ರಾಜ್ಯ ಸುದ್ದಿ

ಸರ್ಜಿಕಲ್‌ ಸ್ಟ್ರೈಕ್‌ ಬೆಂಬಲಿಸಿ ರಾಜ್ಯದ ನಗರದಾದ್ಯಂತ ಸಂಭ್ರಮಾಚರಣೆ

ಬೆಂಗಳೂರು: ಪಾಕಿಸ್ತಾನದ ಗಡಿಯಲ್ಲಿ ಭಾರತೀಯ ವಾಯುಪಡೆ ಸೈನಿಕರು ನಡೆಸಿರುವ ಸರ್ಜಿಕಲ್‌ ಸ್ಟ್ರೈಕ್‌ ಬೆಂಬಲಿಸಿ ಬೆಂಗಳೂರು ಮಹಾನಗರದ ನಾನಾ ಬಡಾವಣೆಗಳಲ್ಲಿ ಸಾರ್ವಜನಿಕರು, ಸಂಘ ಸಂಸ್ಥೆಗಳು, ನಾಗರಿಕ ಸಂಘಟನೆಗಳು, ಬಿಜೆಪಿ ಕಾರ್ಯಕರ್ತರು ಸಂಭ್ರಮಾಚರಣೆ ನಡೆಸಿದರು.

ಮಂಗಳವಾರ ಬೆಳಗ್ಗೆಯಿಂದ ಸಂಜೆ ವರೆಗೆ ನಾನಾ ಲೇಔಟ್‌ಗಳಲ್ಲಿ ನಡೆದ ಸಂಭ್ರಮಾಚರಣೆಗಳಲ್ಲಿ ದೊಡ್ಡ ಸಂಖ್ಯೆಯಲ್ಲಿದ್ದ ಸೇರಿದ್ದ ಯುವಜನರು ಪಟಾಕಿ ಹಚ್ಚಿ ಕುಣಿದು ಕುಪ್ಪಳಿಸಿದರು. ಪರಸ್ಪರ ಸಿಹಿ ಹಂಚಿ ಸೇನಾ ಸಾಹಸವನ್ನು ಕೊಂಡಾಡಿದರು. ರಾಜಾಜಿನಗರ, ಮಲ್ಲೇಶ್ವರಂ, ಬಸವನಗುಡಿ, ಬೊಮ್ಮನಹಳ್ಳಿ, ಬ್ಯಾಟರಾಯನಪುರ ಸಹಿತ ನಗರದ ಹಲವು ಭಾಗಗಳಲ್ಲಿ ಸಂಭ್ರಮಾಚರಣೆ ನಡೆಯಿತು. ಯುವಜನತೆ ಜತೆ ಬಡಾವಣೆ ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘಗಳು, ನಾಗರಿಕ ಸಂಘಟನೆಗಳು, ಮಹಿಳಾ ವೇದಿಕೆಯ ಕಾರ್ಯಕರ್ತೆಯರು ಭಾರತ್‌ ಮಾತಾ ಕೀ ಜೈ, ವಂದೇ ಮಾತರಂ ಘೋಷಣೆಗಳನ್ನು ಮೊಳಗಿಸಿದರು. ರಾಷ್ಟ್ರಧ್ವಜ ಹಿಡಿದು ಮೆರವಣಿಗೆ ನಡೆಸಿದರು.

ಶಾಲಾ-ಕಾಲೇಜು ಮುಗಿಸಿ ವಾಪಸಾಗುತ್ತಿದ್ದ ಯುವಕರು ರಸ್ತೆಯಲ್ಲೇ ನಿಂತು ಸೇನೆ ಕ್ರಮವನ್ನು ಶ್ಲಾಘಿಸಿ ಜಯಕಾರ ಹಾಕಿದರು. ಕೆಲ ಯುವಕರ ಗುಂಪು ತ್ರಿವರ್ಣ ಧ್ವಜವನ್ನು ಕೈಯಲ್ಲಿ ಹಿಡಿದು ಸಾಗಿದರು. ವಾಣಿಜ್ಯ ಪ್ರದೇಶಗಳಾದ ಚಿಕ್ಕಪೇಟೆ, ಅವೆನ್ಯೂ ರಸ್ತೆ ಇತ್ಯಾದಿ ಕಡೆಗಳಲ್ಲಿ ವ್ಯಾಪಾರಿಗಳು ಕೂಡ ಸಿಹಿ ಹಂಚಿದರು. ಮೈಸೂರು ಬ್ಯಾಂಕ್‌ ಸರ್ಕಲ್‌ನಲ್ಲಿ ಕನ್ನಡಪರ ಸಂಘಟನೆಗಳು ವಿಜಯೋತ್ಸವ ಆಚರಿಸಿದವು.

