ದೇಶ ವಿದೇಶ

ಸಾವಿನ ವದಂತಿಗಳ ನಡುವೆಯೇ, ಪಾಕ್‌ ಸೇನಾ ಆಸ್ಪತ್ರೆಯಿಂದ ಅಜರ್ ಸ್ಥಳಾಂತರ

ಶ್ರೀನಗರ: ಬಾಲಾಕೋಟ್ ಉಗ್ರ ನೆಲೆಗಳ ಮೇಲೆ ಭಾರತೀಯ ವಾಯುಪಡೆ ನಡೆಸಿದ ವೈಮಾನಿಕ ದಾಳಿಯಲ್ಲಿ ಜೈಷೆ ಮೊಹಮ್ಮದ್‌ ಭಯೋತ್ಪಾದಕ ಸಂಘಟನೆ ಮುಖ್ಯಸ್ಥ ಮಸೂದ್ ಅಜರ್‌ ಹತನಾಗಿದ್ದಾನೆ ಎಂಬ ವದಂತಿಗಳ ನಡುವೆಯೇ, ಪಾಕ್‌ ಸೇನಾ ಆತನನ್ನು ರಾವಲ್ಪಿಂಡಿ ಮಿಲಿಟರಿ ಆಸ್ಪತ್ರೆಯಿಂದ ಬಹವಾಲ್‌ಪುರದಲ್ಲಿ ಗೋಥ್ ಘನ್ನಿ ಶಿಬಿರಕ್ಕೆ ಭಾನುವಾರ ರಾತ್ರಿ 7:30ಕ್ಕೆ ಸ್ಥಳಾಂತರಿಸಿದೆ.

ಜೈಷ್ ಮುಖ್ಯಸ್ಥ ಹತನಾಗಿದ್ದಾನೆ ಎಂಬ ವದಂತಿಗಳನ್ನು ಪಾಕ್ ನಿರಾಕರಿಸಿತ್ತು. ಅದರ ನಡುವೆಯೇ ಆತನನ್ನು ಆತನ ನೆಲೆಗೆ ಸ್ಥಳಾಂತರಿಸಿರುವುದನ್ನು ಗುಪ್ತಚರ ಮೂಲಗಳು ದೃಢಪಡಿಸಿವೆ. ಅಜರ್‌ನ ಸ್ಥಳಾಂತರದ ಬೆನ್ನಲ್ಲೇ, ಇಮ್ರಾನ್ ಖಾನ್ ಸರಕಾರದ ವಿರುದ್ಧ ಜೈಷೆ ಮೊಹಮ್ಮದ್ ಉಗ್ರ ಸಂಘಟನೆ ಕಿಡಿ ಕಾರಿದೆ. ಭಾರತ ಹಾಗೂ ಅಂತಾರಾಷ್ಟ್ರೀಯ ಸಮುದಾಯದ ಒತ್ತಡಕ್ಕೆ ಇಮ್ರಾನ್ ಸರಕಾರ ಮಣಿದಿದೆ ಎಂದು ಜೈಷ್ ಆರೋಪಿಸಿದೆ.  ಅಜರ್ ಮೂತ್ರಪಿಂಡದ ಕಾಯಿಲೆಯಿಂದ ನರಳುತ್ತಿದ್ದು, ಕೆಲವು ತಿಂಗಳುಗಳಿಂದ ರಾವಲ್ಪಿಂಡಿಯ ಸೇನಾ ಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಎಂದು ವರದಿಯಾಗಿತ್ತು.  ಪುಲ್ವಾಮಾ ದಾಳಿಯಲ್ಲಿ 40 ಮಂದಿ ಸಿಆರ್‌ಪಿಎಫ್ ಯೋಧರು ಹುತಾತ್ಮರಾದ ಬಳಿಕ, ಅಜರ್‌ಗೆ ಪಾಕಿಸ್ತಾನದ ವಿಶೇಷ ರಕ್ಷಣಾ ದಳದ ಕಮಾಂಡೋಗಳಿಂದ ಹೆಚ್ಚುವರಿ ಭದ್ರತೆ ಒದಗಿಸಲಾಗಿದೆ ಎಂದು ಮೂಲಗಳು ಹೇಳಿವೆ.

