ರಾಜ್ಯ ಸುದ್ದಿ

ಸಿದ್ಧಗಂಗಾ ಮಠದ ಡಾ.ಶಿವಕುಮಾರ ಸ್ವಾಮೀಜಿ ವಿಶ್ರಾಂತಿಯಲ್ಲಿರುವ ವಿಡಿಯೊ ಬಿಡುಗಡೆ

ತುಮಕೂರು: ಸಿದ್ಧಗಂಗಾ ಮಠದ ಡಾ. ಶಿವಕುಮಾರ ಸ್ವಾಮೀಜಿ ವಿಶ್ರಾಂತಿ ಪಡೆಯುತ್ತಿರುವ ಎರಡು ನಿಮಿಷಗಳ ವಿಡಿಯೊವನ್ನು ಮಾಧ್ಯಮಗಳಿಗೆ ಮಂಗಳವಾರ ಬಿಡುಗಡೆ ಮಾಡುವ ಮೂಲಕ ಶ್ರೀಗಳ ಆರೋಗ್ಯ ಕುರಿತು ಭಕ್ತರಲ್ಲಿದ್ದ ಆತಂಕವನ್ನು ಶ್ರೀಮಠವು ದೂರಮಾಡಿದೆ.

ಶ್ರೀಗಳ ಆರೋಗ್ಯದ ಬಗ್ಗೆ ಕಳೆದ ಎರಡು ದಿನಗಳಿಂದ ತೀವ್ರ ಕಳವಳಗೊಂಡಿದ್ದ ಭಕ್ತರು, ಶ್ರೀಗಳ ದರ್ಶನಕ್ಕೆ ಅವಕಾಶವಿಲ್ಲವೆನ್ನುವುದು ತಿಳಿದಿದ್ದರೂ ಮಂಗಳವಾರ ನೂರಾರು ಸಂಖ್ಯೆಯಲ್ಲಿ ಮಠಕ್ಕಾಗಮಿಸಿದ್ದರು. ಆರೋಗ್ಯದ ಮಾಹಿತಿಗಾಗಿ ಮಠದ ಆಡಳಿತ ಕಚೇರಿ, ಕಿರಿಯ ಶ್ರೀಗಳನ್ನು ಸಂಪರ್ಕಿಸುತ್ತಿದ್ದರು. ಭಕ್ತರ ಒತ್ತಡಕ್ಕೆ ಮಣಿದ ಮಠದ ಆಡಳಿತ ಮಂಡಳಿ, ಶ್ರೀಗಳು ಹಳೇ ಮಠದಲ್ಲಿ ವಿಶ್ರಾಂತಿ ಪಡೆಯುತ್ತಿರುವ ವಿಡಿಯೊವನ್ನು ಸಂಜೆ ವೇಳೆಗೆ ಮಾಧ್ಯಮಗಳಿಗೆ ಬಿಡುಗಡೆ ಮಾಡಿತು. ವಿಡಿಯೊದಲ್ಲಿ ಶ್ರೀಗಳು ಎರಡ್ಮೂರು ಬಾರಿ ಕಣ್ಣು ಬಿಟ್ಟು ನೋಡಿದ್ದಾರಲ್ಲದೆ ಕೈಕಾಲು ಆಡಿಸಿದ್ದಾರೆ. ತಮ್ಮ ಎಂದಿನ ಶೈಲಿಯಲ್ಲಿ ಒಮ್ಮೆ ಬಲಗೈ ಮೇಲೆತ್ತಿ ತಲೆ ಮೇಲೆ ಇರಿಸಿಕೊಂಡ ದೃಶ್ಯವಿದೆ.

