ರಾಷ್ಟ್ರ ಸುದ್ದಿ

ಹೊಸದಿಲ್ಲಿ: ಮೈತ್ರಿಗಳ ಮನವೊಲಿಕೆಯಲ್ಲಿ ಬಿಜೆಪಿ ದಾಪುಗಾಲು, ಕಾಂಗ್ರೆಸ್‌ ಕಂಗಾಲು

ಹೊಸದಿಲ್ಲಿ: ಕರ್ನಾಟಕದಲ್ಲಿ ಜೆಡಿಎಸ್‌-ಕಾಂಗ್ರೆಸ್‌ ಸರಕಾರದ ಸಾರಥಿಯಾಗಿ ಕಳೆದ ವರ್ಷ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಅಧಿಕಾರ ಸ್ವೀಕರಿಸಿದ ದಿನದಂದು, ಪ್ರಮುಖ ಪ್ರತಿಪಕ್ಷಗಳು ಒಂದೇ ವೇದಿಕೆಯಲ್ಲಿ ತೋರಿದ ಶಕ್ತಿ ಪ್ರದರ್ಶನವನ್ನು ಮೋದಿ-ಶಾ ಜೋಡಿಗೆ ಮಹಾ ಸವಾಲು ಎಂದೇ ಬಣ್ಣಿಸಲಾಗಿತ್ತು. ಅದಾದ ಬಳಿಕ ಪ್ರತಿಪಕ್ಷಗಳು ಹಲವು ಬಾರಿ ಸಭೆ ಸೇರಿ ಶಕ್ತಿ ಪ್ರದರ್ಶನ ಮಾಡಿವೆ. ಇಷ್ಟೆಲ್ಲದರ ನಡುವೆಯೂ ಲೋಕಸಭಾ ಚುನಾವಣೆಗೆ ವಿವಿಧ ರಾಜ್ಯಗಳಲ್ಲಿ ಮೈತ್ರಿ ಒಪ್ಪಂದಗಳನ್ನು ಕುದುರಿಸುವಲ್ಲಿ ಪ್ರತಿಪಕ್ಷಗಳಿಗೆ ಹೋಲಿಸಿ ದರೆ ಬಿಜೆಪಿಯೇ ಮುಂದಿದೆ. ಕಾಂಗ್ರೆಸ್‌ ಮತ್ತು ಇತರೆ ಪ್ರಾದೇಶಿಕ ಪಕ್ಷಗಳು ಸ್ವ ಹಿತಾಸಕ್ತಿ ಮತ್ತು ಸೀಟು ಹಂಚಿಕೆ ಸಿಕ್ಕಿನಿಂದ ಬಿಡಿಸಿಕೊಂಡು ದೊಡ್ಡ ಉದ್ದೇಶದೊಂದಿಗೆ ಪ್ರಬಲ ಮೈತ್ರಿಕೂಟ ರಚಿಸುವಲ್ಲಿ ವಿಫಲವಾಗಿವೆ.

ಹಾಗೆಂದು ಬಿಜೆಪಿಯ ಮೈತ್ರಿ ಪಾಳಯವೇನೂ ಹೂವಿನ ಹಾಸಿಗೆಯಾಗಿರಲಿಲ್ಲ. ಆದರೆ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಅವರು ಮಿತ್ರಪಕ್ಷಗಳ ವಿಚಾರದಲ್ಲಿ ಹೆಚ್ಚು ಔದಾರ್ಯತೆ ತೋರುವ ಮೂಲಕ ಅವರನ್ನು ಎನ್‌ಡಿಎ ಪಾಳಯದಲ್ಲೇ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಬಿಹಾರದಿಂದ ಹಿಡಿದು, ತಮಿಳುನಾಡಿನವರೆಗೂ ಅಮಿತ್‌ ಶಾ ಅವರು ಎನ್‌ಡಿಎ ಮೈತ್ರಿಕೂಟವನ್ನು ಬಲಪಡಿಸುವಲ್ಲಿ ಇದೇ ಕಾರ್ಯತಂತ್ರವನ್ನು ಅನುಸರಿಸಿ ಯಶ ಕಂಡಿದ್ದಾರೆ. ಮಿತ್ರಪಕ್ಷಗಳ ಕಳವಳಗಳು, ಬೇಡಿಕೆಗಳನ್ನು ಪರಿಗಣಿಸುವ ಮೂಲಕ ಅವರ ಮನಗೆದ್ದು, ವಿಶ್ವಾಸದ ಬೆಸುಗೆ ಹಾಕಿದ್ದಾರೆ. ಆದರೆ, ಕಾಂಗ್ರೆಸ್‌ ವಿಚಾರಕ್ಕೆ ಬಂದರೆ ಉತ್ತರ ಪ್ರದೇಶ, ಪಶ್ಚಿಮ ಬಂಗಾಳ, ದಿಲ್ಲಿ ಹೀಗೆ ಹಲವು ಪ್ರಮುಖ ರಾಜ್ಯಗಳಲ್ಲೇ ಅನಿಶ್ಚಿತತೆ ಮುಂದುವರಿದಿದೆ. ಎಸ್ಪಿ-ಬಿಎಸ್ಪಿ ಜತೆಗಾಗಲೀ ಅಥವಾ ಆಪ್‌/ಎಡಪಕ್ಷಗಳ ಜತೆಗಾಗಲೀ ಯಶಸ್ವಿ ಒಡಂಬಡಿಕೆಯಲ್ಲಿ ಕಾಂಗ್ರೆಸ್‌ ವಿಫಲವಾಗಿದೆ.

