ರಾಷ್ಟ್ರ ಸುದ್ದಿ

ರಫೇಲ್ ಎದುರಾಳಿಗಳ ಪರ ಕ್ರಿಶ್ಚಿಯನ್ ಮೈಕೆಲ್ ಲಾಬಿ, ಕಾಂಗ್ರೆಸ್ ಸ್ಪಷ್ಟನೆ ನೀಡಲಿ: ಪ್ರಧಾನಿ ಮೋದಿ

ಸೋಲಾಪುರ: ಆಗಸ್ಟಾ ವೆಸ್ಟ್‌ಲ್ಯಾಂಡ್ ವಿವಿಐಪಿ ಹೆಲಿಕಾಪ್ಟರ್ ಹಗರಣದಲ್ಲಿ ಮಧ್ಯವರ್ತಿಯಾಗಿರುವ ಆರೋಪಿ ಕ್ರಿಶ್ಚಿಯನ್ ಮೈಕೆಲ್ ಫ್ರೆಂಚ್‌ ಯುದ್ಧವಿಮಾನ ಉತ್ಪಾದಕ ರಫೇಲ್ ವಿರುದ್ಧ ಲಾಬಿ ನಡೆಸುತ್ತಿದ್ದ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು. ರಫೇಲ್ ಡೀಲ್ ಕುರಿತು ಇಲ್ಲದ ಆರೋಪ ಹೊರಿಸುತ್ತಿರುವ ಕಾಂಗ್ರೆಸ್‌, ತಾನು ಮೊದಲು ಕಳಂಕ ನಿವಾರಿಸಿಕೊಂಡು ಬರಲಿ ಎಂದು  ಪ್ರಧಾನಿ ಮೋದಿ ರ‍್ಯಾಲಿಯೊಂದರಲ್ಲಿ ನುಡಿದರು.

ಮಾಧ್ಯಮ ವರದಿಗಳನ್ನು ಉಲ್ಲೇಖಿಸಿದ ಪ್ರಧಾನಿ, ಮೈಕೆಲ್ ‘ಇತರ ಕೆಲವು ಪ್ರತಿಸ್ಪರ್ಧಿಗಳ ಪರವಾಗಿಯೂ’ ಲಾಬಿ ನಡೆಸುತ್ತಿದ್ದ. ಈಗ ರಫೇಲ್ ಕುರಿತು ಗದ್ದಲವೆಬ್ಬಿಸುತ್ತಿರುವ ತನ್ನ ಪಕ್ಷದ ಯಾವ ನಾಯಕ ಮೈಕೆಲ್ ಜತೆ ನಿಕಟ ಸಂಬಂಧ ಹೊಂದಿದ್ದಾನೆ ಎಂಬುದನ್ನು  ಕಾಂಗ್ರೆಸ್‌ ಬಹಿರಂಗಪಡಿಸಬೇಕು ಎಂದು ಮೋದಿ ಆಗ್ರಹಿಸಿದರು.

‘ಚೌಕಿದಾರ್’ (ಕಾವಲುಗಾರ) ಭ್ರಷ್ಟಾಚಾರವನ್ನು ಬೇರು ಸಮೇತ ಕಿತ್ತೊಗೆಯಲು ಪಣ ತೊಟ್ಟಿದ್ದರೆ, ಅದರಿಂದ ಬೆದರಿದವರು ಗದ್ದಲವೆಬ್ಬಿಸುತ್ತಿದ್ದಾರೆ. ಈ ಗದ್ದಲಕ್ಕೆಲ್ಲ ಚೌಕಿದಾರ್ ಬೆದರುವುದಿಲ್ಲ. ಅಲ್ಲದೆ ತನ್ನ ಕಾರ್ಯವನ್ನು ತಡೆಯಿಲ್ಲದೆ ಮುಂದುವರಿಸುತ್ತಾನೆ’ ಎಂದು ಪ್ರಧಾನಿ ಮೋದಿ ಘೋಷಿಸಿದರು. ‘ಚೌಕಿದಾರ್’ ತಪ್ಪು ಮಾಡುವವನ್ನು ಕತ್ತಲಲ್ಲೂ ಹುಡುಕಿ ಹಿಡಿಯಬಲ್ಲ ಎಂದು ಅವರು ನುಡಿದರು.

ಸಾಮಾನ್ಯ ವರ್ಗಕ್ಕೆ ಶೇ 10ರ ಮೀಸಲಾತಿಗೆ ಮೋದಿ ಸಮರ್ಥನೆ:
ಹಲವು ಮೂಲ ಸೌಕರ್ಯ ಯೋಜನೆಗಳನ್ನು ಉದ್ಘಾಟಿಸಿ ಮಾತನಾಡಿದ ಪ್ರಧಾನಿ ಮೋದಿ, ಸರಕಾರದ ವಿರುದ್ಧ ನಾನಾ ಸುಳ್ಳುಗಳನ್ನು ಹೇಳುತ್ತ ಅಪಪ್ರಚಾರ ನಡೆಸುವವರಿಗೆ ಸಂಸತ್ತು ನಿನ್ನೆಯೇ ಬಲವಾದ ಉತ್ತರ ನೀಡಿದೆ. ಮೇಲ್ವರ್ಗದ ಬಡವರಿಗೆ ಶೇ 10ರ ಮೀಸಲು ಕಲ್ಪಿಸುವ ವಿಧೇಯಕವನ್ನು ಲೋಕಸಭೆ ಸುಸೂತ್ರವಾಗಿ ಅಂಗೀಕರಿಸಿದೆ ಎಂದು ನುಡಿದರು.  ರಾಜ್ಯಸಭೆಯಲ್ಲೂ ಈ ವಿಧೇಯಕ ಇಂದು ಸುಗಮವಾಗಿ ಅಂಗೀಕಾರ ಪಡೆಯಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ ಪ್ರಧಾನಿ, ಸೌಲಭ್ಯ ವಂಚಿತರ ಏಳಿಗೆಗೆ ತಮ್ಮ ಸರಕಾರ ದಿಟ್ಟ ಹೆಜ್ಜೆ ಇಟ್ಟಿದೆ ಎಂದರು.

ಬಾಂಗ್ಲಾದೇಶ, ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನಗಳಿಂದ ಬಂದ ಮುಸ್ಲಿಮೇತರ ವಲಸಿಗರಿಗೆ ಭಾರತೀಯ ಪೌರತ್ವ ನೀಡುವ ಪೌರತ್ವ ವಿಧೇಯಕ ಅಂಗೀಕರಿಸಿದ್ದನ್ನೂ ಪ್ರಧಾನಿ ಸಮರ್ಥಿಸಿಕೊಂಡರು. ಈ ವಿಧೇಯಕದಿಂದ ಅಸ್ಸಾಂ ಮತ್ತು ಈಶಾನ್ಯ ರಾಜ್ಯಗಳ ನಾಗರಿಕರ ಯಾವ ಹಕ್ಕುಗಳಿಗೂ ಬಾಧಕವಿಲ್ಲ ಎಂದು ಸ್ಪಷ್ಟಪಡಿಸಿದರು.

About the author

ಕನ್ನಡ ಟುಡೆ

Leave a Comment