ಸಿನಿ ಸಮಾಚಾರ

ಸಿನಿಮಾ ಕ್ಷೇತ್ರದಲ್ಲಿ 40ರಷ್ಟು ವಹಿವಾಟು: ವ್ಯವಹಾರವೇ ಬೇರೆ, ಲೆಕ್ಕ ತೋರಿಸುವುದೇ ಬೇರೆ

ಬೆಂಗಳೂರು: ಸಿನಿಮಾ ಉದ್ಯಮದಲ್ಲಿ ಮಾಡುವ ವ್ಯವಹಾರವೇ ಬೇರೆ. ಅಧಿಕೃತ ಲೆಕ್ಕದಲ್ಲಿ ತೋರಿಸುವುದೇ ಬೇರೆಯಾಗಿದೆ. ಶೇ.30ರಿಂದ 40ರಷ್ಟು ವ್ಯವಹಾರಗಳು ನಗದು ರೂಪದಲ್ಲಿ ನಡೆಯುತ್ತಿದ್ದು, ಅಧಿಕೃತ ಲೆಕ್ಕಪತ್ರದಲ್ಲಿ ತೋರಿಸುತ್ತಿಲ್ಲ ಎಂದು  ಆದಾಯ ತೆರಿಗೆ ಇಲಾಖೆ ಬೆಂಗಳೂರು ಮತ್ತು ಗೋವಾ ವಲಯದ ತನಿಖಾ ವಿಭಾಗದ ನಿರ್ದೇಶಕ ಬಿ.ಆರ್‌.ಬಾಲಕೃಷ್ಣನ್‌ ತಿಳಿಸಿದರು. ತನಿಖೆ ವಿಭಾಗದಲ್ಲಿ ಉತ್ತಮ ಕಾರ್ಯ ನಿರ್ವಹಿಸಿರುವ ಅಧಿಕಾರಿಗಳಿಗೆ ಸನ್ಮಾನಿಸಲು ದೇಶದಲ್ಲೇ ಮೊದಲ ಬಾರಿ ಆರಂಭಿಸಲಾಗಿರುವ ‘ಅನ್ವೇಷಣೆ’ ಕಾರ್ಯಕ್ರಮದಲ್ಲಿ 120 ಅಧಿಕಾರಿಗಳನ್ನು ಸನ್ಮಾನಿಸಿದ ಬಳಿಕ ಸುದ್ದಿಗಾರರ ಜೊತೆ ಬಾಲಕೃಷ್ಣನ್‌ ಮಾತನಾಡಿದರು.

”ಸಿನಿಮಾ ರಂಗದಲ್ಲಿರುವ ಕಲಾವಿದರು, ನಿರ್ಮಾಪಕರು, ತಂತ್ರಜ್ಞರು, ಕಸ್ಟ್ಯೂಮ್‌ ಡಿಸೈನರ್‌, ಸೆಟ್‌ ನಿರ್ಮಿಸುವವರು ಸೇರಿದಂತೆ ಬಹುತೇಕರ ತೆರಿಗೆ ವಂಚನೆ ಮಾಡುತ್ತಿದ್ದಾರೆ. ಪಡೆಯುತ್ತಿರುವ ಹಣಕ್ಕೂ, ಇಲಾಖೆಗೆ ತೋರಿಸುತ್ತಿರುವುದಕ್ಕೂ ಸಾಕಷ್ಟು ಅಂತರವಿದೆ. ಅವರ ವ್ಯವಹಾರಗಳು ಕುರಿತು ನಮ್ಮಲ್ಲಿ ಮಾಹಿತಿ ಇದೆ. ಹೀಗಾಗಿ, ತೆರಿಗೆ ಪಾವತಿ ಮಾಡುವಂತೆ ಸೂಚನೆ ಕೊಡಲು ಸಿನಿಮಾ ರಂಗದ ಪ್ರಮುಖರ ಜೊತೆ ಸಭೆ ಮಾಡುತ್ತೇವೆ. ನಿಜವಾದ ಲೆಕ್ಕ ಕೊಡಬೇಕು ಎಂದು ಮನವಿ ಮಾಡುತ್ತೇವೆ. ಸಿನಿಮಾ ಮಾತ್ರವಲ್ಲ. ಎಲ್ಲ ವಲಯಗಳ ವ್ಯಕ್ತಿಗಳು ನ್ಯಾಯಬದ್ಧವಾಗಿ ತೆರಿಗೆ ಪಾವತಿ ಮಾಡಬೇಕು” ಎಂದು ಬಾಲಕೃಷ್ಣನ್‌ ಹೇಳಿದರು.