ಮುಂದುವರಿದ ಚಿಕಿತ್ಸೆ : ವೈದ್ಯರ ತಂಡ ಮಂಗಳವಾರ ಮುಂಜಾನೆ 5 ಗಂಟೆಯಿಂದ ಶ್ರೀಗಳಿಗೆ ಚಿಕಿತ್ಸೆ ಆರಂಭಿಸಿದೆ. ರಕ್ತ ಪರೀಕ್ಷೆ ಸೇರಿದಂತೆ ನಾನಾ ಪರೀಕ್ಷೆ ನಡೆಸಿ ಸೂಕ್ತ ಚಿಕಿತ್ಸೆ ನೀಡಿದೆ. ಆರೋಗ್ಯದ ಬಗ್ಗೆ ಚೆನ್ನೈನ ರೇಲಾ ಆಸ್ಪತ್ರೆಯ ವೈದ್ಯರು ನಿರಂತರವಾಗಿ ಮಾಹಿತಿ ಪಡೆಯುತ್ತಿದ್ದು, ಯಾವುದೇ ಆತಂಕ ಬೇಡ. ಶ್ರೀಗಳಿಗೆ ದ್ರವರೂಪದ ಆಹಾರ ನೀಡಲಾಗುತ್ತಿದೆ,” ಎಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಶ್ರೀಗಳ ಆಪ್ತ ವೈದ್ಯ ಡಾ. ಪರಮೇಶ್‌ ಸ್ಪಷ್ಟಪಡಿಸಿದ್ದಾರೆ.

ಪೇಜಾವರ ಶ್ರೀ ಭೇಟಿ : ಉಡುಪಿ ಕೃಷ್ಣ ಮಠದ ಪೇಜಾವರ ಶ್ರೀಗಳು ಮಂಗಳವಾರ ಬೆಳಗ್ಗೆ ಸಿದ್ಧಗಂಗಾ ಮಠಕ್ಕೆ ಭೇಟಿ ನೀಡಿ ಹಿರಿಯ ಶ್ರೀಗಳ ದರ್ಶನ ಪಡೆದರು. ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ”ಶ್ರೀಗಳನ್ನು ನೋಡಿ ಸಮಾಧಾನವಾಯಿತು. ಆರೋಗ್ಯ ಸ್ಥಿರವಾಗಿದೆ. ಆತಂಕವಿಲ್ಲವೆಂದು ವೈದ್ಯರು ಹೇಳಿದ್ದಾರೆ. ವಿಶ್ರಾಂತಿಯಲ್ಲಿರುವ ಕಾರಣ ನಮಗೆ ಮಾತನಾಡಲು ಆಗಲಿಲ್ಲ. ಈ ವೇಳೆ ಕಿರಿಯ ಶ್ರೀಗಳೂ ಇದ್ದರು,” ಎಂದು ಮಾಹಿತಿ ನೀಡಿದರು.

ಗೃಹ ಸಚಿವರ ಭೇಟಿ :ಗೃಹ ಸಚಿವ ಎಂ.ಬಿ.ಪಾಟೀಲ್‌ ತಮ್ಮ ಪತ್ನಿ ಆಶಾ ಪಾಟೀಲ್‌ ಜತೆಗೆ ಬಂದು ಶ್ರೀಗಳ ದರ್ಶನ ಪಡೆದರು. ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ”ನಾನು ಖುದ್ದಾಗಿ ಸ್ವಾಮೀಜಿಯವರ ಚಿಕಿತ್ಸಾ ಕೊಠಡಿಗೆ ಹೋಗಿ ವೈದ್ಯರ ಜತೆ ಚರ್ಚಿಸಿದ್ದೇನೆ. ಯಾರೂ ಆತಂಕ ಪಡುವ ಅವಶ್ಯಕತೆ ಇಲ್ಲ. ಆಸ್ಪತ್ರೆಯ ರೀತಿ ಮಠದಲ್ಲಿ ಐಸಿಯು ವ್ಯವಸ್ಥೆ ಮಾಡಲಾಗಿದೆ. ಶ್ರೀಗಳು ಮಾತನಾಡುತ್ತಿಲ್ಲ. ಚೆನ್ನಾಗಿ ಉಸಿರಾಡುತ್ತಿದ್ದಾರೆ,” ಎಂದು ಮಾಹಿತಿ ನೀಡಿದರು.