ಮಸೂದ್ ಅಜರ್‌ ಬದುಕಿದ್ದಾನೆ ಮತ್ತು ಆರೋಗ್ಯವಾಗಿಯೇ ಇದ್ದಾನೆ ಎಂದು ಭಾನುವಾರ ಜೈಷ್ ಬಿಡುಗಡೆ ಮಾಡಿದ ಹೇಳಿಕೆ ತಿಳಿಸಿದೆ. ಭಾರತೀಯ ವಾಯುಪಡೆ ಬಾಲಾಕೋಟ್‌ನ ತರಬೇತಿ ಕೇಂದ್ರದ ಮೇಲೆ ದಾಳಿ ನಡೆಸಿದ್ದು ನಿಜ ಎಂದೂ ಅದು ಒಪ್ಪಿಕೊಂಡಿದೆ. ಆದರೆ ಸಾವುನೋವುಗಳು ಉಂಟಾಗಿರುವುದನ್ನು ನಿರಾಕರಿಸಿದೆ. ‘ಭಾರತದ ಯುದ್ಧ ವಿಮಾನಗಳು ಇಸ್ರೇಲಿ ಗುರಿ ನಿರ್ದೇಶಿತ ಕ್ಷಿಪಣಿಗಳೊಂದಿಗೆ ನಮ್ಮ ಮೇಲೆ ದಾಳಿ ನಡೆಸಿವೆ. ಆದರೆ ಅಲ್ಲಾನ ದಯೆ ಅವರನ್ನು ದಿಕ್ಕು ತಪ್ಪಿಸಿದ್ದು, ನಮ್ಮನ್ನು ಪಾರು ಮಾಡಿದೆ’ ಎಂದು ಜೈಷ್ ಹೇಳಿಕೊಂಡಿದೆ.

ಮುಷರಫ್ ಹಾದಿ ತುಳಿಯುತ್ತಿರುವ ಇಮ್ರಾನ್: ಜೈಷ್ ಕಿಡಿ ಇಮ್ರಾನ್ ಖಾನ್ ಸರಕಾರ ಈಗ ಮಾಜಿ ಅಧ್ಯಕ್ಷ ಜನರಲ್ ಪರ್ವೇಜ್ ಮುಷರಫ್ ನೀತಿಗಳನ್ನೇ ಅನುಸರಿಸಲು ಆರಂಭಿಸಿದೆ. 9/11ರ ದಾಳಿ ಬಳಿಕ ಅಮೆರಿಕದ ಒತ್ತಡಕ್ಕೆ ಮಣಿದು ಮುಷರಫ್ ಹಲವು ಉಗ್ರ ಸಂಘಟನೆಗಳ ವಿರುದ್ಧ ಕಾರ್ಯಾಚರಣೆ ನಡೆಸಿದ್ದರು ಎಂದು ಜೈಷ್ ದೂಷಿಸಿದೆ. ‘ಮೊದಲು ಅವರು ಭಾರತೀಯ ಪೈಲಟ್‌ನನ್ನು ಬಿಡುಗಡೆ ಮಾಡಿದರು. ಈಗ ನಮ್ಮ ತರಬೇತಿ ಕೇಂದ್ರಗಳನ್ನು ಹತ್ತಿಕ್ಕಲು ನಿರ್ಧರಿಸಿದ್ದಾರೆ. ಅವರು ಶತ್ರುಗಳ ಬಗ್ಗೆ (ಭಾರತದ ಬಗ್ಗೆ) ಮೃದು ಧೋರಣೆ ಅನುಸರಿಸುತ್ತಿದ್ದಾರೆ. ಆದರೆ ತನ್ನದೇ ಜನರ ಬಗ್ಗೆ ಕಠಿಣ ಧೋರಣೆ ತಾಳಿದ್ದಾರೆ’ ಎಂದು ಜೈಷ್ ಹೇಳಿದೆ. ಸುರಕ್ಷಿತ ನೆಲೆಗಳಿಗೆ ಸ್ಥಳಾಂತರಗೊಳ್ಳುವಂತೆ ತನ್ನ ಜಿಹಾದಿಗಳಿಗೆ ಜೈಷ್‌ ಸಲಹೆ ನೀಡಿದ್ದು, ಹೊಸ ಯುದ್ಧಕ್ಕೆ ಸಜ್ಜಾಗುವಂತೆ ಕರೆ ನೀಡಿದೆ.

