ರಾಜ್ಯ ಸುದ್ದಿ

12 ಕೋಟಿ ಮೌಲ್ಯದ ಅಡಕೆ ಪತ್ತೆ, ಅಕ್ರಮ ದಾಸ್ತಾನಿನ ಮೇಲೆ ಐಟಿ ಅಧಿಕಾರಿಗಳ ದಾಳಿ

ತುಮಕೂರು/ಬೆಂಗಳೂರು: ತುಮಕೂರು ಸಮೀಪದ ಅಂತರಸನಹಳ್ಳಿಯ ಎರಡು ಗೋದಾಮುಗಳ ಮೇಲೆ ದಾಳಿ ನಡೆಸಿರುವ ರಾಜ್ಯ ವಾಣಿಜ್ಯ ತೆರಿಗೆ ಇಲಾಖೆ ಅಧಿಕಾರಿಗಳು, 12 ಕೋಟಿ ರೂ. ಮೌಲ್ಯದ ಅಕ್ರಮ ಅಡಿಕೆ ದಾಸ್ತಾನು ಪತ್ತೆ ಮಾಡಿ ಜಪ್ತಿ ಮಾಡಿಕೊಂಡಿದ್ದಾರೆ.

ಖಚಿತ ಮಾಹಿತಿ ಮೇರೆಗೆ ಬೆಂಗಳೂರು ದಕ್ಷಿಣ ವಲಯ ವಾಣಿಜ್ಯ ತೆರಿಗೆಗಳ ಹೆಚ್ಚುವರಿ ಆಯುಕ್ತ (ಜಾರಿ) ನಿತೇಶ್‌ ಪಾಟೀಲ್‌ ನೇತೃತ್ವದ ಅಧಿಕಾರಿಗಳ ತಂಡ ಡಿ.19ರಂದು ಗೋದಾಮಿನ ಮೇಲೆ ದಾಳಿ ನಡೆಸಿತ್ತು. ಅಕ್ರಮ ಅಡಿಕೆ ದಾಸ್ತಾನು ಪತ್ತೆ ಹಚ್ಚಿ, ಮಾಲೀಕರಿಗೆ 1.20 ಕೋಟಿ ರೂ. ತೆರಿಗೆ ಮತ್ತು ದಂಡ ವಿಧಿಸಿದ್ದು, 72 ಲಕ್ಷ ರೂ. ವಸೂಲಿ ಮಾಡಲಾಗಿದೆ.

ಪರಿಶೀಲನೆಗಾಗಿ ಸ್ಥಳಕ್ಕೆ ತೆರಳಿದಾಗ ಗೋದಾಮಿಗೆ ಯಾವುದೇ ನಾಮಫಲಕ ಇರಲಿಲ್ಲ. ಅಲ್ಲಿನ ಕೆಲಸಗಾರರು, ಸಿಬ್ಬಂದಿಯ ಬಳಿ ವಿಚಾರಿಸಿದಾಗ ಇದು ರೈಸ್‌ ಮಿಲ್‌ ಆಗಿದ್ದು, ಭತ್ತ ದಾಸ್ತಾನು ಮಾಡಲಾಗಿದೆ ಎಂದು ಹೇಳಿದ್ದರು. ಅಧಿಕಾರಿಗಳು ಒಳಗೆ ಪ್ರವೇಶಿಸದಂತೆ ತಡೆದಿದ್ದಾರೆ. ಕೊನೆಗೆ ಅಧಿಕಾರಿಗಳ ತಂಡ ಗುರುತಿನ ದಾಖಲೆಗಳು ಹಾಗೂ ಶೋಧಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಸಿಬ್ಬಂದಿಗೆ ತೋರಿಸಿದ್ದರು. ಕರ್ತವ್ಯಕ್ಕೆ ಅಡ್ಡಿಪಡಿಸಿದರೆ ಕ್ರಿಮಿನಲ್‌ ಕೇಸ್‌ ದಾಖಲಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದರು. ಹೀಗಾಗಿ, ಗೋದಾಮಿನ ಬಳಿ ಇದ್ದ ಸಿಬ್ಬಂದಿ, ಅಧಿಕಾರಿಗಳು ಒಳಗೆ ಪ್ರವೇಶಿಸಲು ಅವಕಾಶ ಮಾಡಿಕೊಟ್ಟರು.

ಬೆಟ್ಟದಂತಿತ್ತು ಅಡಕೆ ರಾಶಿ : ಗೋದಾಮಿನ ಒಳಗೆ ಅಡಿಕೆ ರಾಶಿ ಬೆಟ್ಟದಂತೆ ಕಾಣುತ್ತಿತ್ತು. ನೂರಾರು ಮೂಟೆಯ ಅಡಿಕೆ ದಾಸ್ತಾನು ನೋಡಿದ ಅಧಿಕಾರಿಗಳು, ಅಡಿಕೆ ದಾಸ್ತಾನು ಮಾಡಿರುವ ಕುರಿತ ದಾಖಲೆಗಳು, ಜಿಎಸ್‌ಟಿ ನೋಂದಣಿ, ತೆರಿಗೆ ಪಾವತಿ, ವಹಿವಾಟಿನ ಕುರಿತು ಪರವಾನಗಿ ದಾಖಲೆಗಳನ್ನು ಕೇಳಿದ್ದರು. ಆದರೆ, ಕಾರ್ಮಿಕರು ಮತ್ತು ಸಿಬ್ಬಂದಿ ಬಳಿ ಈ ಕುರಿತು ಯಾವುದೇ ದಾಖಲೆಗಳು ಇರಲಿಲ್ಲ. ಅಡಿಕೆಯ ಮೌಲ್ಯಮಾಪನ ಮಾಡಿದ ಅಧಿಕಾರಿಗಳ ತಂಡ, ದಂಡ ಮತ್ತು ತೆರಿಗೆ ಸೇರಿ 1.2 ಕೋಟಿ ರೂ. ವಿಧಿಸಿದೆ.

