ರಾಷ್ಟ್ರ ಸುದ್ದಿ

ರಾಹುಲ್ ಟೆಂಪಲ್ ರನ್ ಹಿಂದಿನ ರಹಸ್ಯ ಬಿಚ್ಚಿಟ್ಟ ತರೂರ್

ಹೊಸದಿಲ್ಲಿ: ಇತ್ತೀಚಿನ ವರ್ಷಗಳಲ್ಲಿ, ಅದರಲ್ಲೂ ಚುನಾವಣೆ ಸಮೀಪಿಸುತ್ತಿದ್ದಂತೆ ಕಾಂಗ್ರೆಸ್ ಅಧ್ಯಕ್ಷ  ರಾಹುಲ್ ಗಾಂಧಿ ಟೆಂಪಲ್ ರನ್ ಮಾಡುವುದು ಸಾಮಾನ್ಯ. ಈ ಬಗ್ಗೆ ಅವರ ಪಕ್ಷದ ಹಿರಿಯ ನಾಯಕರಲ್ಲೊಬ್ಬರಾದ ತರೂರ್ ಅವರನ್ನು ಕೇಳಲಾಗಿ , ರಾಹುಲ್ ಈ ನಡೆಗೆ ಬಿಜೆಪಿಯೇ ಕಾರಣ ಎಂದವರು ಉತ್ತರಿಸಿದ್ದಾರೆ.

ಭಾನುವಾರ ದಿಲ್ಲಿಯಲ್ಲಿ ಆಯೋಜಿಸಲಾಗಿದ್ದ ಟೈಮ್ಸ್ ಲಿಟ್ ಫೆಸ್ಟ್‌ನಲ್ಲಿ ತರೂರ್ ಭಾಗವಹಿಸಿದ್ದು ಈ ಸಂದರ್ಭದಲ್ಲಿ ಅವರು ಬರೆದಿರುವ “The Paradoxical Prime Minister” ಬಗ್ಗೆ ಕೂಡ ಚರ್ಚೆಯಾಯಿತು. ಈ ಚರ್ಚೆ ಮುಂದುವರಿದು ಪ್ರಸ್ತುತ ಕಾಂಗ್ರೆಸ್ ಹಿಂದುತ್ವ, ವಿಶ್ವಾಸ, ಸರಕಾರ ಮತ್ತು ಶಾಸನದಂತ ವಿಷಯಗಳಲ್ಲಿ ಹೇಗೆ ಯೋಚಿಸುತ್ತದೆ ಎಂಬ ವಿಷಯದವರೆಗೆ ಹೋಯಿತು. ಇದಕ್ಕೆ ಉತ್ತರಿಸುತ್ತ ಸಾಗಿದ ತರೂರ್, ಕಾಂಗ್ರೆಸ್ ಹೀಗೆ ಮಾಡುವುದರ ಅನಿವಾರ್ಯತೆ ಸೃಷ್ಟಿಸಿದ್ದು ಬಿಜೆಪಿ. ಬಿಜೆಪಿ ನಿಜವಾದ ಹಿಂದೂಗಳು ಮತ್ತು ನಾಸ್ತಿಕ- ಧರ್ಮನಿರಪೇಕ್ಷರು ಎಂದು ವಿಭಾಗಿಸಿ ಕದನ ಹುಟ್ಟಿಸಿದೆ. ಹೀಗಾಗಿ ಕಾಂಗ್ರೆಸ್ ನಾಯಕರಿಗೆ ತಮ್ಮ ವಾಸ್ತವ ಜೀವನವನ್ನು ಸಾರ್ವಜನಿಕವಾಗಿ ಬಿಚ್ಚಿಡಬೇಕಿದೆ, ಎಂದರು.

“ಧಾರ್ಮಿಕತೆ ಎನ್ನುವುದು ಆಳವಾಗಿ ಬೇರೂರಿರುವ ಈ ದೇಶದಲ್ಲಿ ಈ ರೀತಿಯ ಚರ್ಚೆ ಹುಟ್ಟಿಕೊಂಡರೆ ಜಾತ್ಯತೀತವಾದಿಗಳಿಗೆ ಸೋಲು ಖಚಿತ. ಹೀಗಾಗಿ ನಮ್ಮ ಧಾರ್ಮಿಕ ನಂಬಿಕೆಯನ್ನು ಪ್ರದರ್ಶಿಸಬೇಕೆಂದು ನಿರ್ಧರಿಸಿದ್ದೇವೆ. ಆದರೆ ಇದರಲ್ಲೂ ನಾವು ಎಲ್ಲರನ್ನು ಜತೆಗಿಟ್ಟುಕೊಂಡೇ ನಡೆಯುತ್ತೇವೆ ಮತ್ತು ಇತರ ಧರ್ಮಗಳನ್ನು ಸಹ ಸ್ವೀಕರಿಸುತ್ತ ಮುಂದುವರಿಯುತ್ತೇವೆ”, ಎಂದು ಅವರು ಹೇಳಿದ್ದಾರೆ. ರಾಹುಲ್ ಗಾಂಧಿ ಅವರ ದೇವಸ್ಥಾನ ಭೇಟಿಯನ್ನು ಸಮರ್ಥಿಸಿಕೊಂಡ ತಿರುವನಂತಪುರಂ ಸಂಸದ, “ನಾವು ಸ್ವಾರ್ಥ ಅಥವಾ ಅವಕಾಶವಾದಿತನದಿಂದ ಹೀಗೆ ಮಾಡುತ್ತೇವೆ ಎಂದುಕೊಳ್ಳುವುದು ತಪ್ಪು. ರಾಹುಲ್ ತಮ್ಮನ್ನು ಶಿವಭಕ್ತ ಎಂದು ಹೇಳಿಕೊಳ್ಳುತ್ತಾರೆ. ಅವರೇನು ಮಾತನಾಡುತ್ತಾರೆಂದು ಅವರಿಗೆ ಗೊತ್ತಿದೆ. ಆಧ್ಯಾತ್ಮಿಕದಲ್ಲಿ ರಾಹುಲ್‌ಗೆ ಆಳವಾದ ಜ್ಞಾನವಿದೆ. ಧರ್ಮ ಮತ್ತು ಆಧ್ಯಾತ್ಮದ ಬಗ್ಗೆ ಅತಿ ಹೆಚ್ಚು ತಿಳಿದುಕೊಂಡಿರುವ ಮತ್ತು ಈ ವಿಷಯದಲ್ಲಿ ಅತ್ಯಂತ ಚಿಂತನಶೀಲರಾಗಿರುವ ಭಾರತದ ರಾಜಕಾರಣಿಗಳಲ್ಲಿ ರಾಹುಲ್ ಕೂಡ ಒಬ್ಬರು. ಧರ್ಮವನ್ನು ಗಂಭೀರವಾಗಿ ತೆಗೆದುಕೊಳ್ಳುವ ವ್ಯಕ್ತಿ ಅವರು ಎಂದು ಜನರಿಗೆ ತಿಳಿದಿಲ್ಲ”, ಎಂದು ಹೇಳಿದ್ದಾರೆ.

About the author

ಕನ್ನಡ ಟುಡೆ

Leave a Comment