ರಾಜ್ಯ ಸುದ್ದಿ

ಸಿಎಂ ಯೋಗಿ ಆದಿತ್ಯನಾಥ ತ್ಯಾಗಮಯಿ: ನಿರ್ಮಲಾನಂದನಾಥ ಸ್ವಾಮೀಜಿ

ಬೆಂಗಳೂರು: ಸನ್ಯಾಸಿಯಾಗಿದ್ದ ಯೋಗಿ ಆದಿತ್ಯನಾಥರು ಏಕಾಏಕಿ ಉತ್ತರ ಪ್ರದೇಶದ ಸಿಎಂ ಆಗಲಿಲ್ಲ. ಅವರು ಐದು ಬಾರಿ ಸಂಸದರಾಗಿದ್ದು, ಬಹುಕಾಲದಿಂದ ರಾಜಕಾರಣದಲ್ಲಿ ಗುರುತಿಸಿಕೊಂಡಿದ್ದಾರೆ. ಪ್ರಜಾಪ್ರಭುತ್ವ ವ್ಯವಸ್ಥೆಯಡಿ ಜನರ ಸೇವೆ ಮಾಡುವ ಮಹತ್ವಾಕಾಂಕ್ಷೆಯೊಂದಿಗೆ ರಾಜಕೀಯ ಪ್ರವೇಶಿಸಿದರು ಎಂದು ಆದಿಚುಂಚನಗಿರಿ ಮಹಾಸಂಸ್ಥಾನದ ಡಾ. ಶ್ರೀ ನಿರ್ಮಲಾನಂದ ನಾಥ ಸ್ವಾಮೀಜಿ ಅಭಿಪ್ರಾಯಪಟ್ಟರು.

ಇನ್‌ಸ್ಪೈರ್‌ ಪುಸ್ತಕ ಪ್ರಕಾಶನವು ಭಾರತೀಯ ವಿದ್ಯಾಭವನದಲ್ಲಿ ಆಯೋಜಿಸಿದ್ದ ಡಾ. ಎಚ್‌.ಎಂ. ಚಂದ್ರಶೇಖರ್‌ ಅವರ ಕನ್ನಡ ಅನುವಾದಿತ ಕೃತಿ (ಮೂಲ: ಶಂತನು ಗುಪ್ತ) ‘ಮೋದಿ ಮೆಚ್ಚಿದ ಯೋಗಿ’ ಪುಸ್ತಕದ ಬಿಡುಗಡೆ ಸಮಾರಂಭದಲ್ಲಿ ಸೋಮವಾರ ಅವರು ಮಾತನಾಡಿದರು.

ಸನ್ಯಾಸಿಯಾಗಿದ್ದ ಯೋಗಿ ಅವರು ಸಿಎಂ ಪಟ್ಟಕ್ಕೆ ಏರಿದ ಬಗ್ಗೆ ಹಲವು ಜಿಜ್ಞಾಸೆಗಳೇ ಹುಟ್ಟಿಕೊಂಡವು. ಅನೇಕರಲ್ಲಿ ಗೊಂದಲಗಳು ಮೂಡಿದ್ದವು. ಆದರೆ ಯೋಗಿ ಅವರು ಏಕಾ ಏಕಿ ರಾಜಕಾರಣಕ್ಕೆ ಬಂದವರಲ್ಲ. ಐದು ಬಾರಿ ಎಂಪಿ ಆಗಿ ಆಯ್ಕೆಯಾಗಿದ್ದಾರೆ. ಉತ್ತಮ ಕೆಲಸಗಳನ್ನೂ ಮಾಡಿದ್ದಾರೆ. ತ್ಯಾಗದಿಂದ ಮಾತ್ರ ಎಲ್ಲರನ್ನೂ ಗೆಲ್ಲಬಹುದು. ಅಂತಹ ತ್ಯಾಗಮಯ ಬದುಕನ್ನು ಕಟ್ಟಿಕೊಂಡ ಯೋಗಿ ಅವರು 20 ಕೋಟಿ ಜನಸಂಖ್ಯೆ ಇರುವ ಉತ್ತರಪ್ರದೇಶದ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸುತ್ತಿರುವುದು ಸಂತೋಷದ ಸಂಗತಿ ಎಂದರು.

