ ದಾಳ ಕುರಿತು ರಾಜಕೀಯ ಕೆಸರೆರಚಾಟದ ನಡುವೆ, ಪುಲ್ವಾಮಾ ದಾಳಿಗೆ ಪ್ರತೀಕಾರ ಚುನಾವಣೆ ಗಿಮಿಕ್ ಎಂಬ ಪ್ರತಿಪಕ್ಷಗಳ ಆರೋಪಕ್ಕೆ ಪ್ರಧಾನಿ ನರೇಂದ್ರ ಮೋದಿ ತೀಕ್ಷ್ಣ ತಿರುಗೇಟು ನೀಡಿದ್ದಾರೆ.

‘ಉಗ್ರರ ಮೇಲೆ ವೈಮಾನಿಕ ದಾಳಿ ನಡೆಸಿದ್ದು ಚುನಾವಣೆ ಲಾಭಕ್ಕಾಗಿ ಎಂದು ಅವರು ಆರೋಪಿಸುತ್ತಾರೆ. ನಾವು ಸರ್ಜಿಕಲ್ ದಾಳಿ ನಡೆದಾಗ ಯಾವ ಚುನಾವಣೆಯಿತ್ತು? ನಮ್ಮ ಸಿದ್ಧಾಂತವಿದು, ನಾವು ಮನೆಯಲ್ಲಿ ಕುಳಿತೇ ಶತ್ರುಗಳನ್ನು ನಾಶಪಡಿಸುತ್ತೇವೆ’ ಎಂದು ಮೋದಿ ಅವರು ಅಹಮದಾಬಾದ್‌ನ ಸಿವಿಲ್ ಆಸ್ಪತ್ರೆ ಕ್ಯಾಂಪಸ್‌ನಲ್ಲಿ ನುಡಿದರು. ಅವರು, 1,450 ಕೋಟಿ ರೂ ವೆಚ್ಚದಲ್ಲಿ ವಿಸ್ತರಿಸಲಾದ ಏಷ್ಯಾದಲ್ಲೇ ಅತಿದೊಡ್ಡದು ಎಂಬ ಖ್ಯಾತಿಯ 1,200 ಹಾಸಿಗೆಗಳ ಸರಕಾರಿ ಆಸ್ಪತ್ರೆ ‘ಮೆಡಿಸಿಟಿ’ ಉದ್ಘಾಟಿಸಿ ಮಾತನಾಡುತ್ತಿದ್ದರು.

ವೈಮಾನಿಕ ದಾಳಿ ಬಳಿಕ ಮೊದಲ ಬಾರಿಗೆ ಎರಡು ದಿನಗಳ ಭೇಟಿಗಾಗಿ ಗುಜರಾತ್‌ಗೆ ಆಗಮಿಸಿರುವ ಮೋದಿ, 26/11ರ ಮುಂಬಯಿ ಉಗ್ರ ದಾಳಿ ಹಾಗೂ 2008ರ ಅಹಮದಾಬಾದ್ ದಾಳಿ ಬಳಿಕ ಪ್ರತೀಕಾರ ಕೈಗೊಳ್ಳದ ಯುಪಿಎ ಸರಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು. ಅಹಮದಾಬಾದ್‌ನ ಸಿವಿಲ್ ಆಸ್ಪತ್ರೆ ಆವರಣದಲ್ಲೇ ಅಂದು ಸರಣಿ ಬಾಂಬ್‌ ಸ್ಫೋಟ ನಡೆದಿದ್ದು, 37 ಮಂದಿ ವೈದ್ಯರು ಮತ್ತು ಅರೆ ವೈದ್ಯಕೀಯ ಸಿಬ್ಬಂದಿ ಸೇರಿದಂತೆ ಒಟ್ಟು 58 ಮಂದಿ ಅಂದಿನ ಉಗ್ರ ದಾಳಿಗೆ ಬಲಿಯಾಗಿದ್ದರು. ‘ಸಿವಿಲ್ ಆಸ್ಪತ್ರೆಗೆ ರಕ್ಕಸರು ದಾಳಿ ಮಾಡಿದ ದಿನ ನಿಮಗೆ ನೆನಪಿದೆಯೇ? ಅಂದಿನ ಕೇಂದ್ರ ಸರಕಾರ ಬಲಿಷ್ಠವಾಗಿದ್ದಿದ್ದರೆ, ಅದು ಪ್ರತೀಕಾರ ತೆಗೆದುಕೊಳ್ಳಬೇಕಿತ್ತು. 26/11ರ ಮುಂಬಯಿ ದಾಳಿಗೆ ಅಂದು ಏಕೆ ಪ್ರತೀಕಾರ ಕೈಗೊಂಡಿಲ್ಲ?’ ಎಂದು ಪ್ರಧಾನಿ ಮೋದಿ ಪ್ರಶ್ನಿಸಿದರು.