ತಮಿಳುನಾಡಿನಲ್ಲಿ ಮಹತ್ವದ ನಡೆ: ತಮಿಳುನಾಡು ರಾಜಕೀಯದಲ್ಲಿ ಅತ್ಯಂತ ಕ್ಷೀಣ ಪಾತ್ರ ವಹಿಸಿದ್ದ ಬಿಜೆಪಿ ಈ ಬಾರಿ ಆಡಳಿತಾರೂಢ ಎಐಎಡಿಎಂ ಜತೆ ಮೈತ್ರಿ ಹಾಗೂ ಸಣ್ಣಪುಟ್ಟ ದ್ರಾವಿಡ ಪಕ್ಷಗಳೊಂದಿಗೆ ಒಡಂಬಡಿಕೆ ಮೂಲಕ ನಿರ್ಣಾಯಕ ಸ್ಥಾನವನ್ನು ಗಿಟ್ಟಿಸಿಕೊಂಡಿದೆ. ಎಡಿಎಂಕೆ ಜತೆ ಕಾಂಗ್ರೆಸ್‌ ಮೈತ್ರಿ ಮಾಡಿಕೊಂಡಿದ್ದರೂ ಡಿಎಂಡಿಕೆ ಮತ್ತು ಪಿಎಂಕೆಯಂತಹ ಸಣ್ಣ ಪಕ್ಷಗಳ ಬೆಂಬಲವನ್ನು ಅದು ಕಳೆದುಕೊಂಡಿದೆ. ಮೈತ್ರಿಗಳ ಸಂಯೋಜನೆಯೇ ಅತ್ಯಂತ ಮಹತ್ವವೆನಿಸಿರುವ ಬಿಹಾರ, ಮಹಾರಾಷ್ಟ್ರ ಮತ್ತು ತಮಿಳುನಾಡಿನಂತಹ ರಾಜ್ಯಗಳಲ್ಲಿ ಬಿಜೆಪಿ ನೇತೃತ್ವದ ಮೈತ್ರಿಕೂಟ ಈಗಾಗಲೇ ಅಸ್ಥಿತ್ವಕ್ಕೆ ಬಂದಿದೆ. ಆದರೆ, ಕಾಂಗ್ರೆಸ್‌ ಇನ್ನೂ ತೇಪೆ ಕೆಲಸದಲ್ಲಿ ನಿರತವಾಗಿದೆ. ಗರಿಷ್ಠ ಕ್ಷೇತ್ರಗಳೊಂದಿಗೆ ಲೋಕಸಭೆ ಚುನಾವಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಉತ್ತರ ಪ್ರದೇಶದಲ್ಲಿಎಸ್ಪಿ-ಬಿಎಸ್ಪಿ ಮೈತ್ರಿಕೂಟದಿಂದ ಕಾಂಗ್ರೆಸ್‌ ಹೊರಬಿದ್ದಿರುವುದು ಬಿಜೆಪಿಗೆ ಲಾಭವಾಗುವ ಸಾಧ್ಯತೆಯಿದೆ. ಈ ರಾಜ್ಯದಲ್ಲಿ ಮತದಾನ ಪ್ರಮಾಣದಲ್ಲಾಗುವ ಅತ್ಯಲ್ಪ ಬದಲಾವಣೆಯೂ ಇಡೀ ಫಲಿತಾಂಶವನ್ನು ತಲೆಕೆಳಗೆ ಮಾಡುವ ಸಂಭವವಿದೆ.