ಯದುಗಿರಿಯ ಯತಿರಾಜ ಮಠಾಧ್ಯಕ್ಷರಾದ ಯದುಗಿರಿ ಯತಿರಾಜ ನಾರಾಯಣ ರಾಮಾನುಜ ಜೀಯರ್‌ ಮಾತನಾಡಿ, ಸಮಾಜಮುಖಿ ಚಿಂತನೆ ರಾಷ್ಟ್ರದಲ್ಲಿ ನಿರಂತರವಾಗಿ ನಡೆಯಬೇಕು. ಸಮಾಜಮುಖಿಯಾಗಿ ಹೋದರೆ ಮಾತ್ರ ಸನ್ಯಾಸಿ ಜೀವನ ಸಾರ್ಥಕವಾಗುತ್ತದೆ. ಉತ್ತರ ಪ್ರದೇಶದಲ್ಲಿ ಯೋಗಿ ಆದಿತ್ಯನಾಥ ಅವರು ಮುಖ್ಯಮಂತ್ರಿಯಾಗಿದ್ದು ನಮ್ಮೆಲ್ಲ ಸಂತರಿಗೆ ಸಂಭ್ರಮ ತಂದಿದೆ. ಅಲ್ಲಿ ಆಧ್ಯಾತ್ಮ ವಾತಾವರಣವಿದೆ. ದೀನ ದಲಿತರಿಗೆ ಬಡವರಿಗೆ ದಾರಿ ದೀಪವಾಗಬಹುದು ಎನ್ನುವ ಆಶಯ ನಮ್ಮದು ಎಂದು ನುಡಿದರು. 950 ವರ್ಷಗಳ ಹಿಂದೆ ಈ ನಾಡಿನಲ್ಲಿ ದೊಡ್ಡ ಕ್ರಾಂತಿಯಾಯಿತು. ತಮಿಳುನಾಡಿನಿಂದ ಕರ್ನಾಟಕಕ್ಕೆ ಸಂತ ರಾಮಾನುಜರು ಬಂದರು. ಅವರು ಇಡೀ ಮನುಕುಲದ ಉದ್ಧಾರಕ್ಕೆ ಸಂಕಲ್ಪ ಮಾಡಿದರು. ಯಾವುದೇ ಜಾತಿ, ಧರ್ಮ ಬೇದ ಭಾವವಿಲ್ಲದೆ ಭಗವಂತನ ಮುಂದೆ ನಾವೆಲ್ಲ ಒಂದೆ ಎಂಬ ಚಿಂತನೆ ಮಾಡಿದವರು ಎಂದು ನೆನಪಿಸಿಕೊಂಡರು.

ಎಚ್‌ಡಿಕೆ ಹೇಳುವುದನ್ನು ಬಿಟ್ಟು ರಾಜೀನಾಮೆ ಕೊಡಲಿ : ಅಶೋಕ್‌ ವ್ಯಂಗ್ಯ

ಕುಮಾರಸ್ವಾಮಿಯವರ ರಾಜಿನಾಮೆ ವಿಚಾರಕ್ಕೆ ಪ್ರತಿಕ್ರಿಯೆ ನೀಡಿದ ಆರ್‌. ಅಶೋಕ್‌, ರಾಜೀನಾಮೆ ಕೊಡ್ತೀನಿ ಕೊಡ್ತೀನಿ ಎನ್ನುತ್ತಿದ್ದಾರೆ. ಸುಮ್ಮನೆ ಹೇಳುವುದನ್ನು ಬಿಟ್ಟು ಒಮ್ಮೆಲೆಗೆ ರಾಜೀನಾಮೆ ಕೊಡಲಿ. ರಾಜ್ಯಕ್ಕೆ ಸುಭದ್ರವಾದ ಸರಕಾರ ಬೇಕಾಗಿದೆ. ಜನ ಇದನ್ನು ಬಯಸುತ್ತಿದ್ದಾರೆ ಎಂದು ನುಡಿದರು. ಸರಕಾರದಲ್ಲಿ ಏನೂ ಕೆಲಸ ಆಗುತ್ತಿಲ್ಲ. ಕುಮಾರಸ್ವಾಮಿಯವರು ಕಾಂಗ್ರೆಸ್‌ನ ‘ಕ್ಲರ್ಕ್‌’ನಂತೆ ತಂತಿ ಮೇಲೆ ನಡೆಯುತ್ತಿದ್ದಾರೆ. ಯಾವಾಗ ಬೀಳುವರೋ ಗೊತ್ತಿಲ್ಲ. ಅಂತೂ ಲೋಕಸಭೆ ಚುನಾವಣೆಗೆ ಮುನ್ನವೇ ಮೈತ್ರಿ ಸರಕಾರ ಬೀಳುತ್ತೆ ಎಂದು ಅಶೋಕ್‌ ಭವಿಷ್ಯ ನುಡಿದರು.

ಪ್ರತಿ ಇಲಾಖೆಯಲ್ಲೂ ಕಾಂಗ್ರೆಸ್‌ನ ಕಿರುಕುಳ ಆರಂಭವಾಗಿದೆ. ಹೀಗಾಗಿ ಏನೂ ಕೆಲಸಗಳು ನಡೆಯುತ್ತಿಲ್ಲ. ಇದೊಂದು ರೀತಿ ಕಳ್ಳ-ಪೊಲೀಸ್‌ ಆಟ ಆಗಿದೆ. ದೇವೇಗೌಡರು ಒಂದು ಹೇಳಿಕೆ ನೀಡಿದರೆ, ಸಿದ್ದರಾಮಯ್ಯ ಮತ್ತೊಂದು ಹೇಳಿಕೆ ನೀಡುತ್ತಾರೆ. ಮತ್ತೊಂದೆಡೆ ಕುಮಾರಸ್ವಾಮಿ ಇನ್ನೊಂದು ಹೇಳಿಕೆ ನೀಡುತ್ತಿದ್ದಾರೆ. ಇಷ್ಟೆಲ್ಲಾ ಗೊಂದಲಗಳಿಗೆ ಸಿದ್ದರಾಮಯ್ಯನವರೇ ಕಾರಣ ಎಂದು ಅಶೋಕ್‌ ಆರೋಪಿಸಿದರು.

About the author

ಕನ್ನಡ ಟುಡೆ

Leave a Comment