ರಾಜ್ಯ ಸುದ್ದಿ

ಸುಳ್ಳು ಹೇಳುವವರು ದೇಶವನ್ನು ಹೇಗೆ ನಿಭಾಯಿಸುತ್ತಾರೆ : ಪ್ರಧಾನಿ ವಿರುದ್ಧ ಕುಮಾರಸ್ವಾಮಿ ವಾಗ್ದಾಳಿ

ರಾಮನಗರ: ಪ್ರಧಾನಿ ಮೋದಿ ಅವರು ಗುಪ್ತಚರ ಅಧಿಕಾರಿಗಳಿಂದ ಮಾಹಿತಿ ಪಡೆದುಕೊಂಡರೂ ಕೂಡ ಜನರ ಮುಂದೆ ಸುಳ್ಳು ಹೇಳುತ್ತಾರೆ. ಹೀಗೆ ಸುಳ್ಳು ಹೇಳುವವರು ದೇಶವನ್ನು ಹೇಗೆ ನಿಭಾಯಿಸುತ್ತಾರೆ ಎಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಪ್ರಶ್ನಿಸಿದರು. ಮಾಗಡಿಯ ಕೋಟೆ ಮೈದಾನದಲ್ಲಿ ಗುರುವಾರ ಆಯೋಜಿಸಿದ್ದ ಮಾಗಡಿ ವಿಧಾನಸಭಾ ಕ್ಷೇತ್ರದ ವಿವಿಧ ಅಭಿವೃದ್ಧಿ ಕಾಮಗಾರಿಗಳ ಚಾಲನೆ ಹಾಗೂ ಶಂಕುಸ್ಥಾಪನೆ ನೆರವೇರಿಸಿ ಅವರು ಮಾತನಾಡಿದರು.

ರೈತರ ಸಾಲಮನ್ನಾಕ್ಕೆ 11,178 ಕೋಟಿ: ಪ್ರಧಾನಿಗಳು ರಾಜ್ಯ ಸರಕಾರದ ಬಗ್ಗೆ ಕೆಟ್ಟದ್ದಾಗಿ ಮಾತನಾಡಿದ್ದಾರೆ. ರೈತರ ಸಾಲಮನ್ನಾಕ್ಕೆ ರಾಜ್ಯ ಸರಕಾರ ಇದುವರೆಗೆ 11,178 ಕೋಟಿ ರೂ. ಬಿಡುಗಡೆ ಮಾಡಿದೆ ಎಂದು ಅವರು ಸಮರ್ಥಿಸಿಕೊಂಡರು.

ರೈತರ ಮಾಹಿತಿ ನೀಡಲಾಗಿದೆ: ಕರ್ನಾಟಕ ಸರಕಾರ ನಮಗೆ ಸಹಕಾರ ನೀಡುತ್ತಿಲ್ಲ ಎಂಬ ಹೇಳಿಕೆ ಶುದ್ದ ಸುಳ್ಳು. ಕೇಂದ್ರದ ಪ್ರಧಾನ ಮಂತ್ರಿ ಕೃಷಿ ಸನ್ಮಾನ್‌ ಯೋಜನೆಗೆ ರೈತರ ಸಂಪೂರ್ಣ ಮಾಹಿತಿಯನ್ನು ರಾಜ್ಯ ಸರಕಾರ ನೀಡಿದೆ. 40 ಸಾವಿರ ರೈತರ ಖಾತೆಗಳು ಸರಿ ಇಲ್ಲ ಎಂದು ಕೇಂದ್ರ ಸರಕಾರವೇ ಇದನ್ನು ತಿರಸ್ಕರಿಸಿದೆ ಎಂದು ಅವರು ದೂರಿದರು.

