ಸಿನಿ ಸಮಾಚಾರ

ಮೀ ಟೂ ಬಿರುಗಾಳಿ: ಅರ್ಜುನ್‌, ಶ್ರುತಿ ನಿಲ್ಲದ ಸಮರ

ಬೆಂಗಳೂರು : ಕಳೆದ ನಾಲ್ಕೈದು ದಿನಗಳಿಂದ ಸ್ಯಾಂಡಲ್‌ವುಡ್‌ನಲ್ಲಿ ಎದ್ದಿದ್ದ ಮೀ ಟೂ ಬಿರುಗಾಳಿ ಹಿರಿಯ ನಟ ಅಂಬರೀಶ್‌ ನೇತೃತ್ವದಲ್ಲಿ ನಡೆದ ಸಂಧಾನ ಸಭೆಯಲ್ಲಿ ತಣ್ಣಗಾಗಲಿದೆ ಎಂಬ ನಿರೀಕ್ಷೆ ಹುಸಿಯಾಗಿದೆ. ಬೆಂಗಳೂರಿನಲ್ಲಿ ಗುರುವಾರ ನಡೆದ ಸಂಧಾನ ಸಭೆ ವಿಫಲವಾಗಿದೆ. ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಅರ್ಜುನ್‌ ಸರ್ಜಾ ಮತ್ತು ಶ್ರುತಿ ಹರಿಹರನ್‌ರನ್ನು ಪ್ರತ್ಯೇಕವಾಗಿ ಕೂರಿಸಿಕೊಂಡು ಸಂಧಾನಕ್ಕೆ ಪ್ರಯತ್ನಪಟ್ಟರೂ ಅಂತಿಮವಾಗಿ ಮಾತುಕತೆ ಮುರಿದು ಬಿತ್ತು.

ಗುರುವಾರ ಮಧ್ಯಾಹ್ನ 4 ಗಂಟೆಯಿಂದ ನಡೆದ ಸಭೆಯಲ್ಲಿ ಹಲವು ನಾಟಕೀಯ ಬೆಳವಣಿಗೆಗಳು ನಡೆದವು. ಮಾಧ್ಯಮದವರನ್ನು ಹೊರಗಿಟ್ಟು ಕನ್ನಡ ಸಿನಿಮಾ ರಂಗದ ಹಿರಿಯ ಕಲಾವಿದರು ಮತ್ತು ತಂತ್ರಜ್ಞರು ಮೀ ಟೂ ಆಂದೋಲನದ ಕುರಿತು ಚರ್ಚಿಸಿದರು. ಶ್ರುತಿ ಮತ್ತು ಅರ್ಜುನ್‌ ಸರ್ಜಾ ಪರವಾದ ಮಾತುಗಳು ಸಂಧಾನಕ್ಕೆ ಹಿನ್ನೆಡೆಯುಂಟು ಮಾಡಿದ್ದರಿಂದ ಪ್ರತ್ಯೇಕವಾಗಿ ಕೂರಿಸಿಕೊಂಡು ಮಾತನಾಡುವ ಒಮ್ಮತಕ್ಕೆ ಬರಲಾಯಿತು. ಕಲಾವಿದರ ಸಂಘದ ಅಧ್ಯಕ್ಷ ಅಂಬರೀಶ್‌, ಚಲನಚಿತ್ರ ವಾಣಿಜ್ಯ ಮಂಡಳಿಯ ಅಧ್ಯಕ್ಷ ಚಿನ್ನೇಗೌಡ ಮತ್ತು ಮಾಜಿ ಅಧ್ಯಕ್ಷ ಸಾ.ರಾ.ಗೋವಿಂದು, ನಿರ್ಮಾಪಕರ ಸಂಘದ ಅಧ್ಯಕ್ಷ ಮುನಿರತ್ನ ಇವರಷ್ಟೇ ಇಬ್ಬರೂ ಕಲಾವಿದರನ್ನು ಕರೆಯಿಸಿಕೊಂಡು ಅವರವರ ಅಭಿಪ್ರಾಯಗಳನ್ನು ಹಂಚಿಕೊಳ್ಳುವಂತೆ ತಿಳಿಸಲಾಯಿತು. ಒಂದೂವರೆ ಗಂಟೆಗಳ ಕಾಲ ಅರ್ಜುನ್‌ ಮತ್ತು ಶ್ರುತಿ ಹರಿಹರನ್‌ ತಮಗಾದ ನೋವನ್ನು ಹಂಚಿಕೊಂಡರು. ವಾಣಿಜ್ಯ ಮಂಡಳಿ ತೆಗೆದುಕೊಳ್ಳುವ ನಿರ್ಧಾರಕ್ಕೆ ತಾವು ಬದ್ಧ ಎಂದು ಶ್ರುತಿ ಹೇಳಿದರೆ, ‘ಯಾವುದೇ ಕಾರಣಕ್ಕೂ ರಾಜಿಯ ಮಾತೇ ಇಲ್ಲ. ಕಾನೂನು ಹೋರಾಟದ ಮೂಲಕವೇ ಇದಕ್ಕೊಂದು ತಾರ್ಕಿಕ ಅಂತ್ಯ ಸಿಗಲಿ’ ಎಂದರು ಅರ್ಜುನ್‌. ನಾಲ್ಕೈದು ದಿನಗಳ ಸಮಯ ತಗೆದುಕೊಂಡು ನಿಮ್ಮ ಅಭಿಪ್ರಾಯ ತಿಳಿಸಿ ಎಂಬ ಅಂಬರೀಶ್‌ ಮಾತಿಗೆ ಒಪ್ಪದ ಅರ್ಜುನ್‌, ಕಾನೂನು ಮೂಲಕವೇ ಉತ್ತರ ಕೊಡುವುದಾಗಿ ಹೇಳಿದರು. ಹಾಗಾಗಿ ಸಂಧಾನದ ಬಾಗಿಲು ಮುಚ್ಚುವಂತಾಯಿತು.
ನಂತರ ನಡೆದ ಪತ್ರಿಕಾಗೋಷ್ಠಿಯಲ್ಲೂ ಅರ್ಜುನ್‌ ಮತ್ತು ಶ್ರುತಿ ಹರಿಹರನ್‌ ಒಟ್ಟಾಗಿ ಕಾಣಿಸಿಕೊಳ್ಳಲು ಬಯಸಲಿಲ್ಲ. ಹಾಗಾಗಿ ಪ್ರತ್ಯೇಕವಾಗಿಯೇ ಪತ್ರಿಕಾಗೋಷ್ಠಿಯ ವ್ಯವಸ್ಥೆ ಮಾಡಲಾಯಿತು.

ನನಗೆ ಸಿನಿಮಾ ರಂಗದ ಮೇಲೆ ಮತ್ತು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಹಿರಿಯರ ಮೇಲೆ ಅಪಾರ ಗೌರವವಿದೆ. ಅವರ ಮಾತಿಗೆ ಬೆಲೆಕೊಟ್ಟು ಬಂದಿದ್ದೇನೆ. ಆದರೆ, ಯಾವುದೇ ಕಾರಣಕ್ಕೂ ಸಂಧಾನಕ್ಕೆ ಒಪ್ಪಲಾರೆ
– ಅರ್ಜುನ್‌ ಸರ್ಜಾ, ನಟ

About the author

ಕನ್ನಡ ಟುಡೆ

Leave a Comment