2 ಕೋಟಿ ರೂ. ಮೀರಿದ ತೆರಿಗೆ ವಂಚನೆಯಾಗಿದ್ದರೆ ಮಾತ್ರ ಆರೋಪಿಯ ಬಂಧನಕ್ಕೆ ಅವಕಾಶವಿರುತ್ತದೆ. ಅದಕ್ಕೂ ಕಡಿಮೆ ಮೊತ್ತದ ತೆರಿಗೆ ವಂಚನೆ ಪ್ರಕರಣವಾಗಿರುವ ಕಾರಣ ಆರೋಪಿಯನ್ನು ವಶಕ್ಕೆ ಪಡೆದಿಲ್ಲ ಎಂದು ತೆರಿಗೆ ಇಲಾಖೆ ಮೂಲಗಳು ತಿಳಿಸಿವೆ.

ರಾಜ್ಯದ ತುಮಕೂರು, ಶಿವಮೊಗ್ಗ, ಚಿತ್ರದುರ್ಗ, ದಕ್ಷಿಣ ಕನ್ನಡ ಮತ್ತಿತರ ಜಿಲ್ಲೆಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಅಡಿಕೆ ಬೆಳೆಯುವುದರಿಂದ ವರ್ತಕರು ಅಡಿಕೆ ಖರೀದಿಸಿ, ಸಾಗಣೆ ಮಾಡಿ ಯಾವುದೇ ದಾಖಲಾತಿಗಳಿಲ್ಲದೇ ದಾಸ್ತಾನು ಮಾಡುತ್ತಿರುವ ಬಗ್ಗೆ ವಾಣಿಜ್ಯ ತೆರಿಗೆ ಇಲಾಖೆಗೆ ಖಚಿತ ಮಾಹಿತಿಗಳಿವೆ. ವರ್ತಕರು ಹೀಗೆ ದಾಸ್ತಾನು ಮಾಡಿದ ಅಡಿಕೆಯನ್ನು ದೇಶದ ನಾನಾ ಭಾಗಗಳಿಗೆ ಸರಬರಾಜು ಮಾಡುತ್ತಿದ್ದಾರೆ. ಯಾವುದೇ ದಾಖಲೆಗಳಿಲ್ಲದೆ ವಹಿವಾಟು ಕಂಡುಬಂದಲ್ಲಿ ಗಂಭೀರವಾಗಿ ಪರಿಗಣಿಸಲಾಗುವುದು. ಜತೆಗೆ ತೆರಿಗೆ ವಂಚನೆಯ ಚಟುವಟಿಕೆಗಳಲ್ಲಿ ತೊಡಗಿರುವ ವರ್ತಕರ ವಿರುದ್ಧ ಕಠಿಣ ಕ್ರಮ ಜರುಗಿಸಲಾಗುವುದು ಎಂದು ವಾಣಿಜ್ಯ ತೆರಿಗೆಗಳ ಆಯುಕ್ತ ಎಂ.ಎಸ್‌.ಶ್ರೀಕರ್‌ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಗುಟ್ಕಾ ತಯಾರಿಕೆಗೆ ಬಳಕೆ : ಅಕ್ರಮವಾಗಿ ಖರೀದಿಸುವ ಅಡಿಕೆಯನ್ನು ಹೆಚ್ಚಾಗಿ ಉತ್ತರ ಭಾರತದ ಗುಟ್ಕಾ ತಯಾರಿಕೆ ಕಾರ್ಖಾನೆಗಳಿಗೆ ಪೂರೈಕೆ ಮಾಡಲಾಗುತ್ತದೆ. ಗುಟ್ಕಾ ಪದಾರ್ಥಗಳನ್ನು ಕಡಿಮೆ ಬೆಲೆಗೆ ಮಾರಾಟ ಮಾಡುವ ಉದ್ದೇಶದಿಂದ ಕಾರ್ಖಾನೆ ಮಾಲೀಕರು ಕಾಳಸಂತೆಯಲ್ಲೇ ಹೆಚ್ಚಾಗಿ ಖರೀದಿಸುತ್ತಾರೆ. ದಲ್ಲಾಳಿಗಳು ಎಪಿಎಂಸಿಗೆ ಹೋಗದೆ ಅಡಿಕೆ ಬೆಳೆದ ರೈತರಿಂದ ನೇರವಾಗಿ ಹಸಿ ಅಡಿಕೆ ಖರೀದಿಸಿ ಬೇಯಿಸಿ ಒಣಗಿಸಿ ಕಾರ್ಖಾನೆಗಳಿಗೆ ಪೂರೈಕೆ ಮಾಡುತ್ತಾರೆ. ಅಲ್ಲದೆ, ಒಣಗಿಸಿದ ಅಡಿಕೆಯನ್ನು ನೇರವಾಗಿ ಖರೀದಿಸಿ ಒಂದೆಡೆ ದಾಸ್ತಾನು ಮಾಡಿ ಕಾರ್ಖಾನೆಗಳಿಗೆ ಪೂರೈಕೆ ಮಾಡುತ್ತಾರೆ. ಎಪಿಎಂಸಿಗೆ ಹೋದರೆ ತೆರಿಗೆ ಪಾವತಿಸಬೇಕು. ಹಾಗಾಗಿ ಅಡ್ಡದಾರಿಯಲ್ಲಿ ವಹಿವಾಟು ನಡೆಸುತ್ತಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

About the author

ಕನ್ನಡ ಟುಡೆ

Leave a Comment