”ತೆರಿಗೆ ವಂಚನೆ ಆಗಿರುವ ನಿಖರ ಮಾಹಿತಿ ಇದ್ದರೆ ಮಾತ್ರ ದಾಳಿ ಮಾಡುತ್ತೇವೆ. ಎಲ್ಲ ಶೋಧ ಕೇಸ್‌ಗಳಲ್ಲಿ ಆಘೋಷಿತ ಆಸ್ತಿ ಪತ್ತೆ ಆಗಿವೆ. ಈಗ ಪತ್ತೆಯಾಗಿರುವ ಆಘೋಷಿತ ಆಸ್ತಿಯ ಕುರಿತು 60ರಿಂದ 90 ದಿನಗಳಲ್ಲಿ ತನಿಖೆ ಮುಂದುವರಿಸುತ್ತೇವೆ. ಲೋಪ ಕಂಡು ಬಂದಲ್ಲಿ ಜಪ್ತಿ ಮಾಡಿರುವ ಆಸ್ತಿಯನ್ನು ತೆರಿಗೆ ಜೊತೆಗೆ ದಂಡದ ರೂಪದಲ್ಲಿ ಜಪ್ತಿ ಮಾಡಿಕೊಳ್ಳಲಾಗುತ್ತದೆ. ತನಿಖೆ ಹಂತದಲ್ಲಿ ಗಂಭೀರ ಸ್ವರೂಪದ ವಂಚನೆ ಇದ್ದರೆ ನ್ಯಾಯಾಲಯಕ್ಕೆ ಕೇಸ್‌ ದಾಖಲಿಸಲಾಗುತ್ತದೆ. ಎಂದು ಬಾಲಕೃಷ್ಣನ್‌ ಹೇಳಿದರು. ಮಾಧ್ಯಮಗಳಲ್ಲಿ ಬರುವಂತೆ ಸಿನಿಮಾಗಳ ಮೇಲೆ ಮಾಡುವ ಖರ್ಚು ಅಥವಾ ಹಣ ಸಂಗ್ರಹ ನಿಖರವಾಗಿ ಇರುವುದಿಲ್ಲ. ಆ ರೀತಿ ಯಾರೂ ಲೆಕ್ಕ ಇಟ್ಟಿರುವುದಿಲ್ಲ, ಎಂದರು. ಇತ್ತೀಚಿನ ಹೈ ಬಜೆಟ್‌ ಸಿನಿಮಾ ಬಿಟ್ಟು ಉಳಿದ ಸಿನಿಮಾಗಳು ಲೋ ಬಜೆಟ್‌ನದ್ದೇ ಆಗಿವೆ. ಆದರೆ, ಎಲ್ಲದರಲ್ಲೂ ತಪ್ಪು ಮಾಹಿತಿ ಹಂಚಿಕೊಳ್ಳಲಾಗುತ್ತದೆ.  ಐಟಿ ಇಲಾಖೆ ತನಿಖಾ ವಿಭಾಗದ ಪ್ರಧಾನ ಆಯುಕ್ತ ರವಿಚಂದ್ರನ್‌ ಹೇಳಿದರು.