ಅಜರ್‌ ಮೃತಪಟ್ಟಿದ್ದಾನೆ ಎಂಬ ವದಂತಿಗಳು ಭಾನುವಾರ ಪೂರ್ತಿ ಹರಿದಾಡಿದವು. ಅನಾಮಿಕ ಹಾಗೂ ಅನಧಿಕೃತ ಬ್ಲಾಗ್ ಪೋಸ್ಟ್ ಒಂದರಲ್ಲಿ, ಬಾಲಾಕೋಟ್ ಉಗ್ರ ನೆಲೆಗಳ ಮೇಲೆ ಭಾರತೀಯ ವಾಯುಪಡೆ ದಾಳಿ ನಡೆಸಿದ ಸಂದರ್ಭ ಅಲ್ಲೇ ಇದ್ದ ಮಸೂದ್ ಅಜರ್‌ ಹಾಗೂ ಆತನ ಕರ್ನಲ್‌ ಸಲೀಂ ಗಂಭೀರ ಗಾಯಗೊಂಡಿದ್ದಾರೆ ಎಂದು ಪ್ರಕಟವಾಗಿತ್ತು. ಅದೇ ಗಾಯಗಳಿಂದಾಗಿ ಶನಿವಾರ ಅಜರ್ ಮೃತಪಟ್ಟಿದ್ದಾನೆ ಎಂದೂ ಬ್ಲಾಗ್‌ಪೋಸ್ಟ್ ಹೇಳಿತ್ತು.  ಭಾರತೀಯ ಭದ್ರತಾ ಪಡೆಗಳು ಅಜರ್‌ನ ಅಳಿಯನನ್ನು ಹತ್ಯೆ ಮಾಡಿದ ಬಳಿಕ ಕಳೆದ ಅಕ್ಟೋಬರ್‌ನಲ್ಲಿ ಅಜರ್‌ ಬಾಲಾಕೋಟ್‌ ಉಗ್ರ ನೆಲೆಗೆ ಭೇಟಿ ನೀಡಿದ್ದ ಎಂದು ಮತ್ತೆ ಕೆಲವು ವರದಿಗಳು ಹೇಳಿವೆ. ಅಜರ್ ಪಾಕಿಸ್ತಾನದಲ್ಲೇ ಇದ್ದಾನೆ; ಆದರೆ ತೀವ್ರ ಅಸ್ವಸ್ಥನಾಗಿದ್ದಾನೆ ಎಂದು ಪಾಕ್ ವಿದೇಶಾಂಗ ಸಚಿವ ಶಾ ಮೆಹಮೂದ್ ಖುರೇಷಿ ಕಳೆದ ವಾರವೇ ಸಿಎನ್‌ಎನ್‌ಗೆ ದೃಢಪಡಿಸಿದ್ದರು. ‘ನನ್ನ ಮಾಹಿತಿಗಳ ಪ್ರಕಾರ ಆತ ಪಾಕ್‌ನಲ್ಲೇ ಇದ್ದಾನೆ, ಆದರೆ ತೀವ್ರ ಅನಾರೋಗ್ಯದಿಂದ ನರಳುತ್ತಿದ್ದಾನೆ. ಮನೆಯಿಂದ ಹೊರ ಬರಲೂ ಆಗದಷ್ಟು ನಿತ್ರಾಣಗೊಂಡಿದ್ದಾನೆ’ ಎಂದು ಖುರೇಷಿ ಹೇಳಿದ್ದರು. ಅಜರ್‌ ನಿಷೇಧಕ್ಕೆ ಒತ್ತಾಯಿಸಿ ವಿಶ್ವಸಂಸ್ಥೆ ಭದ್ರತಾ ಸಮಿತಿ ಮುಂದೆ ಭಾರತದ ಪರವಾಗಿ ಫ್ರಾನ್ಸ್‌ ಹೊಸದಾಗಿ ಪ್ರಸ್ತಾವ ಮಂಡಿಸಲು ಮುಂದಾಗಿರುವಂತೆಯೇ ಈ ವರದಿ ಬಂದಿದೆ.

About the author

ಕನ್ನಡ ಟುಡೆ

Leave a Comment