”ಶ್ರೀಗಳು ಉತ್ತರ, ದಕ್ಷಿಣಕ್ಕೆ ಸೀಮಿತರಲ್ಲ. ವಿಶ್ವದಾದ್ಯಂತ ಮಾದರಿಯಾದವರು. ಹೀಗಾಗಿ ಅವರ ಆರೋಗ್ಯದ ಬಗ್ಗೆ ಎಲ್ಲರೂ ಆತಂಕದಲ್ಲಿದ್ದಾರೆ. ವಂದತಿ ಹಬ್ಬಿಸಬಾರದು. ಶ್ರೀಗಳು ಶೀಘ್ರ ಗುಣಮುಖರಾಗಲೆಂದು ನಾನೂ ಕೂಡಾ ಬಸವಣ್ಣನವರಲ್ಲಿ ಪ್ರಾರ್ಥನೆ ಮಾಡುತ್ತೇನೆ,” ಎಂದರು.

ಭಕ್ತರ ದಂಡು: ಮಠದ ಆವರಣದಲ್ಲಿ ಹೊಸ ವರ್ಷದ ಅಂಗವಾಗಿ ಭಕ್ತ ಸಮೂಹ ನೆರೆದಿತ್ತು.ಹಿರಿಯ ಶ್ರೀಗಳು ವಿಶ್ರಾಂತಿಯಲ್ಲಿದ್ದ ಕಾರಣ ಭಕ್ತರಿಗೆ ದರ್ಶನ ಸಾಧ್ಯವಾಗಲಿಲ್ಲ. ಹೀಗಾಗಿ ಶ್ರೀಗಳು ದರ್ಶನ ನೀಡುತ್ತಿದ್ದ ಗದ್ದುಗೆಯನ್ನೇ ಮುಟ್ಟಿ ನಮಸ್ಕರಿಸಿ ಪುನೀತರಾದರು. ಮಠದ ವಿದ್ಯಾರ್ಥಿಗಳು ಶ್ರೀಗಳ ಆರೋಗ್ಯ ಚೇತರಿಕೆಗಾಗಿ ಪ್ರಾರ್ಥನೆ ಸಲ್ಲಿಸಿದರು.

ಆರೋಗ್ಯ ಸ್ಥಿರವಾಗಿದೆ : ಸಿದ್ಧಗಂಗಾ ಶ್ರೀಗಳ ಆರೋಗ್ಯ ಸ್ಥಿರವಾಗಿದ್ದು ಭಕ್ತರು ಆತಂಕ ಪಡುವ ಅಗತ್ಯವಿಲ್ಲ, ಈ ಸಂಬಂಧ ಮಾಧ್ಯಮಗಳಿಗೆ ಬೆಳಗ್ಗೆ ಮತ್ತು ಸಂಜೆ ಮಾಹಿತಿ ನೀಡಲಾಗುವುದು ಎಂದು ಶ್ರೀ ಸಿದ್ಧಲಿಂಗಸ್ವಾಮೀಜಿ ತಿಳಿಸಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ”ಶ್ರೀಗಳ ಆರೋಗ್ಯದ ವಿಚಾರವಾಗಿ ಮಾಧ್ಯಮಗಳಲ್ಲಿ ಸಾಕಷ್ಟು ಮಾಹಿತಿ ನೀಡಲಾಗುತ್ತಿದೆ. ಟಿವಿಗಳಲ್ಲಿ ಪ್ರಸಾರವಾಗುತ್ತಿರುವ ಮಾಹಿತಿಯಿಂದ ಜನರಲ್ಲಿ ಆತಂಕ ಉಂಟಾಗುತ್ತಿದೆ. ಮಾಧ್ಯಮಗಳು ಮಠದಲ್ಲಿ ಉಳಿದುಕೊಂಡಿರವುದು ಜನರಲ್ಲಿ ಹೆಚ್ಚಿನ ಗಾಬರಿಗೆ ಕಾರಣವಾಗಿದೆ ,”ಎಂದರು.

About the author

ಕನ್ನಡ ಟುಡೆ

Leave a Comment