ದಾಳಿ ಏಕೆ ? 14 ಪ್ರಮುಖ ತೆರಿಗೆ ಪಾವತಿ ವಲಯಗಳ ಪೈಕಿ ಸಿನಿಮಾ ಕ್ಷೇತ್ರದಲ್ಲಿ ಭಾರಿ ತೆರಿಗೆ ವಂಚನೆಯಾಗುತ್ತದೆ. ಅದಕ್ಕಾಗಿಯೇ ದಾಳಿ ನಡೆಸಲಾಗಿದೆ. ಸಿನಿಮಾ ಕ್ಷೇತ್ರದಲ್ಲಿ 2 ದಶಕಗಳಿಂದ ದಾಳಿಯೇ ನಡೆದಿಲ್ಲ. ಸಿನಿಮಾದ ವಿದೇಶಿ ಪ್ರದರ್ಶನ ಸಂಗ್ರಹವನ್ನು ತಮಗೆ ಬೇಕು ಎಂದು ಕಲಾವಿದರು ಮಾತುಕತೆ ವೇಳೆ ಕೇಳುತ್ತಾರೆ. ಆದರೆ, ಆ ಸಂಗ್ರಹವನ್ನು ಘೋಷಿಸಿಕೊಳ್ಳುವುದಿಲ್ಲ. ವಿವಿಧ ಸ್ಯಾಟಲೈಟ್‌ ರೈಟ್ಸ್‌ ಸೇರಿದಂತೆ ಇನ್ನಿತರ ವ್ಯವಹಾರಗಳ ಕುರಿತು ಪ್ರತ್ಯೇಕವಾಗಿ ಮಾತನಾಡುತ್ತಾರೆ. ಅದನ್ನು ಕೂಡಾ ತೋರಿಸಿಕೊಳ್ಳುವುದಿಲ್ಲ. ಸಿನಿಮಾ ಯಾವ ರೀತಿ ಸಂಗ್ರಹಿಸುತ್ತದೆ ಎನ್ನುವುದರ ಮೇಲೆ ಹಣವನ್ನು ಪರಸ್ಪರ ಹಂಚಿಕೊಳ್ಳುತ್ತಾರೆ. ಪ್ರತಿಯೊಂದು ಹಂತದಲ್ಲೂ ನಗದು ವ್ಯವಹಾರ ನಡೆಯುತ್ತದೆ. ಎಲ್ಲ ಕಡೆಯು ಪೂರ್ಣ ಪ್ರಮಾಣದಲ್ಲಿ ಘೋಷಿಸಿಕೊಳ್ಳುವುದಿಲ್ಲ” ಎಂದು ರವಿಚಂದ್ರನ್‌ ಹೇಳಿದರು.

”ವಂಚನೆ ಕಂಡು ಬಂದಾಗ ಶೋಧ ನಡೆಸಲಾಗುತ್ತದೆ ಅಷ್ಟೇ. ಅದಕ್ಕಾಗಿ ಸಾಕಷ್ಟು ಮಾಹಿತಿ ಸಂಗ್ರಹಿಸಿ ಹೋಮ್‌ವರ್ಕ್‌ ಮಾಡಲಾಗುತ್ತದೆ. ಸುಮ್ಮನೇ ಮನೆಗೆ ಹೋಗಿ ಶೋಧ ಮಾಡುವುದಿಲ್ಲ. ನಾವು ಇದುವರೆಗೂ ಮಾಡಿರುವ ಶೋಧಗಳ ಪೈಕಿ ಅಘೋಷಿತ ಆಸ್ತಿ ಪತ್ತೆಯಾಗದೇ ಇರುವುದು ಕಂಡು ಬಂದಿಲ್ಲ” ತನಿಖಾ ವಿಭಾಗದ ನಿರ್ದೇಶಕ ಬಾಲಕೃಷ್ಣನ್‌ ಹೇಳಿದರು.

