ಅ೦ತರಾಷ್ಟ್ರೀಯ

ಹೆಮ್ಮೆಯ ಭಾರತೀಯನಾಗುತ್ತೇನೆ: ಸಂಸತ್ ದಾಳಿ ರೂವಾರಿ ಉಗ್ರ ಅಫ್ಜಲ್ ಗುರು ಪುತ್ರ

ಬಾರಾಮುಲ್ಲಾ: ಸಂಸತ್ ದಾಳಿಕೋರ, ಇದೇ ಅಪರಾಧ ಸಾಬೀತಾಗಿ ನೇಣಿಗೇರಿಸಲ್ಪಟ್ಟ ಉಗ್ ಅಫ್ಜಲ್ ಗುರು ಪುತ್ರ ಕಳೆದ 2,3 ವರ್ಷಗಳ ಹಿಂದೆ 10 ನೇ ತರಗತಿಯಲ್ಲಿ ಅತ್ಯುತ್ತಮ ಅಂಕ ಗಳಿಸಿ ಸುದ್ದಿಯಾಗಿದ್ದ. ಮತ್ತೀಗ ವಿದೇಶದಲ್ಲಿ ವ್ಯಾಸಂಗ ಮುಂದುವರಿಸಲು ಬಯಸಿರುವ ಆತನಿಗೆ ಪಾಸ್ಪೋರ್ಟ್ ಅಗತ್ಯವಿದೆ.

ವೈದ್ಯನಾಗಲು ಬಯಸಿರುವ ದಾಲಿಬ್ ಸದ್ಯ ವೈದ್ಯಕೀಯ ಪ್ರವೇಶ ಪರೀಕ್ಷೆಗಾಗಿ ತಯಾರಿ ನಡೆಸುತ್ತಿದ್ದಾನೆ. ಇತ್ತೀಚಿಗೆ ಆತ ಆಧಾರ್ ಕಾರ್ಡ್ ಪಡೆದುಕೊಂಡಿದ್ದು, ಬಹಳ ಸಂತೋಷ ಪಟ್ಟಿರುವ ಆತ ಇದರ ಮೂಲಕ ಪಾಸ್ಪೋರ್ಟ್‌ಗಾಗಿ ಅರ್ಜಿ ಸಲ್ಲಿಸುತ್ತೇನೆ ಎಂದಿದ್ದಾನೆ. ಆಧಾರ್ ಕಾರ್ಡ್ ಕೈಗೆ ಬಂದ ಖುಷಿಯಲ್ಲಿ ಪ್ರತಿಕ್ರಿಯಿಸಿದ ಆತ, ನನ್ನ ಗುರುತು ಪತ್ರವಾಗಿ ಆಧಾರ್ ಕಾರ್ಡ್ ಆದರೂ ಸಿಕ್ಕಿತಲ್ಲ, ನಾನು ಬಹಳ ಸಂತುಷ್ಟನಾಗಿದ್ದೇನೆ ಎಂದಿದ್ದಾನೆ. ಗಾಲಿಬ್ ತನ್ನ ಅಜ್ಜ ಗುಲಾಂ ಮೊಹಮ್ಮದ್ ಮತ್ತು ತಾಯಿ ತಬಸ್ಸುಮ್ ಜತೆ ವಾಸವಾಗಿದ್ದಾನೆ. ಆಧಾರ್ ಕಾರ್ಡ್ ಪಡೆದುಕೊಂಡಿದ್ದಕ್ಕೆ ಹೆಮ್ಮೆ ಇದೆ. ಪಾಸ್ಪೋರ್ಟ್ ಸಿಕ್ಕಿದ ಬಳಿಕ ಮತ್ತಷ್ಟು ಹೆಮ್ಮೆಯಾಗುತ್ತದೆ. ನಾನೊಬ್ಬ ಹೆಮ್ಮೆಯ ಭಾರತೀಯನಾಗಲು ಬಯಸಿದ್ದೇನೆ ಎಂದಾತ ಹೇಳಿದ್ದಾನೆ.

