ರಾಜ್ಯ ಸುದ್ದಿ

ಸಿಐಎಸ್‌ಎಫ್ ಜವಾನರ ಮೇಲೆ ಪುಷ್ಪವೃಷ್ಟಿಗೈದು ಬರಮಾಡಿಕೊಂಡ ಬೆಂಗಳೂರಿಗರು

ಬೆಂಗಳೂರು: ಬೆಂಗಳೂರಲ್ಲಿ ಚುನಾವಣಾ ಸಿದ್ಧತೆಗಾಗಿ ಕೇಂದ್ರ ಕೈಗಾರಿಕಾ ರಕ್ಷಣಾ ಪಡೆಗಳು (ಸಿಐಎಸ್‌ಎಫ್) ಫ್ಲ್ಯಾಗ್ ಮಾರ್ಚ್ ಮಾಡುವಾಗ ಈ ಯೋಧರಿಗೆ ಅಚ್ಚರಿ ಕಾದಿತ್ತು. ಈ ರಕ್ಷಣಾ ಭಟರು ಪಥ ಸಂಚಲನ ನಡೆಸುತ್ತಿರುವಂತೆಯೇ ಸ್ಥಳೀಯರು ಅವರಿಗೆ ಪುಷ್ಪ ವೃಷ್ಟಿಯ ಮೂಲಕ ಆತ್ಮೀಯ ಸ್ವಾಗತ ಕೋರುವ ಮೂಲಕ, ಈ ಪಡೆಗಳ ಬದುಕಿನಲ್ಲೊಂದು ಎಂದೂ ಮರೆಯದ ಅಧ್ಯಾಯವೊಂದು ದಾಖಲಾಯಿತು. ಬೆಂಗಳೂರು ಉತ್ತರ ಲೋಕಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ಬರುವ ವೈಟ್‌ಫೀಲ್ಡ್‌ನಲ್ಲಿ ಶನಿವಾರ ಇಂಥದ್ದೊಂದು ಸ್ಮರಣೀಯ ಘಟನೆ ನಡೆಯಿತು. ಸೈನಿಕರು ಮತ್ತು ಪೊಲೀಸ್ ಅಧಿಕಾರಿಗಳು 8 ಕಿ.ಮೀ. ರಸ್ತೆಯಲ್ಲಿ ಸಾಗುತ್ತಿರುವಂತೆಯೇ ಜನರು ಸಿಐಎಸ್‌ಎಫ್ ಜವಾನರು ಮತ್ತು ಪೊಲೀಸರ ಮೇಲೆ ತಮ್ಮ ತಮ್ಮ ಮನೆಗಳು ಹಾಗೂ ಕಟ್ಟಡಗಳ ಮೇಲಿಂದ ಪುಷ್ಪವೃಷ್ಟಿ ಸುರಿಸಿದರು. ಕೆ.ಆರ್.ಪುರ ತಾಲೂಕು ಕಚೇರಿಯಿಂದ ದೇವಸಂದ್ರ ಮುಖ್ಯ ರಸ್ತೆ, ಮಸೀದಿ ರಸ್ತೆ, ಅಯ್ಯಪ್ಪನಗರ ಹಾಗೂ ಭಟ್ರಹಳ್ಳಿ ಮೂಲಕ ಟಿಸಿ.ಪಾಳ್ಯ ರೋಡ್ ಚರ್ಚ್‌ವರೆಗೆ ನಡೆದ ಪಥ ಸಂಚಲನದಲ್ಲಿ ಸುಮಾರು 250ಕ್ಕೂ ಹೆಚ್ಚು ಯೋಧರು ಭಾಗವಹಿಸಿದ್ದರು. ಇದೊಂದು ಅತ್ಯಂತ ವಿಶಿಷ್ಟ ಅನುಭವ ಎಂದು ವೈಟ್‌ಫೀಲ್ಡ್ ಡಿಸಿಪಿ ಅಬ್ದುಲ್ ಅಹದ್ ಖುಷಿಯಿಂದಲೇ ಹೇಳಿಕೊಂಡರು. ಸಿಐಎಸ್ಎಫ್ ಯೋಧರಿಗೆ ನಾವು ನಮ್ಮ ಪ್ರೀತಿ ಮತ್ತು ಗೌರವವನ್ನು ತೋರಿಸಬೇಕಿತ್ತು. ಇದೊಂದು ಸಂದರ್ಭ ಸಿಕ್ಕಿದೆ. ದೇಶಭಕ್ತಿ ಗೀತೆಗಳೊಂದಿಗೆ ನಾವು ಅವರ ಮೇಲೆ ಪುಷ್ಪವೃಷ್ಟಿಗರೆದೆವು ಎಂದು ಕೆ.ಆರ್.ಪುರದ ಯುವಕ ಷಣ್ಮುಗ ಹೇಳಿದ್ದಾರೆ.

About the author

ಕನ್ನಡ ಟುಡೆ

Leave a Comment