ರಿವೆಂಜ್‌ ಡೇ: ಸರ್ಜಿಕಲ್‌ ಸ್ಟ್ರೈಕ್‌ ನಡೆದ ಸುದ್ದಿ ಹೊರ ಬೀಳುತ್ತಿದ್ದಂತೆ ಜನರು ಆ ವಿಚಾರವಾಗಿಯೇ ಚರ್ಚಿಸಲಾರಂಭಿಸಿದರು. ಸಾರ್ವಜನಿಕ ಸ್ಥಳಗಳಲ್ಲೂ ಚರ್ಚೆಯ ವಸ್ತುವಾಗಿತ್ತು. ವ್ಯಾಟ್ಸ್‌ಅಪ್‌ಗಳಲ್ಲೂ ಸೇನಾ ಸಾಹಸ ಮೆಚ್ಚಿ ಮೆಚ್ಚುಗೆಯ ಮಹಾಪೂರವೇ ಹರಿಯಿತು. ‘ಜನವರಿ 26ರಂದು ರಿಪಬ್ಲಿಕ್‌ ಡೇ, ಫೆ.26ರಂದು ರಿವೆಂಜ್‌ ಡೇ’, ಇತ್ಯಾದಿ ಸಂದೇಶಗಳು ಚಿತ್ರ ಸಮೇತ ನಾನಾ ಗ್ರೂಪ್‌ಗಳಲ್ಲಿ ಹರಿದಾಡಿತು.

ಬಿಜೆಪಿ ಕಚೇರಿ ಎದುರು ಸಂಭ್ರಮ: ಯಶಸ್ವಿ ಸರ್ಜಿಕಲ್‌ ಸ್ಟ್ರೈಕ್‌ ನಡೆಸಿದ ಸೇನಾ ಕ್ರಮವನ್ನು ಸ್ವಾಗತಿಸಿ ರಾಜ್ಯ ಬಿಜೆಪಿ ಕಚೇರಿ ಎದುರು ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರು ಸಂಭ್ರಮಾಚರಣೆ ನಡೆಸಿದರು. ರಾಜ್ಯ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಎನ್‌.ರವಿಕುಮಾರ್‌ ನೇತೃತ್ವದಲ್ಲಿ ಕಾರ್ಯಕರ್ತರು ಸಂಭ್ರಮಾಚರಣೆ ನಡೆಸಿ ಪಾಕ್‌ ವಿರುದ್ಧ ಇನ್ನಷ್ಟು ಕ್ರಮ ಕೈಗೊಳ್ಳಲು ಕೇಂದ್ರ ಸರಕಾರ ಹಿಂದೇಟು ಹಾಕಬಾರದು ಎಂದು ಒತ್ತಾಯಿಸಿದರು.

ಪುಲ್ವಾಮಾ ಘಟನೆ ದಿನವೇ ಪಾಕ್‌ ವಿರುದ್ಧ ಪ್ರತಿಕಾರ ಕೈಗೊಳ್ಳುವಂತೆ ಭಾರತೀಯರೆಲ್ಲರೂ ಕೇಂದ್ರ ಸರಕಾರಕ್ಕೆ ನೈತಿಕ ಸ್ಥೈರ್ಯವನ್ನು ತುಂಬಿದ್ದರು. ಅದೀಗ ಸಾಕಾರವಾಗಿದೆ. – ಕೋಟ ಶ್ರೀನಿವಾಸ ಪೂಜಾರಿ, ವಿಧಾನ ಪರಿಷತ್‌ ಪ್ರತಿಪಕ್ಷದ ನಾಯಕ