17 ಸಾವಿರ ಮಂದಿಗೆ ಮಾತ್ರ ಹಣ: ಕೇಂದ್ರಕ್ಕೆ ರಾಜ್ಯ ಸರಕಾರ 2.8ಲಕ್ಷ ರೈತರ ಮಾಹಿತಿ ನೀಡಿದೆ. ಆದರೆ, ಕೇಂದ್ರ ಸರಕಾರವು ಕೃಷಿ ಸಮ್ಮಾನ್‌ ಯೋಜನೆಗೆ ಕೇವಲ 17 ರೈತರನ್ನು ಆಯ್ಕೆ ಮಾಡಿದ್ದು, ಆರು ಮಂದಿಗೆ ಮಾತ್ರ ಹಣ ಬಂದಿದೆ. ಅದರಲ್ಲೂ ಒಬ್ಬ ರೈತನಿಗೆ 2 ಸಾವಿರ ರೂ. ಬದಲು ಕೇವಲ 950 ರೂ. ಬಂದಿದೆ ಎಂದು ಅವರು ವಿವರ ನೀಡಿದರು.

ಕೋಟಿಗಳ ಲೆಕ್ಕಾಚಾರ: ಹೈನುಗಾರರಿಗೆ 2 ಸಾವಿರ ಕೋಟಿ, ರೈತರಿಗೆ ವಿದ್ಯುತ್‌ ಪೂರೈಕೆ ಮಾಡಲು 11.5 ಸಾವಿರ ಕೋಟಿ ರೂ.ಗಳನ್ನು ರಾಜ್ಯ ಸರಕಾರ ನೀಡಿದ್ದರೆ, ಕೇಂದ್ರದಿಂದ ಬಂದಿರುವುದು ಕೇವಲ 12 ಸಾವಿರ ರೂ. ಮಾತ್ರ ಎಂದು ಅವರು ಪ್ರಧಾನಿಗಳ ಕಾಲೆಳೆದರು.

ತಿಪ್ಪಗೊಂಡನಹಳ್ಳಿ ಜಲಾಶಯ ಕಾಯಕಲ್ಪಕ್ಕೆ 300 ಕೋಟಿ: ರಾಮನಗರದಲ್ಲಿ ನೀರಿನ ಬವಣೆ ನೀಗಲು ಕ್ರಮ ಕೈಗೊಳ್ಳಲಾಗಿದೆ. ಮಂಚನಬೆಲೆ ಜಲಾಶಯಕ್ಕೆ ತಿಪ್ಪಗೊಂಡನಹಳ್ಳಿ ಜಲಾಶಯದ ಕಲುಷಿತ ನೀರು ಪೂರೈಕೆಯಾಗುತ್ತಿರುವುದರಿಂದ ತಿಪ್ಪಗೊಂಡನಹಳ್ಳಿ ಜಲಾಶಯದ ಕಾಯಕಲ್ಪಕ್ಕೆ 300 ಕೋಟಿ ರೂ. ತೆಗೆದಿಡಲಾಗಿದೆ ಎಂದರು.

ಕೆರೆ ತುಂಬಿಸುತ್ತೇವೆ-ಡಿಕೆಶಿ: ಜಿಲ್ಲಾ ಉಸ್ತುವಾರಿ ಸಚಿವ ಡಿ.ಕೆ.ಶಿವಕುಮಾರ್‌ ಮಾತನಾಡಿ, ಈಗಾಗಲೇ ಹೇಳಿರುವಂತೆ ಸೌಟು ನಮ್ಮ ಬಳಿ ಇದೆ. ಎಲ್ಲರಿಗೂ ಊಟ ಬಡಿಸುತ್ತೇವೆ. ಪ್ರಧಾನಿ ಮೋದಿ ಕೈಯಲ್ಲಿ ಆಗದ ಕೆಲಸಗಳನ್ನು ನಮ್ಮ ರಾಜ್ಯ ಸರಕಾರ ಮಾಡಿದೆ. ಈಗಾಗಲೇ ಎಲ್ಲ ಕೆರೆಗಳನ್ನು ತುಂಬಿಸುವ ಪ್ರಯತ್ನ ಮಾಡಲಾಗಿದೆ ಎಂದರು.