ಉತ್ತರ ಪ್ರದೇಶದಲ್ಲಿ ಅಪ್ನಾ ದಳ್‌ ಮತ್ತು ಎಸ್‌ಬಿಎಸ್ಪಿ ವತಿಯಿಂದ ಅಪಸ್ವರ ಎದುರಾದರೂ, ಈ ಎರಡೂಪಕ್ಷಗಳು ಎನ್‌ಡಿಎ ಮೈತ್ರಿಕೂಟದಲ್ಲೇ ಮುಂದುವರಿಯುವ ಬಗ್ಗೆ ಬಿಜೆಪಿಯಿಂದ ಆಶ್ವಾಸನೆ ದೊರೆತಿದೆ. ಬಿಹಾರ ದಲ್ಲಿ ಕಾಂಗ್ರೆಸ್‌, ಲಾಲು ನೇತೃತ್ವದ ಆರ್‌ಜೆಡಿ, ಉಪೇಂದ್ರ ಕುಶ್ವಾಹ ನೇತೃತ್ವದ ಆರ್‌ಎಲ್‌ಎಸ್ಪಿ, ಜಿತನ್‌ ರಾಮ್‌ ನೇತೃತ್ವದ ‘ಎಚ್‌ಎಎಂ’ ನಡುವೆ ಸೀಟು ಹಗ್ಗಜಗ್ಗಾಟ ದಿಂದಾಗಿ ಮಹಾಮೈತ್ರಿಕೂಟ ಇನ್ನೂ ಅತಂತ್ರವಾಗಿಯೇ ಉಳಿದಿದೆ. ಮಹಾರಾಷ್ಟ್ರದಲ್ಲಿ ಬಿಜೆಪಿ ಮತ್ತು ಶಿವಸೇನೆ ಕ್ರಮವಾಗಿ 25 ಮತ್ತು 23 ಕ್ಷೇತ್ರಗಳಿಂದ ಕಣಕ್ಕಿಳಿಯಲು ಒಪ್ಪಂದ ಮಾಡಿಕೊಂಡಿವೆ. ಏಕಾಂಗಿಯಾಗಿ ಚುನಾವಣೆಗೆ ಹೋಗುವುದಾಗಿ ಘೋಷಿಸಿದ್ದ ಶಿವಸೇನೆಯನ್ನು ಕೊನೆಗೂ ಬಿಜೆಪಿ ಮೈತ್ರಿಕೂಟದಲ್ಲಿ ಉಳಿಸಿಕೊಂಡಿದೆ. ಆದರೆ, ಕಾಂಗ್ರೆಸ್‌-ಎನ್‌ಸಿಪಿ ನಡುವೆ ಸೀಟುಗಳಿಗಾಗಿ ಹಗ್ಗ ಜಗ್ಗಾಟ ಇನ್ನೂ ಮುಂದುವರಿದಿದೆ. ಈಶಾನ್ಯದಲ್ಲೂ ಬಿಜೆಪಿಗೆ ಬಲ: ಇತ್ತ ಈಶಾನ್ಯ ರಾಜ್ಯಗಳಲ್ಲೂ ಎಲ್ಲಾ ಕಾಂಗ್ರೆಸ್ಸೇತರ ಪ್ರಾದೇಶಿಕ ಪಕ್ಷಗಳನ್ನೂ ಎನ್‌ಡಿಎ ತೆಕ್ಕೆಯಲ್ಲೇ ಇರಿಸಿಕೊಳ್ಳುವಲ್ಲಿ ಕಮಲ ಪಾಳಯ ಸಾಫಲ್ಯ ಕಂಡಿದೆ. ಆದರೆ, ಆಂಧ್ರ ಪ್ರದೇಶ ಮತ್ತು ತೆಲಂಗಾಣದಲ್ಲಿ ಮಾತ್ರ ಬಿಜೆಪಿ ಚುನಾವಣಾ ಪೂರ್ವ ಮೈತ್ರಿ ವಿಷಯದಲ್ಲಿ ಹಿಂದೆ ಬಿದ್ದಿದೆ. ಆದರೂ ಚುನಾವಣೆ ಬಳಿಕ ಈ ರಾಜ್ಯಗಳಲ್ಲು ಪ್ರಮುಖ ಪಕ್ಷಗಳು ಮೈತ್ರಿಗೆ ಬಿಜೆಪಿಯತ್ತ ಒಲವು ತೋರಬಹುದೆಂದು ಪಕ್ಷದ ಕೆಲವು ನಾಯಕರು ನಿರೀಕ್ಷೆ ವ್ಯಕ್ತಪಡಿಸಿದ್ದಾರೆ. ಪಕ್ಷದ ಆಂತರಿಕ ಮೂಲಗಳ ಪ್ರಕಾರ, ಆಂಧ್ರದಲ್ಲಿ ಟಿಡಿಪಿಯ ಪ್ರಮುಖ ಎದುರಾಳಿ ಯಾಗಿರುವ ಜಗನ್‌ ರೆಡ್ಡಿಯ ವೈಎಸ್ಸಾರ್‌ ಕಾಂಗ್ರೆಸ್‌ ಮತ್ತು ತೆಲಂಗಾಣದಲ್ಲಿ ಆಡಳಿತಾರೂಢ ಟಿಆರ್‌ಎಸ್‌ ಚುನಾವಣೆ ಬಳಿಕ ಅಗತ್ಯವಾದರೆ ಬಿಜೆಪಿ ನೇತೃತ್ವದ ಮೈತ್ರಿಕೂಟದತ್ತ ವಾಲಬಹುದೆಂದು ಹೇಳಲಾಗುತ್ತದೆ.

About the author

ಕನ್ನಡ ಟುಡೆ

Leave a Comment