ಸ್ವತಃ ನಾನೇ ದಾಳಿಯಲ್ಲಿ ಪಾಲ್ಗೊಂಡಷ್ಟು ಸಂತಸವಾಗಿದೆ. 1971ರ ಬಳಿಕ ಪ್ರಥಮ ಬಾರಿಗೆ ಎಲ್‌ಒಸಿ ದಾಟಿ ನಮ್ಮ ವಾಯುಪಡೆ ಉಗ್ರರನ್ನು ಸೆಡೆಬಡಿದು ಪಾಕ್‌ಗೆ ಪಾಠ ಕಲಿಸಿದ್ದೇವೆ. ಅಗತ್ಯ ಬಿದ್ದಲ್ಲಿ ಇನ್ನಷ್ಟು ದಾಳಿಗೆ ಸರಕಾರ ಹಿಂದೇಟು ಹಾಕಬಾರದು. – ಬಿ.ಯು.ಚೆಂಗಪ್ಪ, ನಿವೃತ್ತ ಏರ್‌ ಮಾರ್ಷಲ್‌

ಪ್ರತಿ ಆಪರೇಷನ್‌ನಲ್ಲೂ ಕೌಶಲ್ಯ ಹೊಂದಿರುವ ಸೂಪರ್‌ ಪೈಲಟ್‌ನ ಅಗತ್ಯವಿದೆ. ಉಗ್ರರನ್ನು ಸದೆ ಬಡಿಯಲು ಇದಕ್ಕಿಂತ ಉತ್ತಮವಾದ ಬೇರೆ ಆಯ್ಕೆ ಇರಲಿಲ್ಲ. ಅದನ್ನು ನಮ್ಮ ಸೇನೆ ಅತ್ಯಂತ ಯಶಸ್ವಿಯಾಗಿ ಮಾಡಿದೆ. – ಕರ್ನಲ್‌ ಜಿ.ವಿ. ಶ್ರೀಧರ್‌, ನಿವೃತ್ತ ಯೋಧ 

ಪುಲ್ವಾಮಾದಲ್ಲಿ ಭಾರತೀಯ ಯೋಧರ ಮೇಲೆ ನಡೆದ ದಾಳಿಗೆ ಇಂದು ನಮ್ಮ ಯೋಧರು ತಕ್ಕ ಪ್ರತ್ಯುತ್ತರ ನೀಡಿದ್ದಾರೆ. ನಮ್ಮ ಸೈನಿಕರು ಸದಾ ಇದೇ ರೀತಿ ದಿಟ್ಟತನದಿಂದ ಹೋರಾಟ ನಡೆಸಬೇಕು. – ರವಿ, ಬ್ರಿಗೇಡಿಯರ್‌, ಮಾಜಿ ಸೈನಿಕ

ನಿವೃತ್ತ ವಾಯುಸೇನಾಧಿಕಾರಿ ಅಭಿಪ್ರಾಯ :ಪಾಕಿಸ್ತಾನಕ್ಕೆ ಒಂದು ಸಂದೇಶವನ್ನು ರವಾನಿಸುವ ಉದ್ದೇಶದಿಂದ ಪಾಕ್‌ ಉಗ್ರರ ಮೇಲೆ ಒಂದು ಸಣ್ಣ ಮಟ್ಟದ ದಾಳಿ ನಡೆಸಲಾಗಿದೆ. ಪಾಕ್‌ನವರು ಇದನ್ನು ಮನಗಾಣಬೇಕು. – ಕೆ.ಮಥಾಯಿ, ನಿವೃತ್ತ ವಾಯುಸೇನೆ ಅಧಿಕಾರಿ ಹಾಗೂ ಕರ್ನಾಟಕ ಮಾಜಿ ಸೈನಿಕರ ಒಕ್ಕೂಟದ ಅಧ್ಯಕ್ಷ 

About the author

ಕನ್ನಡ ಟುಡೆ

Leave a Comment