ರಾಷ್ಟ್ರ ಸುದ್ದಿ

240 ಟೈರಿನ ಟ್ರೈಲರ್‌ನಲ್ಲಿ 300 ಟನ್‌ ತೂಕದ ವಿಷ್ಣು ಪ್ರತಿಮೆ

ಚೆನ್ನೈ: ತಮಿಳುನಾಡಿನ ತಿರುವಣ್ಣಮಲೈ ಜಿಲ್ಲೆಯ ಗ್ರಾಮವೊಂದರಿಂದ ಏಕಶಿಲಾ ವಿಶ್ವರೂಪ ಮಹಾವಿಷ್ಣು ಪ್ರತಿಮೆಯನ್ನು ಬೆಂಗಳೂರಿಗೆ ಶಿಫ್ಟ್‌ ಮಾಡಲು ಎರಡು ವರ್ಷಗಳಿಂದ ಹರಸಾಹಸ ಪಡಲಾಗುತ್ತಿದೆ. ಆದರೀಗ ಶೀಘ್ರದಲ್ಲೇ ಇದನ್ನು ಬೆಂಗಳೂರಿಗೆ ತರುವ ಸಾಧ್ಯತೆ ಇದೆ. 64 ಅಡಿ ಎತ್ತರದ ಮೂರ್ತಿಯನ್ನು ಸದ್ಯ 240 ಟೈರಿನ ಟ್ರೈಲರ್‌ನಲ್ಲಿ ಸಾಗಿಸಲು ಯತ್ನ ನಡೆದಿದ್ದು, ಕೊನೆಗೂ ಲೋಡ್‌ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಆದರೆ, ಇತ್ತೀಚೆಗೆ ಸುರಿದ ಮಳೆಯಿಂದಾಗಿ 240 ಟೈರಿನ ವಾಹನ ಸಹ ಮಣ್ಣಿನಲ್ಲಿ ಸಿಲುಕಿಕೊಂಡಿದೆ.

ಹೀಗಾಗಿ, ಲೋಡ್‌ಗಟ್ಟಲೆ ಜಲ್ಲಿಕಲ್ಲುಗಳನ್ನು ಕಾರ್ಮಿಕರು ಸುರಿಯುತ್ತಿದ್ದು, ಮಣ್ಣಿನಿಂದ ಮೇಲೆತ್ತಲು ಪ್ರಯತ್ನ ನಡೆಯುತ್ತಿದೆ. ಇನ್ನೊಂದೆಡೆ, ವಿಷ್ಣು ಮೂರ್ತಿ ಮೊದಲಿಗೆ 380 ಟನ್‌ಗಳಷ್ಟು ತೂಕವಿದ್ದು, ನಂತರ 80 – 90 ಟನ್‌ಗಳಷ್ಟು ತೂಕವನ್ನು ಶಿಲ್ಪಿಗಳು ಇಳಿಸಿದ್ದಾರೆ. 108 ಅಡಿ ಎತ್ತರದ ವಿಶ್ವರೂಪ ಮಹಾವಿಷ್ಣು ಮೂರ್ತಿಯನ್ನು ಬೆಂಗಳೂರಿನ ದೇವಾಲಯದಲ್ಲಿ ಪ್ರತಿಷ್ಠಾಪನೆ ಮಾಡಬೇಕೆನ್ನುವುದು ನಿವೃತ್ತ ಸರಕಾರಿ ವೈದ್ಯರೊಬ್ಬರ ಕನಸಾಗಿತ್ತು. ಅಲ್ಲದೆ, ಆ ಮೂರ್ತಿ 11 ಮುಖಗಳು ಹಾಗೂ 22 ಕೈಗಳನ್ನು ಹೊಂದಿರಬೇಕು. ಜತೆಗೆ, 7 ತಲೆಯ  ಹಾವನ್ನು ಸಹ ಒಟ್ಟಿಗೇ ಪ್ರತಿಷ್ಠಾಪನೆ ಮಾಡಬೇಕೆಂಬುದು ಅವರ ಕನಸಾಗಿದೆ. ಕಳೆದ 5 ವರ್ಷಗಳಿಂದ ತನ್ನ ಕನಸಿಗೆ ಜೀವ ಕೊಡಲು ಪ್ರಯತ್ನ ಪಡುತ್ತಿದ್ದಾರೆ.

ಇನ್ನು, ಮೂರ್ತಿಯನ್ನು ಶಿಫ್ಟ್ ಮಾಡಲು ತಿರುವಣ್ಣಮಲೈನ ಜಿಲ್ಲಾಧಿಕಾರಿ ಎಸ್‌. ಕಂದಸಾಮಿ ಸಹ ಪ್ರಯತ್ನ ಪಡುತ್ತಿದ್ದಾರೆ. ಅಕ್ಟೋಬರ್ 22ರೊಳಗೆ ಇದನ್ನು ಸಾಗಿಸಬೇಕಿತ್ತಾದರೂ ಅದು ಸಾಧ್ಯವಾಗದ ಕಾರಣ ಈಗ ಆ ಗ್ರಾಮದಿಂದ ಮೂರ್ತಿಯನ್ನು ಸಾಗಿಸಲು 6 ತಿಂಗಳು ಹೆಚ್ಚುವರಿ ಸಮಯವನ್ನು ಸರಕಾರ ನೀಡಿದೆ ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ, ಪ್ರತಿಮೆ ಸಾಗಿಸಲು ಸರಕಾರದ ಹಲವು ಇಲಾಖೆಗಳಿಂದ ಎನ್‌ಒಸಿ ಪಡೆದುಕೊಳ್ಳಲಾಗಿದೆ. ಹೀಗಾಗಿ, ವಿಷ್ಣು ಪ್ರತಿಮೆಯನ್ನು ಈ ಬಾರಿ ಸಾಗಿಸಲು ಯಶಸ್ವಿಯಾಗುತ್ತೇವೆ. ನಂತರ, ಎರಡು ವರ್ಷಗಳ ಕಾಲ ಅದಕ್ಕೆ ವಿಷ್ಣು ಪ್ರತಿಮೆಗೆ ಅಂತಿಮ ಸ್ಪರ್ಶ ಕೊಡಬೇಕಾಗಿದೆ ಎಂದು ಲಕ್ಷ್ಮಣ್‌ ಎಂಬ ಶಿಲ್ಪಿಯೊಬ್ಬರು ಹೇಳಿದ್ದಾರೆ. ಅಲ್ಲದೆ, ಬೆಂಗಳೂರಿನ ದೇವಾಲಯಕ್ಕೆ ಮೂರ್ತಿ ಸಾಗಣೆ, ವಾಹನಕ್ಕೆ ಮೇಲೆತ್ತಲು ಹಾಗೂ ಕೆಳಗಿಳಿಸುವ ಜವಾಬ್ದಾರಿಯನ್ನು ಮುಂಬಯಿ ಮೂಲದ ರೇಷಮ್ಸಿಂಗ್ ಗ್ರೂಪ್ಸ್‌ ಎಂಬ ಸಂಸ್ಥೆಗೆ ವಹಿಸಲಾಗಿದೆ.

About the author

ಕನ್ನಡ ಟುಡೆ

Leave a Comment