ರಾಷ್ಟ್ರ

ಮಲ್ಟಿಪ್ಲೆಕ್ಸ್‌ಗಳಲ್ಲಿ ಹೊರಗಿನ ತಿಂಡಿ, ಪಾನೀಯ ನಿಷೇಧ ಸಲ್ಲದು: ಬಾಂಬೆ ಹೈಕೋರ್ಟ್‌

ಮುಂಬಯಿ : ಮಲ್ಟಿಫ್ಲೆಕ್ಸ್‌ಗಳ ಒಳಗೆ ಮಾರಾಟ ಮಾಡಲಾಗುವ ತಿನ್ನುವ ಪದಾರ್ಥಗಳು ಹಾಗೂ ಕುಡಿಯುವ ನೀರಿನ ಬೆಲೆ ಮಿತಿಮೀರಿದೆ ಎಂದು ಕಿಡಿಕಾರಿರುವ ಬಾಂಬೆ ಹೈಕೋರ್ಟ್‌, ಗರಿಷ್ಠ ಮಾರಾಟ ಬೆಲೆ (ಎಂಆರ್‌ಪಿ)ಯಲ್ಲಿಯೇ ಮಾರಾಟ ಮಾಡಬೇಕು ಎಂದು ಆದೇಶಿಸಿದೆ.

ಪ್ರೇಕ್ಷಕರು ತಿನ್ನುವ ಪದಾರ್ಥಗಳು ಅಥವಾ ಕುಡಿಯುವ ನೀರನ್ನು ತಮ್ಮ ಜತೆ ಚಿತ್ರಮಂದಿರಗಳಿಗೆ ಕೊಂಡೊಯ್ಯುವುದರ ವಿರುದ್ಧ ಮಲ್ಟಿಫ್ಲೆಕ್ಸ್‌ಗಳು ನಿಷೇಧ ಹೇರಿರುವುದನ್ನು ಪ್ರಶ್ನಿಸಿ ಮುಂಬಯಿ ನಿವಾಸಿ ಜೈನೇಂದ್ರ ಬಕ್ಷಿ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ವೇಳೆ ಮುಂಬಯಿ ಹೈಕೋರ್ಟ್‌ ಈ ಆದೇಶ ಹೊರಡಿಸಿದೆ. ”ಚಿತ್ರಮಂದಿರಗಳ ಒಳಗೆ ಮಾರಾಟ ಮಾಡಲಾಗುವ ತಿಂಡಿ ಹಾಗೂ ನೀರಿನ ಬಾಟಲ್‌ಗಳ ಬೆಲೆ ನಿಜವಾಗಿಯೂ ಮಿತಿಮೀರಿದೆ. ಈ ಅನುಭವ ಸ್ವತಃ ನಮಗೂ ಆಗಿದೆ. ಅವುಗಳನ್ನು ನೀವು (ಮಲ್ಟಿಫ್ಲೆಕ್ಸ್‌ಗಳು) ನಿಗದಿತ ದರದಲ್ಲೇ ಮಾರಾಟ ಮಾಡಬೇಕು,” ಎಂದು ತೀರ್ಪು ನೀಡಿದ ನ್ಯಾಯಮೂರ್ತಿ ಎಸ್‌.ಎಂ. ಕೇಮ್ಕರ್‌ ಅವರು, ಪರಿಸ್ಥಿತಿಯನ್ನು ಸೂಕ್ತ ರೀತಿಯಲ್ಲಿ ನಿಭಾಯಿಸುವಂತೆ ಮಹರಾಷ್ಟ್ರ ಸರಕಾರಕ್ಕೆ ನಿರ್ದೇಶನ ನೀಡಿದ್ದಾರೆ. ಪ್ರಕರಣದ ಮುಂದಿನ ವಿಚಾರಣೆ ಜೂನ್‌ 12ರಂದು ನಡೆಯಲಿದೆ.

ಮಲ್ಟಿಫ್ಲೆಕ್ಸ್‌ಗಳಲ್ಲಿ ಮಾರಾಟ ಮಾಡಲಾಗುವ ತಿಂಡಿ ಪದಾರ್ಥಗಳ ಬೆಲೆ ಒಮ್ಮೊಮ್ಮೆ ಟಿಕೆಟ್‌ ದರವನ್ನೂ ಮೀರಿಸುವಂತಿರುತ್ತದೆ ಎನ್ನಲಾಗಿದೆ. ಏತನ್ಮಧ್ಯೆ, ಬೆಲೆಯ ಮೇಲೆ ನಿಯಂತ್ರಣ ಹೇರಲು ಆರು ವಾರಗಳೊಳಗೆ ‘ಬೆಲೆ ನೀತಿ’ ರೂಪಿಸುವುದಾಗಿ ಮಹಾರಾಷ್ಟ್ರ ಸರಕಾರ ತಿಳಿಸಿದೆ.

About the author

ಕನ್ನಡ ಟುಡೆ

Leave a Comment