ರಾಷ್ಟ್ರ ಸುದ್ದಿ

ಮಹಾರಾಷ್ಟ್ರ: ರೈಲಿಗೆ ಸಿಲುಕಿ ಹುಲಿಮರಿಗಳ ಸಾವು

ಚಂದ್ರಾಪುರ: ಚಂದ್ರಾ ಫೋರ್ಟ್‌ – ಗೊಂಡಿಯಾ ರೈಲ್ವೆ ಮಾರ್ಗದಲ್ಲಿ ರೈಲಿಗೆ ಸಿಲುಕಿ 2 ಹುಲಿಮರಿಗಳು ಸಾವನ್ನಪ್ಪಿದೆ. ಮಹಾರಾಷ್ಟ್ರದ ಎಫ್‌ಡಿಸಿಎಂ ಚಿಚ್ಪಲ್ಲಿ ಅಭಯಾರಣ್ಯದಲ್ಲಿ 6 ತಿಂಗಳ ಹುಲಿಮರಿಗಳು ಚಲಿಸುತ್ತಿದ್ದ ರೈಲಿನಡಿಗೆ ಸಿಲುಕಿ ಪ್ರಾಣತೆತ್ತಿವೆ.

ಬುಧವಾರ ರಾತ್ರಿ ಹುಲಿಮರಿಳು ರೈಲಿಗೆ ಸಿಲುಕಿರುವ ಸಾಧ್ಯತೆಗಳಿವೆ ಎಂದು ಅಂದಾಜಿಸಲಾಗಿದೆ. ಇದೇ ಮಾರ್ಗದಲ್ಲಿ ಸಾಗುತ್ತಿದ್ದ ಮತ್ತೊಂದು ರೈಲಿನ ಚಾಲಕ ಗುರುವಾರ ಮುಂಜಾನೆ ಘಟನೆ ಬಗ್ಗೆ ರೈಲ್ವೆ ಇಲಾಖೆಯ ಗಮನಕ್ಕೆ ತಂದಿರುವುದಾಗಿ ತಿಳಿದು ಬಂದಿದೆ. ಇದು 2 ನೇ ಬಾರಿಗೆ ಇಂತಹ ಘಟನೆ ನಡೆದಿದೆ. ಅರಣ್ಯ ಇಲಾಖೆಯ ಹಿರಿಯ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದಾರೆ. 2 ಸಹ ಹೆಣ್ಣು ಮರಿಗಳಾಗಿದ್ದು, ರಾತ್ರಿ ರೈಲು ಹಳಿ ದಾಟುವ ವೇಳೆ ವೇಗವಾಗಿ ಬಂದ ರೈಲಿಗೆ ಹುಲಿಮರಿಗಳು ಸಿಕ್ಕಿವೆ. 1 ಹುಲಿ ಮರಿಗೆ ಗಂಭೀರ ಗಾಯಗಳಾಗಿ ಹಳಿಯಿಂದ ಕೊಂಚ ದೂರದಲ್ಲಿ ಸಾವನ್ನಪ್ಪಿದ್ದರೆ, ಮತ್ತೊಂದು ಹುಲಿಯ ತಲೆ ಭಾಗಕ್ಕೆ ರೈಲು ಡಿಕ್ಕಿ ಹೊಡೆದಿದೆ ಎಂದು ಇಲಾಖೆ ಮೂಲಗಳು ಹೇಳಿವೆ. ಏತನ್ಮಧ್ಯೆ ತಾಯಿ ಹುಲಿ ಈ ವರೆಗೆ ಪತ್ತೆಯಾಗಿಲ್ಲ ಎನ್ನಲಾಗಿದೆ. ಅರಣ್ಯ ಇಲಾಖೆ ಅಧಿಕಾರಿಗಳು ಈ ಸಂಬಂಧ ಹುಡುಕಾಟವನ್ನೂ ಆರಂಭಿಸಿದ್ದಾರೆ.

ಕಳೆದ ಕೆಲ ಸಮಯದಿಂದ ವನ್ಯ ಪ್ರಾಣಿಗಳು ರೈಲಿಗೆ ಸಿಲುಕುವ ಸಂಖ್ಯೆ ಹೆಚ್ಚಾಗುತ್ತಿದೆ. ಜೂ.23ರಂದು ಚಿರತೆ ಸಾವನ್ನಪ್ಪಿದರೆ, ಜುಲೈನಲ್ಲಿ ತಾಯಿ ಜಿಂಕೆ ಹಾಗೂ 2 ಜಿಂಕೆ ಮರಿಗಳು ಮರಣಿಸಿದ್ದವು. ಅಲ್ಲದೆ ಮಾರ್ಚ್‌ನಲ್ಲಿ ರೈಲು ಹಳಿಗೆ ಕಾಡುಕೋಣವೊಂದು ಬಲಿಯಾಗಿವೆ. ಚಂದ್ರಾಫೋರ್ಟ್‌-ಗೊಂಡಿಯಾ ಮಾರ್ಗ ವಿದ್ಯುದೀಕರಣಗೊಂಡ ಬಳಿಕ ಎಕ್ಸ್‌ಪ್ರೆಸ್‌ ರೈಲುಗಳ ಓಡಾಟ ಹೆಚ್ಚಾಗಿದೆ. ಅರಣ್ಯ ಇಲಾಖೆ ಈ ಸಂಬಂಧ ಅರಣ್ಯ ಪ್ರದೇಶಗಳಲ್ಲಿ ರೈಲುಗಳ ವೇಗ ಕಡಿತಗೊಳಿಸುವಂತೆ ಸಾಕಷ್ಟು ಬಾರಿ ಮನವಿ ಮಾಡಿದ್ದರೂ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ.

About the author

ಕನ್ನಡ ಟುಡೆ

Leave a Comment