ಅಪ್ಪನ ಕನಸು ನನಸು : ನನ್ನ ಅಪ್ಪ ಕಂಡಿದ್ದ ಕನಸನ್ನು ನನಸು ಮಾಡಲು ಬಯಸುತ್ತೇನೆ. ಈ ಹಿಂದೆ ಆಗಿರುವ ತಪ್ಪುಗಳಿಂದ ನಾನು ಬಹಳಷ್ಟು ಪಾಠ ಕಲಿತಿದ್ದೇನೆ. ನನ್ನ ಅಪ್ಪ ವೈದ್ಯಕೀಯ ವೃತ್ತಿ ಜೀವನವನ್ನು ಪೂರ್ಣಗೊಳಿಸಲಾಗಲಿಲ್ಲ ಮತ್ತು ನಾನವರ ಕನಸನ್ನು ಪೂರ್ಣಗೊಳಿಸಲು ಬಯಸುತ್ತೇನೆ. ಆತನನ್ನು ಗಲ್ಲಿಗೇರಿಸಿದ ತರುವಾಯ ಕಣಿವೆಯಲ್ಲಿ ಹಲವು ಆತಂಕವಾದಿ ಸಂಘಟನೆಯವರು ನನ್ನ ಮೈಂಡ್ ವಾಶ್ ಮಾಡಲು ಯತ್ನಿಸಿದ್ದರು. ಪ್ರತೀಕಾರ ತೀರಿಸಿಕೊಳ್ಳುವಂತೆ ಉತ್ತೇಜಿಸಿದ್ದರು. ಆದರೆ ನಾನವರ ಬಲೆಗೆ ಬೀಳಲಿಲ್ಲ ಎಂದು ಗಾಲಿಬ್ ಹೇಳಿದ್ದಾನೆ. ಭಯೋತ್ಪಾದಕರ ಬಲೆಯಿಂದ ಬಚಾವಾದ ಶ್ರೇಯವನ್ನಾತ ತಾಯಿಗೆ ಸಲ್ಲಿಸುತ್ತಾನೆ. ನಾನು 5 ನೇ ತರಗತಿಯಲ್ಲಿದ್ದಾಗಿನಿಂದಲೇ ತಾಯಿ ನನ್ನನ್ನು ಕೆಲವರಿಂದ ( ಉಗ್ರರ ಸಂಪರ್ಕದಿಂದ) ದೂರವಿಟ್ಟು ಬೆಳೆಸಲು ಆರಂಭಿಸಿದ್ದಳು. ಯಾರು ಏನೇ ಹೇಳಿದರೂ ನಿನದಕ್ಕೆ ಪ್ರತ್ರಿಕ್ರಿಯಿಸಬೇಡ ಎಂದವಳು ಹೇಳಿದ್ದಳು. ನನಗೆ ತಾಯಿಯ ಮಾತೇ ಹೆಚ್ಚು ಮಹತ್ವದ್ದು, ಜನರದ್ದಲ್ಲ. ನಮ್ಮ ಕುಟುಂಬದ ಸದಸ್ಯರಲ್ಲಿ ಯಾರು ಕೂಡ ಕಾಶ್ಮೀರಕ್ಕೆ ಸಂಬಂಧಿಸಿದ ವಿಷಯವನ್ನು ಚರ್ಚೆ ಮಾಡುವುದಿಲ್ಲ ಎನ್ನುತ್ತಾನೆ ಗಾಲಿಬ್.

ಆತನ ಮನೆಯಿಂದ 100 ಮೀಟರ್ ದೂರದಲ್ಲಿರುವ ಶಿಬಿರದಲ್ಲಿ ವಾಸವಾಗಿರುವ ರಾಷ್ಟ್ರೀಯ ರೈಫಲ್ಸ್ ಯೋಧರು ಗ್ರಾಮದ ಸುರಕ್ಷತೆಯನ್ನು ನೋಡಿಕೊಳ್ಳುತ್ತಾರೆ. ಈ ಗ್ರಾಮ ಬಹಳ ಶಾಂತವಾಗಿದ್ದು, ಬುರ್ಹಾನ್ ವಾನಿ ಸಾವಿನ ಬಳಿಕ ಕೂಡ ಇಲ್ಲಿ ಯಾವುದೇ ಅಹಿತಕರ ಘಟನೆಗಳು ನಡೆದಿರಲಿಲ್ಲ. ಭದ್ರತಾ ಸಿಬ್ಬಂದಿ ನಮಗೆ ಎಂದಿಗೂ ಕಿರುಕುಳ ಕೊಟ್ಟಿಲ್ಲ. ಸದಾ ಉತ್ತೇಜನ ನೀಡಿದ್ದಾರೆ. ಯಾವುದಕ್ಕೂ ತಲೆ ಹಾಕದೇ ಕೇವಲ ವೈದ್ಯಕೀಯ ವ್ಯಾಸಂಗದತ್ತ ಗಮನ ಕೊಡು ಎಂದವರು ಸಿಕ್ಕಾಗೆಲ್ಲ ಹೇಳುತ್ತಿರುತ್ತಾರೆ ಎಂದಾತ ಹೇಳುತ್ತಾನೆ. ತಾಯಿಯ ತಂದೆ (ಅಜ್ಜ)ಯೇ ನನಗೆ ಸ್ಪೂರ್ತಿ ಸೆಲೆ. 50 ವರ್ಷದ ಹಿಂದೆಯೇ ಇತಿಹಾಸದಲ್ಲವರು ಸ್ನಾತಕೋತ್ತರ ಪದವಿ ಪಡೆದಿದ್ದರು ಎಂದು ಗಾಲಿಬ್ ಹೇಳಿದರೆ, ನನ್ನ ಮೊಮ್ಮಗ 10 ನೇ ತರಗತಿಯಲ್ಲಿ 95 % ಅಂಕ ಗಳಿಸಿದ್ದ, ದ್ವಿತೀಯ ಪಿಯುಸಿಯಲ್ಲಿ 85% ಅಂಕ ಗಳಿಸಿದ್ದಾನೆ. ಅವನೊಂದು ದಿನ ವೈದ್ಯನಾಗುತ್ತಾನೆ ಎಂಬ ಭರವಸೆ ನನಗಿದೆ ಎಂದು 73ರ ತಾತ ಇಂಗ್ಲೀಷ್‌ನಲ್ಲಿ ಹೇಳುತ್ತಾರೆ.

About the author

ಕನ್ನಡ ಟುಡೆ

Leave a Comment