ಆಡಿಟರ್‌ಗಳ ವಿರುದ್ಧ ದೂರು ನೀಡುತ್ತೇವೆ : ತೆರಿಗೆ ಪಾವತಿದಾರರ ಅಕ್ರಮಗಳು ಪರಿಶೀಲನೆ ವೇಳೆ ಆಡಿಟರ್‌ ಗಮನಕ್ಕೆ ಬರುವುದಿಲ್ಲವೇ? ಎಂಬ ಪ್ರಶ್ನೆಗೆ, ”ಆಡಿಟರ್‌ಗಳು ಲೆಕ್ಕಪತ್ರಗಳನ್ನು ಸೂಕ್ತವಾಗಿ ನಿರ್ವಹಿಸುವ ಪಾತ್ರವನ್ನು ನಿರ್ವಹಿಸಬೇಕು. ಈ ರೀತಿ ಮಾಡದೇ ಇರುವ ಕಾರಣ ಕೆಲವು ಆಡಿಟರ್‌ಗಳ ವಿರುದ್ಧ ಪ್ರಾಸಿಕ್ಯೂಷನ್‌ ಕಂಪ್ಲೆಂಟ್‌ ಮಾಡಲಾಗಿದೆ. ಅಲ್ಲದೇ, ಈ ಕುರಿತು ಇನ್ಸ್‌ಟಿಟ್ಯೂಟ್‌ ಆಫ್‌ ಚಾರ್ಟರ್ಡ್‌ ಅಕೌಂಟೆಂಟ್‌ ಆಫ್‌ ಇಂಡಿಯಾ ಕಮಿಟಿ ಗಮನಕ್ಕೆ ತರಲಾಗಿದೆ. ತೆರಿಗೆ ಪಾವತಿದಾರನೇ ತಪ್ಪು ಮಾಹಿತಿಯನ್ನು ಆಡಿಟರ್‌ಗೆ ನೀಡಿದರೆ ಏನು ಮಾಡಲಾಗದು. ಒಂದು ವೇಳೆ ಆಡಿಟರ್‌ ಅವರೇ ತಪ್ಪು ಮಾಡಿದರೆ ಕ್ರಮ ಕೈಗೊಳ್ಳಬೇಕಾಗುತ್ತದೆ,” ಎಂದು ಬಾಲಕೃಷ್ಣನ್‌ ಹೇಳಿದರು.

ಅಕ್ರಮ ಲೆಕ್ಕದ ಡೈರಿ ಜಪ್ತಿ : ಇತ್ತೀಚೆಗೆ ನಡೆದ ದಾಳಿ ವೇಳೆ ಮನೆಗಳಲ್ಲಿ ಡೈರಿಗಳು ಸಿಕ್ಕಿವೆ. ಅದರಲ್ಲಿ ಸಿನಿಮಾಗಳಿಗೆ ಮಾಡಿರುವ ಖರ್ಚಿನ ಕುರಿತು ನಮೂದಿಸಲಾಗಿದೆ. ಆದರೆ, ಅಷ್ಟು ಪ್ರಮಾಣದ ಹಣವನ್ನು ಅಧಿಕೃತ ಲೆಕ್ಕ ಪುಸ್ತಕದಲ್ಲಿ ತೋರಿಸಿಲ್ಲ. ಉದಾಹರಣೆ ಒಂದು ಸಿನಿಮಾಗೆ ಇಷ್ಟು ಖರ್ಚು, ಮತ್ತು ಇಷ್ಟು ಸಂಗ್ರಹ ಎನ್ನುವುದನ್ನು ಡೈರಿಯಲ್ಲಿ ಬರೆಯಲಾಗಿದೆ. ಅದು ಲೆಕ್ಕ ಪುಸ್ತಕದಲ್ಲಿ ಇಲ್ಲ. ಅದೇ ರೀತಿ ನಟರು ಸ್ವೀಕರಿಸುವ ಸಂಭಾವನೆ ಹಾಗೂ ಚಿತ್ರಮಂದಿರ ಸಂಗ್ರಹ ಕೂಡಾ ಮೋಸದ ಕುರಿತು ತಪ್ಪು ಮಾಹಿತಿ ಇದೆ. ಈಗ ಪತ್ತೆ ಮಾಡಲಾಗಿರುವ ಆಘೋಷಿತ ಆಸ್ತಿ-ಆದಾಯ ಮೌಲ್ಯವೇ 109 ಕೋಟಿ ರೂ. ಆಗಿದ್ದು, ಮುಂದಿನ ದಿನಗಳಲ್ಲಿ ಈ ಪ್ರಮಾಣ ಇನ್ನೂ ಹೆಚ್ಚಲಿದೆ ಎಂದು ಅಧಿಕಾರಿ ತಿಳಿಸಿದರು.

About the author

ಕನ್ನಡ ಟುಡೆ

Leave a Comment