ಡಿಕೆಸು ಗೆಲ್ಲಿಸಿ: ದೇಶದಲ್ಲಿ ಜಾತ್ಯತೀತ ಸರಕಾರ ಅಧಿಕಾರಕ್ಕೆ ಬರಬೇಕು. ಈ ನಿಟ್ಟಿನಲ್ಲಿ ನೀವೆಲ್ಲರೂ ಡಿ.ಕೆ.ಸುರೇಶ್‌ರನ್ನು ಮತ್ತೊಮ್ಮೆ ಪ್ರಚಂಡ ಬಹುಮತದಿಂದ ಗೆಲ್ಲಿಸಬೇಕು ಎಂದು ಮನವಿ ಮಾಡಿದರು. ಸಂಸದ ಡಿ.ಕೆ.ಸುರೇಶ್‌ ಮಾತನಾಡಿ, ಸಿದ್ಧಗಂಗಾಶ್ರೀಗಳಹುಟ್ಟೂರು ಅಭಿವೃದ್ಧಿ ಮಾಡಬೇಕು. ತಿಪ್ಪಸಂದ್ರದ ಸಂಸ್ಕೃತ ಪಾಠಶಾಲೆಗೆ ಶಿವಕುಮಾರಸ್ವಾಮಿಗಳ ಹೆಸರಿಡಬೇಕು. ಸ್ವಾಮೀಜಿಗಳ ಹುಟ್ಟೂರಾದ ವೀರಾಪುರದಲ್ಲಿ ಕರ್ನಾಟಕ ಪಬ್ಲಿಕ್‌ ಶಾಲೆ ತೆರೆಯಬೇಕು. ಪಶು ಆಹಾರ ಘಟಕ ತೆರೆಯಲು ಜಾಗ ನೀಡಿ ಎಂದು ಮುಖ್ಯಮಂತ್ರಿಗಳ ಬಳಿ ಮನವಿ ಸಲ್ಲಿಸಿದರು. ಶಾಸಕ ಎ.ಮಂಜುನಾಥ್‌ ಪ್ರಾಸ್ತಾವಿಕವಾಗಿ ಮಾತನಾಡಿದರು.

ಜನರಿಲ್ಲದೇ ಬಣಗುಟ್ಟಿದ ಕಾರ‍್ಯಕ್ರಮ: ಸಂಜೆ 4ಗಂಟೆಗೆ ನಿಗಧಿಯಾಗಿದ್ದ ಕಾರ‍್ಯಕ್ರಮ ರಾತ್ರಿ 7.30ರ ಗಂಟೆ ಸುಮಾರಿಗೆ ಆರಂಭಗೊಂಡಿತು. ಬರೋಬ್ಬರಿ ಮೂರೂವರೆ ಗಂಟೆಗಳಷ್ಟು ತಡವಾಗಿ ಕಾರ‍್ಯಕ್ರಮ ಆರಂಭಗೊಂಡರೂ ಹೆಚ್ಚು ಜನರು ಕಾರ‍್ಯಕ್ರಮದತ್ತ ಸುಳಿಯಲಿಲ್ಲ. ವೇದಿಕೆ ಮುಂಭಾಗದ ಆಸನಗಳನ್ನು ತುಂಬಿಸಲು ಶಾಸಕ ಎ.ಮಂಜುನಾಥ್‌ ಸುಸ್ತು ಹೊಡೆದರು. ಬಂದ ಜನರನ್ನು ಹಿಡಿದಿಡಲು ಸ್ಥಳೀಯ ಮುಖಂಡರು ಹರಸಾಹಸಪಟ್ಟರು. ಸಿಎಂ ಆಗಮನದ ಬಳಿಕ ಒಂದಿಷ್ಟು ಜನ ಸೇರಿದರು.

About the author

ಕನ್ನಡ ಟುಡೆ

Leave a Comment