‘ಪ್ರತಿ ದಾಳಿಗೂ ಶತ್ರುವನ್ನು ಹುಡುಕಿ ಹುಡುಕಿ ಪ್ರತೀಕಾರ ತೀರಿಸುವುದೇ ನನ್ನ ಸ್ವಭಾವ’ (ಚುನ್ ಚುನ್‌ ಕೆ ಹಿಸಾಬ್ ಲೇನಾ ಮೇರಿ ಫಿತ್ರತ್ ಹೈ) ಎಂದು ಮೋದಿ ಗುಡುಗಿದರು. ವಿಶ್ವ ಉಮಿಯ ಧಾಮ್‌ನಲ್ಲಿ ಪಾಟಿದಾರ್‌ ಸಮುದಾಯವನ್ನು ಉದ್ದೇಶಿಸಿ ಮಾತನಾಡಿದ ಮೋದಿ, ‘2019ರಲ್ಲೂ ನಾನೇ ಅಲ್ಲಿರುತ್ತೇನೆ. ಯಾರೂ ಚಿಂತಿಸಬೇಕಾಗಿಲ್ಲ. ಕೇಂದ್ರ ಸರಕಾರದಿಂದ ಏನಾದರೂ ಕೆಲಸವಾಗಬೇಕಿದ್ದರೆ ದಿಲ್ಲಿ ನಿಮ್ಮದೇ ಮನೆ ಎಂದು ಪರಿಗಣಿಸಿ’ ಎಂದು ಭರವಸೆ ನೀಡಿದರು. ಇದಕ್ಕೆ ಮುನ್ನ ಜಾಮ್‌ನಗರದಲ್ಲಿ ಮಾತನಾಡಿದ ಪ್ರಧಾನಿ, ವೈಮಾನಿಕ ದಾಳಿ ಕುರಿತ ನನ್ನ ಹೇಳಿಕೆ ಬಗ್ಗೆ ಪ್ರತಿಕ್ರಿಯಿಸುವಾಗ ಸ್ವಲ್ಪವಾದರೂ ಕಾಮನ್‌ಸೆನ್ಸ್‌ (ಬುದ್ಧಿವಂತಿಕೆ) ಇರಲಿ. ಆ ಹೊತ್ತಿಗೆ ನಮ್ಮಲ್ಲಿ ರಫೇಲ್‌ ವಿಮಾನ ಇದ್ದಿದ್ದರೆ ನಮ್ಮ ಯಾವ ವಿಮಾನವನ್ನೂ ಕಳೆದುಕೊಳ್ಳಬೇಕಿರಲಿಲ್ಲ; ಅವರ ಯಾವ ವಿಮಾನವನ್ನೂ ಉಳಿಸಿಕೊಳ್ಳಲು ಅವರಿಗೆ ಸಾಧ್ಯವಾಗುತ್ತಿರಲಿಲ್ಲ’ ಎಂದು ನಾನು ಹೇಳಿದ್ದೆ ಎಂದು ಸ್ಪಷ್ಟಪಡಿಸಿದರು. ಫೆಬ್ರವರಿ 27ರಂದು ನಡೆದ ವೈಮಾನಿಕ ಕಾದಾಟದಲ್ಲಿ ಭಾರತ ಮಿಗ್‌-21 ಬೈಸನ್ ವಿಮಾನವನ್ನು ಕಳೆದುಕೊಂಡಿತ್ತು. ಅದಕ್ಕೆ ಮುನ್ನ, ಸೇನಾನೆಲೆಗಳ ಮೇಲೆ ದಾಳಿಗೆ ಬಂದಿದ್ದ ಪಾಕಿಸ್ತಾನದ ಎಫ್‌-16 ವಿಮಾನವನ್ನು ಹೊಡೆದುರುಳಿಸಿತ್ತು.

About the author

ಕನ್ನಡ ಟುಡೆ

Leave a Comment